పిల్లలూ..! మనమిప్పుడు చూస్తున్న ఐరన్ బాక్స్ ఈనాటిది కాదు. దీనికి ఎంతో చరిత్ర ఉంది. రాజుల కాలం నుంచే ఇస్త్రీపెట్టెను ఉపయోగిస్తున్నారు. ఆకారాలు వేరైనప్పటికీ ... పనితీరులో తేడా ఉన్నప్పటికీ.. అప్పటి నుంచే ఇస్త్రీ చేసిన దుస్తులను ధరించడం అలవాటుగా మారిపోయింది. మరి ఆ విశేషాలేంటో తెలుసుకుందామా...
- ఇస్త్రీ చేయడం అనే ఆలోచన ముందుగా చైనా వాళ్లకు వచ్చింది. ప్రత్యేకమైన సమయం ఏదైనా ఉంటే చాలు. ఇస్త్రీ దుస్తులు వేసుకునేలా అలవాటు చేశారు. ఇప్పుడేమో నలిగిన దుస్తులు వెయ్యాలంటే నామోషీగా అనిపిస్తోంది.
- 1వ శతాబ్దంలోనే చైనావాళ్లు ఇస్త్రీ పద్ధతి మొదలెట్టేశారట. కాకుంటే అప్పట్లో పెట్టెలు ఉండేవి కాదు. నలిగిన దుస్తుల్ని అటొకరు, ఇటొకరు పట్టుకునేవాళ్లు. సత్తుపాత్రలో బొగ్గు నిప్పులు వేసి ఇస్త్రీ చేసేవాళ్లు. మరీ ముడతలు పడిన వాటి కంటే నయం కదా! ఇది ప్రత్యేకంగా రాజ కుటుంబీకుల కోసం సేవకులు చేసిపెట్టేవాళ్లు.
- తరువాత ఈ విషయం కొరియన్లకి తెలిసింది. వాళ్లు చైనా వాళ్లలా కాకుండా బరువైన చెక్కతో ఒత్తి దుస్తుల్ని సాఫీగా చెయ్యసాగారు. దుడ్డుకర్రలతో నలుగులు పోయేటట్లు ఒత్తిడి తెచ్చి మడత పెట్టేవాళ్లు.
- ఆ తరువాత ఇనుప పెట్టె వచ్చింది. ఈ ఘనత గ్రీకులది. చైనీయులు, కొరియన్లలా కష్టపడటమెందుకు అనుకు న్నారులా ఉంది. అందుకే ఎంచక్కా ఇనుప పెట్టెను తయారుచేసేశారు. దాన్ని పొయ్యి మీద వేడిచేసి దుస్తుల్ని ఇస్త్రీ చేసేవాళ్లు. అదీ కొన్నాళ్లే. ఎందుకంటే పెట్టెను పొయ్యిపై వేడిచేస్తే పట్టుకోవడానికి ఉన్న పిడి కూడా వేడెక్కేది. ఇస్త్రీ మాట ఎలా ఉన్నా చేతులు కాలేవి.
- ఐదవ శతాబ్దం వరకూ ఈ తిప్పలు తప్పలేదు. తరువాత గ్రీకుల ఇనుప పెట్టె రూపాంతరం చెంది బొగ్గుల ఇనుపపెట్టెగా రూపొందింది. దానికి చెక్క పిడిని బిగించడం వల్ల చేతికి వేడి తగిలేది కాదు. రానురానూ ప్రపంచమంతా ఇస్త్రీ చేసుకుంటూ మన దేశానికి కూడా వచ్చింది. మనవాళ్లు మరీ తెలివైన వాళ్లు కదా! కేరళలో ఆ పెట్టెలో బొగ్గులకు బదులు కొబ్బరి డిప్పలు వేసి మరీ ఇస్త్రీ చేసేవాళ్లు. ఈ పెట్టె కాస్త బరువుంటుందన్న మాటే గానీ దుస్తుల్ని బాగా అణచిపెట్టేది. అలాఅలా ఇస్త్రీ పెట్టె వచ్చింది.
- అయితే ఇదీ సమస్యగానే అనిపించింది. ఎక్కువ సేపు విద్యుత్ బోర్డు స్విచ్ వేసి ఉంచేస్తే బాగా వేడెక్కేది. దానివల్ల సున్నితమైన వస్త్రాలు కాలిపోయేవి. ఇదీ ఇబ్బందే కదా! అందుకే స్విచ్ వేయడం, వేడెక్కాక ఆపడం చెయ్యాల్సి వచ్చేది. దాంతో కొద్దిసేపటికే విసుగు పుట్టేది. సరిగా చెయ్యడం రాకుంటే ఇస్త్రీ మీదే ఆశ వదులుకోవాల్సి వచ్చేది. లేదంటే ఇస్త్రీ బండికోసం వెతుక్కోవడమే పని.
- 1882 వరకూ అలాగే తిప్పలుపడ్డారు. న్యూయార్క్కి చెందిన 'హెన్రీ సీలే' విద్యుత్ ఇస్త్రీ పెట్టెకు థర్మోస్టాట్ అనే పరికరాన్ని జోడించాడు. ఇది ఏం చేస్తుందంటే, సరిపడా వేడెక్కగానే దానికదే ఆగిపోతుంది. ఇక్కడితో అయిపో యింది అనుకుంటున్నారా... 1920లో 'థామస్ సియర్స్' ఈ ఆటోమేటిక్ విద్యుత్ ఇస్త్రీ పెట్టెకు కొద్దిగా మార్పులు చేసి ఆవిరితో ఇస్త్రీ చేసుకునేలా కనుగొన్నాడు. అంటే బిరుసుగా ఉండే నూలు (కాటన్) వస్త్రాలు నీటి ఆవిరి తగిలి మెత్తగా అవుతాయి. అప్పటినుంచి ఇస్త్రీ సులువైపోయింది.
Authorization