Authorization
Mon Jan 19, 2015 06:51 pm
నిన్నటి దాకా మన స్నేహానికి గుర్తుగా
అలాయి బలాయి తీసుకున్న
మాట నిజమే మిత్రమా..!
కానీ నేనిప్పుడు కవచ కుండలాలు
లేని కర్ణుడిలా పోరాడుతున్నాను..
కనిపించని శత్రువేదో
మృత్యుఘోష వినిపిస్తోంది..
నా దేహమిప్పుడో మందు పాతర
రిమోటేమో పిచ్చివాడి చేతిలో రాయిలా..
నన్ను కౌగిలించుకోకు...
నీకూనాకూ మధ్య ఉండాల్సిన ఓదార్పు గాలి
స్మశాన మైదానాల్ని చదును చేస్తోంది...
కలిసి మనం కోరస్లెన్నో
పాడుకున్న పాట కూడా నిజమే...
సరస హృదయ సల్లాపాల ఉల్లాసాలు
కలగన్నదీ నిజమే..!
ఒక మాట చెబుతా..!
వైరస్ సోకని నా అంతరంగ క్వారంటైన్లో
నువ్వు భద్రంగానే ఉన్నావ్...
వెంటిలేటర్పై ఒంటరిగా
ఐసోలేట్ అయిన దేహభాగాల్ని
కలిపికుట్టే ప్రయత్నంలో నేను...
ఆగు మిత్రమా.. ఇప్పుడే నిష్క్రమించకు..!
గుళ్ళో నుండి ప్రమోషన్ మీద బదిలీ అయిన
దేవుళ్ళిప్పుడు నా చుట్టూ ఉన్నారు...
మరిచిపోయిన మనిషి భాషను నేర్పిస్తున్నారు..
మమతలు నిండిన కొత్త రక్తాన్ని ఎక్కిస్తున్నారు..
కలుషితమైన మనస్సుకు పవిత్రతను బోధిస్తున్నారు..
మళ్ళీ తిరిగొస్తాను..
ఈ రహస్య మృత్యుకుహరాన్ని చీల్చుకొని
నెత్తురుకు అత్తరు అద్దుకొని
పలకరింపులో పరిమళాలు నింపుకొని
మళ్ళీ తిరిగొస్తాను...
అందాకా నీకూ నాకూ
అలాయి బలాయి బాకీ..!!
- సంగెవేని రవీంద్ర, 99871 45310