Authorization
Mon Jan 19, 2015 06:51 pm
- 'క్లార్క్' ఎయిర్పోర్టుకు అతి తక్కువ బిడ్డింగ్
- త్వరలో నిర్మాణ పనుల అప్పగింత
హైదరాబాద్ : ఫిలిప్పీన్స్ కేంద్రంగా పని చేస్తున్న మెగావైడ్ కన్స్ట్రక్షన్ కార్పొరేషన్ భాగస్వామ్యంతో జీఎంఆర్ గ్రూపు క్లార్క్ ఇంటర్నేషనల్ ఎయిర్పోర్టు ప్రాజెక్టును దక్కించుకుంది. 250 మిలియన్ డాలర్ల విలువ చేసే ఈ ప్రాజెక్టును తాము సాధించుకున్నట్టు జీఎంఆర్ గ్రూపు శుక్రవారం ఒక ప్రకటనలో తెలిపింది. దక్షిణతూర్పు ఆసియా దేశాల్లోనే ఇదే అతి తక్కువ బిడ్డింగ్ అని పేర్కొంది. క్లార్క్ ఎయిర్పోర్టును ఈపీసీి, ఓఅండ్ఎం హైబ్రిడ్ పద్దతిలో ఫిలిప్పిన్స్ ప్రభుత్వం అభివృద్ధి చేస్తుంది. ఈపీసీలో భాగంగా నూతన టెర్మినల్ రూపకల్పన, నిర్మాణ, టెస్టింగ్, ప్రారంభించి ఇవ్వాల్సి ఉంటుంది. ఏడాదికి 80 లక్షల ప్రయాణికుల సామర్థ్యంతో దీన్ని అందుబాటులోకి తేనున్నారు. ఈ కన్సోరియం టెర్మినల్ నిర్మాణంతో పాటు కారు పార్కింగ్ సౌలభ్యంతో అందుబాటులోకి తేనుంది. సుమారు రూ.1,600 కోట్ల విలువ చేసే ఈ ప్రాజెక్టు నిర్మాణ పనులను మరో వారం రోజుల్లో జీఎంఆర్కు అప్పగించనున్నారని ఆ సంస్థ అంచనా వేస్తుంది. 2020 కల్లా ఈ ప్రాజెక్టును పూర్తి చేసే అవకాశం ఉంది.
దీంతో జీఎంఆర్కు ఫిలిప్పీన్స్తో రెండో విమానశ్రయ అభివృద్ధి బాధ్యతలు దక్కినట్టయ్యాయి. ఇది వరకే ఈ దేశంలోని రెండో అతిపెద్ద విమానాశ్రయం మక్టాన్ సెబు ఇంటర్నెషనల్ ఎయిర్పోర్టు ప్రాజెక్టును సాధించుకుంది. ఇది ఏడాదికి కోటి మంది ప్రయాణికుల సామర్థ్యం కలిగి ఉంది. కొత్త టెర్నినల్ నిర్మాణం చేపట్టనున్న క్లార్క్ ఎయిర్పోర్టు మనీలాకు 100 కిలోమీటర్ల దూరంలో ఉందని జీఎంఆర్ గ్రూపు ఎయిర్పోర్ట్సు చైర్మెన్ శ్రీనివాస్ బొమ్మిడల పేర్కొన్నారు. ఇది ఏడాదికి 8 మిలియన్ల ప్యాసింజర్ల సామర్థ్యంతో అందుబాటులోకి రానుందన్నారు. జీఎంఆర్ గ్రూపు ఫిలిప్పిన్స్ మార్కెట్పై కీలక దృష్టి సారించిందన్నారు. తాజా ప్రాజెక్టులో దక్షిణ, తూర్పు ఆసియాలోని మరిన్ని ఎయిర్పోర్టులను సాధించుకోవడానికి, తమను బలోపేతం చేసుకోవడానికి ఇది దోహదం చేస్తుందన్నారు. కాగా మక్టాన్ సెబు ఎయిర్పోర్టు టెర్మినల్ నిర్మాణం తుది దశలో ఉందన్నారు. జూన్ 2018 కల్లా ఇది నిర్వహణలోకి రానుందన్నారు. జీఎంఆర్ గ్రూపు ప్రస్తుతం ఢిల్లీలోని ఇందిరా గాంధీ ఇంటర్నేషనల్ ఎయిర్పోర్టు, హైదరాబాద్లోని రాజీవ్ గాంధీ ఇంటర్నేషనల్ ఎయిర్పోర్టులను నిర్వహిస్తుంది. ఈ మధ్య కాలంలోనే గోవాలోని మోపా గ్రీన్ఫీల్డ్ ఎయిర్పోర్టు అభివృద్ధి బాధ్యతలను దక్కించుకుంది.