Authorization
Mon Jan 19, 2015 06:51 pm
''కల్లాకపటం కాననివాడా..
లోకం పోకడ తెలియని వాడా..
ఏరువాకా సాగారో రన్నో చిన్నన్నా..
నీ కష్టమంతా తీరునురో రన్నో చిన్నన్నా...''
నెర్రెలువారిన నేల ఆకాశానికేసి మౌనంగా ఎదురుచూసిన క్షణాన పలకరించే 'తొలకరి' ఆనందాన్ని నింపుతుంది. మొలకకు నడకలు నేర్పుతుంది. ఒక్కసారిగా చల్లని పిల్ల తెమ్మెరలు వీచి ఆహ్లాదాన్ని వెంట తీసుకొస్తాయి. మబ్బుల వెనుక దాగి దోబూచులాడే ఆశల చినుకు అన్నదాతల మోములో చిద్విలాసాన్ని చిందిస్తుంది. ఆ చిరునవ్వుల తొలకరి జల్లుల్లో.. 'సిరి'మల్లెల సువాసనలతో అన్నదాత హృదయం పరవశిస్తుంది. ప్రకృతి పులకరిస్తుంది. నాట్య మయూరంలా ఎగిరి గంతులేస్తుంది.
తొలకరి జల్లు పలుకరిస్తే కొండంత భరోసా. జీవితానికో నమ్మకం. రుతువుల మార్పులే కాదు.. పల్లెపల్లెనా కళాకాంతులు ప్రతిబింబించే ప్రక్రియ. ప్రకృతి కాంత పచ్చ చీరకు ముత్యాలు అద్దినట్టు.. తొలకరి జల్లు చిరుస్పర్శ రైతన్న హృదయంపై పన్నీటి జల్లులా.. సప్తవర్ణాల ఇంద్ర ధనస్సులా.. వేసవి తాపంతో అల్లాడిపోయే ప్రాణికి పూలజల్లులా ఓలలాడిస్తుంది. వేసారిపోతున్న వేళ.. ఆశలు అడుగంటుతున్న జీవితాలను తొలకరి తట్టిలేపుతుంది. కాంతి సవ్వడుల కలయిక ఈ వాన! తొలకరి పలకరిస్తే మొత్తం వాతావరణమే మారిపోతుంది. జలదృశ్యాలు కనువిందు చేస్తాయి. నదులు, ప్రాజెక్టులు, చెరువులూ వాగులూ వంకలూ పరవళ్లు తొక్కుతాయి. జలపుష్పాలు దుముకుతాయి. నీటిబొట్టు తాకిన ప్రతిచోటా పచ్చదనాన్ని మొలకెత్తిస్తుంది. వేసవి చివరిదాకా మోడువారిన చెట్టు కూడా చినుకును ముద్దాడి కొత్త చివుళ్లు తొడుగుతుంది.
'చిటపట చినుకులు పడుతూ ఉంటే.. చెలికాడే చెంతన ఉంటే.. చెప్పలేని ఆ హాయి ఎంతో వెచ్చగ ఉంటుందోయి' అనే భావన ఎప్పటికీ మధురమే. తొలకరి అంటేనే మట్టికి పులకరింత. నైరుతీ రుతుపవనాల రాకతో వచ్చే తొలిజల్లు. వర్షరుతువుకు ప్రారంభ సూచిక. అప్పటిదాకా బీడువారిన పొలాలు తొలకరి వర్షంతోనే పరవశిస్తాయి. ఆ తడికి పదునుబారిన నేలల్లో రైతన్న ఉత్సాహం ఉరకలు వేస్తుంది. ఈ ప్రక్రియలో కష్టనష్టాలకోర్చిన గతాన్ని మరిచి.. ఈయేడు తన ఇంట సిరుల ధాన్యం పండాలని రైతు నిండు మనసుతో కోరుకుంటాడు. కోటి ఆశలతో ఏరువాకకు శ్రీకారం చుడతారు. దుక్కులు, దమ్ములు, నాట్లు, కలుపు తీయడం వంటి ఉమ్మడిగా సాగే పనుల్లో వ్యవసాయ కార్మికులూ కర్షకులూ చేయిచేయీ కలిపి 'ఏరువాకా సాగారో..' అంటూ పదం పదం కూర్చుతూ గళం కలుపుతారు. ఇంటిల్లిపాదీ కూడా ఆరునెలల పాటు శ్రమించి పంటలను కంటికి రెప్పలా కాపాడుకుంటారు. నారుమళ్ల నుంచి కల్లాలు పూర్తిచేసేదాకా సాగే ప్రక్రియలో రైతు జీవితం ప్రతిబింబిస్తుంది. శ్రమైక జీవనం ఉట్టిపడుతుంది. తానున్నానంటూ ఎదిగే పైరు అన్నదాతకు కడదాకా హామీనిస్తుంది. అండగా నిలుస్తుంది. అందుకే మల్లెల వాసన కన్నా.. గులాబీ పరిమళాలకన్నా.. నా మట్టి వాసనలు మిన్నా..! అంటారో కవి. పుడమి ప్రాధాన్యత అటువంటిది మరి! మట్టివాసనతో మనిషి మనుగడ కూడా ముడిపడి ఉన్నది. ఆ తొలకరి నిజంగా అద్భుతమే..!
నాగరికత ఎంత ముందుకు సాగినా నాగలి పట్టనిదే సమాజ పురోగతి సాధ్యం కాదు. రైతు లేనిదే రాజ్యం లేదు. ఇదంతా నాణేనికి ఒకవైపు! పరిస్థితి క్రమంగా మారుతున్నది. అరకలు దున్నిన మట్టివాసన భవిష్యత్ తరానికి అందే స్థితి క్షీణిస్తున్నది. రూపాయి వాసనలు తప్ప పుడమి పులకింతలు రాబోయే తరాలకు కనిపించకుండా పోతున్నాయి. వ్యవసాయ రంగంలోకి మిషన్లు, పెద్దపెద్ద యంత్రాలు వచ్చి పడ్డాయి. పదుగురు చేసిన పనిని గంటల్లో ముగిస్తూ కూలీలకు కళ్లెం వేస్తున్నాయి. మడుల్లో దిగి మట్టిలో నడుం వంచాల్సిన రైతు యంత్రాలను చూస్తూ ఒడ్డుపై ఒంటరిగా మిగిలిపోతున్నాడు. తల్లిపొత్తిళ్ల నుంచి బిడ్డను దూరం చేసినట్టు.. బలవంతంగా భూములు లాక్కొని 'పుడమి' సాగుకూ దూరం చేసే సంస్కృతి రోజురోజుకూ చేరువవుతున్నది. పదీ పరకా రైతుకు ముట్టజెప్పి కోట్లకుకోట్లు పడగలెత్తే 'రియల్' వ్యాపారం శరవేగంగా ఆవహిస్తున్నది. రియల్టర్ల చేతుల్లో సాగుభూములు చిక్కి విలవిల్లాడిపోతున్నాయి. నేల తల్లి చిన్నబోతున్నది. ఇల్లాలిని వెంటబెట్టుకుని.. చద్దన్నం మూటగట్టుకుని ముచ్చట్లతో పొలానికి చేరే కుటుంబాలు రోజు కూలీలుగా దర్శనమిచ్చే రోజులు దాపురించాయి. పదిమందికి అన్నం పెట్టే చేతులే ఈరోజు పని కోసం అర్థించే అగత్యం ఆవరించింది. గంపనెత్తుకుని పొలాలకు నడిచే కాళ్లు ఉపాధి కోసం పట్నంబాట పడుతున్నాయి. కంపెనీలకు వేలాది ఎకరాలను ధారాదత్తం చేస్తున్న పాలకులు 'అభివృద్ధి' పేరుతో పచ్చని పొలాలను కనుమరుగు చేస్తున్నారు. పురోగతి పేరిట ఎన్ని రంగులు, ఎన్ని హంగులు దిద్దినా పచ్చటి పంట పొలాల ముందు దిగదుడుపే. అందుకే తొలకరి ఒక పరవశం. ఒక పులకింత. పుడమి నుదుట దిద్దిన సింధూరం. తొలకరి వర్షం హర్షాతిరేకం. ఈయేడు హాయిగా.. జల'సిరి' పచ్చని సాగుగా సాగిపోవాలనీ...!