దుబాయ్: అబుధాబిలో చట్టాలు ఎంత విచిత్రంగా ఉంటాయో అందరికీ తెలిసిందే. సరదాగా ఒక మాట అన్న అది అక్కడ తప్పు అయిపోతుంది. ఇప్పుడు ఓ వ్యక్తికి అదే పరిస్థితి ఎదురైంది. తనకు కాబోయే భార్యను సరదాగా ఇడియట్ అన్నందుకు గాను అతడు భారీ మూల్యం చెల్లించుకోవాల్సి వచ్చింది. ఖలీజ్ టైమ్స్ కథనం ప్రకారం ఓ వ్యక్తి తనకు కాబోయే భార్యకు వాట్సాప్లో ఇడియట్ అని సరదాగా సందేశం పంపించాడు. దీంతో ఆమె అతడిపై కేసు పెట్టింది. విచారించిన న్యాయస్థానం అతడికి జైలు శిక్షతో పాటు జరిమానా కూడా విధించింది. 60 రోజుల పాటు జైలు శిక్ష, 20వేల దిర్హామ్స్( సుమారు రూ.3.92లక్షలు) జరిమానా చెల్లించాల్సిందిగా అక్కడి న్యాయస్థానం ఆదేశించింది. సామాజిక మాధ్యమాల ద్వారా ఎవరినైనా తిడుతూ అభ్యంతరకరమైన సందేశాలు పంపించడం చేస్తే అది అక్కడ సైబర్ క్రైమ్ కింద నేరం. సరదాగా అన్న మాటకు అతడు సుమారు రూ.మూడున్నర లక్షల మేర జరిమానా చెల్లించుకోవాల్సి వచ్చింది. ఇలా సందేశం పంపించిన వ్యక్తికి భారీగా జరిమానా విధించడం అక్కడ ఇదేమి తొలిసారి కాదు. ఈ ఏడాది జనవరిలో దుబాయ్లో నివసించే బ్రిటిష్ సిటిజన్ ఒకరు తన కార్ డీలర్ను తిడుతూ సందేశం పంపించాడు. దీంతో అతడిని అరెస్టు చేసి జైల్లో పెట్టారు.
Mon Jan 19, 2015 06:51 pm