Authorization
Mon Jan 19, 2015 06:51 pm
అవును వారిప్పుడు
ఊరి వైపుకు చేరాలి
చారెడు మెతుకుల కోసం
ఊళ్లను వదిలిపెట్టి
ఊహల పందిరిని విడిచిపెట్టి
సన్నజాజి తీగెల్లాంటి
తల్లిదండ్రులను వదిలి పెట్టి
మాయల మర్రి లాంటి
నగరాలకు వచ్చినందుకు
అవును దీనంగానే కదులుతున్నారు
రోడ్డుపై ఒంటెలు కదులుతున్నట్టు
ఆగి ఆగి వెళుతున్నారు
వాళ్ళను ఆపకండి
గుక్కపట్టిన పిల్లల్లా ఉన్నారు
గొంతు పొలమారినట్టు ఉన్నారు
నిస్తేజంగా నడుస్తున్నారు
నిర్వేదంగా కదులుతున్నారు
వాళ్ళను నిర్బంధించకండి
లాఠీలతో నిరోధించకండి
దయచేసి వారి కడ్డుపడకండి
కఠిన పరీక్షలు పెట్టకండి
దరిద్రపు ఆకలిని జయించ లేక
ఇంతదూరం వచ్చారు కదా
ఇక వారిని ఆపకండి
రోడ్లపై చెమట చుక్కలే నడుస్తున్నట్టు
కదులుతున్న దేహాలు వారివి
బతుకు పోరులో భీతిల్లిపోయారు
బిత్తర బిత్తర అవుతున్నారు
తత్తర తత్తర పడుతున్నారు
ఎర్రటి ఎండల్లో ఎండుటాకుల్లా కదులుతున్నారు
సందిగ్ధ రేఖను భారంగా దాటుతున్నారు
వారి కాళ్లకు లక్ష్మణ రేఖలు గీయకండి
వాళ్ళిపుడు దుఃఖ నదిని దాటుతున్నారు
దేహంలో మిణుకు మిణుకు మంటున్న
ప్రాణదీపాన్ని కాపాడుకుంటూ
కత్తివాదర మీద నడుస్తున్నారు
పరి పరి విధాలుగా శోకిస్తున్న
ఆత్మలు వారివి
కంటిమీద రెప్పవాలితే
అంతు చిక్కని అలజడి
నేటి కరకు కాలం
రేపటి బతుకు తీరం
ఎడతెరిపిలేని ప్రశ్నల వర్షం
ముసురుకుంటున్న కటిక చీకటి
ఐనా వాళ్ళనేమి అనకండి
అడ్డగించకండి
అలిసిపోయిన బహుదూరపు బాటసారులు
వారు దిక్కుల్ని దాటుకుని
శూన్యాన్ని మోసుకుంటూ
నదిలో నాటు పడవల్లా సాగుతున్నారు
ఐనప్పటికీ వాళ్ళు వాళ్ల ఊళ్లను చేరాలి
ఉదయించే సూర్యుణ్ణి చూడాలి
పచ్చని పొలాలను కళ్లతో చూడాలి
కాసింత ధాన్యపు రాశిని
దోసిట్లోకి తీసుకోవాలి
ఆ ధ్వని గుండెల్లో కొత్తగా మోగాలి
చేతుల్లోకి ఒక పచ్చనాకు అందుకోవాలి
ఎండిపోయిన కళ్లకు
కాసింత చెమ్మకావాలి
బతుకు పోరులో అలసిపోయిన
భూమిపుత్రులు వారు
ఇప్పుడు
వారి తలపై భారాన్ని
దింపుకోనివ్వండి.
- సుంకర రమేశ్, 9492180764