Authorization
Mon Jan 19, 2015 06:51 pm
ఉదయాన్నే నిద్ర లేచీ లేవగానే చేతిలోకి ఫోన్ తీసుకొని వాట్సప్ మెసేజ్లు చదవడం అలవాటా? రాత్రి పడుకునే ముందు కూడా స్మార్ట్ ఫోన్ చేతిలో ఉండాల్సిందేనా..? యువతరంలో ఎక్కువ మంది ఎదుర్కొంటున్న సమస్య ఇదే. ఇంకేం లేకున్నా బతికేస్తాం కానీ.. స్మార్ట్ ఫోన్ లేకుంటే, వాట్సప్ చూడకుంటే బతకలేం అనే స్థితికి వచ్చేశాం. ఈ స్మార్ట్ ప్రతి ఒక్కళ్ళను కట్టి పడేస్తున్నది.
రోజులో సగటున 200 సార్లు స్మార్ట్ ఫోన్ను చూస్తున్నామట. అంటే ప్రతి ఆరున్నర నిమిషాలకు ఓసారైనా ఫోన్ చూడాల్సిందేనన్న మాట. 73 శాతం మంది బ్రిటిషర్లయితే రోజులో కనీసం ఒక్కసారైనా ఫోన్ లేదా కంప్యూటర్ చూడకుండా ఉండలేకపోతున్నారు. మన యువతది కూడా దాదాపు అదే పరిస్థితి. నలుగురిలో ఒకరైతే నిద్రపోయే సమయం కంటే ఎక్కువగా ఆన్లైన్లోనే గడుపుతున్నారు. దీన్ని బట్టే స్మార్ట్ ఫోన్కు మనం ఎంతగా బానిసలమయ్యామో అర్థం చేసుకోవచ్చు. 16 నుంచి 24 ఏండ్ల మధ్య వయసున్న వారిలో 70 శాతం మంది మాట్లాడం కంటే చాటింగ్ చేసుకోవడానికే ఎక్కువ ప్రాధాన్యం ఇస్తున్నారట. సగటున ఒక్కో టీనేజర్ బెడ్ మీది నుంచే నెలలో 3400 ఎలక్ట్రానిక్ మెసేజ్లను పంపిస్తున్నారట.
దీని వల్ల కలిగే నష్టం ఏమిటంటారా?
- పదే పదే వాట్సప్ మెసేజ్లను చెక్ చేయడం కోసం ఫోన్ చూడటం వల్ల ఏకాగ్రత దెబ్బతింటుంది.
- క్లాస్లో లెక్చరర్ చెప్పింది బుర్రకు ఎక్కదు. ఎదుటి వ్యక్తి చెప్పింది శ్రద్ధగా వినలేం.
- తను ఆన్లైన్లోనే ఉన్నాడు, కానీ రిప్లరు ఇవ్వట్లేదు, అంటే నన్ను పట్టించుకోవడం లేదనే తొందరపాటు అభిప్రాయాలకు వచ్చేస్తారు. దీని వల్ల అనుబంధాలు దెబ్బతింటాయి.
- వాట్సప్లో మీరేం చేయనక్కర్లేదు ఒక్కసారి స్టేటస్ పెట్టి చూడండి. మీ స్టేటస్ చూసినవారు ఎవరెలా రిప్లరు ఇస్తున్నారో మీకే తెలుస్తుంది. ఏ మాత్రం తేడాగా స్టేటస్ పెట్టినా ఇక అంతే సంగతులు. మీ మానసిక ఆందోళన అంతా ఇంతీ కాదు.
- వాట్సప్లో షార్ట్కట్లో మెసేజీలు పెట్టడం అలవాటవుతుంది. దీని వల్ల అర్థం పర్థంలేని భాషలో ఎగ్జామ్స్ రాసే ప్రమాదం కూడా ఉంది. పరీక్షలో రాసే పదాల్లోనూ షార్ట్ కట్స్ వాడితే మనకు మార్కులు తగ్గడమే కాదు, పేపర్లు దిద్దేవారు బుర్రలు పీక్కో వాల్సిన పరిస్థితి తలెత్తుతుంది.
దీని నుంచి బయటపడేదెలా..
- తినేటప్పుడు, బయటకు వెళ్లినప్పుడు ఫోన్ చూడటం మానేయండి. ఇలా చేయడం వల్ల మెల్లగా ఫోన్కు దూరమయ్యే ఛాన్స్ ఉంది.
- మీటింగ్లో ఉన్నప్పుడు, కుటుంబ సభ్యులతో కలిసి భోజనం చేస్తున్నప్పుడు ఫోన్లను ఒక దగ్గర పెట్టేయండి. ఎవరైతే ముందు ఫోన్ను పట్టుకుంటారో వారు అందరికీ టీ పెట్టాలని లేదా గిన్నెలు కడగాలని కండీషన్ పెట్టండి.
- పడక గదిలో ఫోన్ వాడకం ఆపేయండి. వెలుతురు లేమి వల్ల మెలటోనిన్ హార్మోన్ ఉత్పత్తి తగ్గుతుంది. నిద్ర సరిగా పట్టాలంటే మెలటోనిన్ సరిగా ఉత్పత్తి కావాల్సిందే. కాబట్టి నిద్రకు ఉపక్రమించే ముందు ఫోన్ను దగ్గరకు రానీయొద్దు.
- డ్రైవింగ్ చేస్తున్నప్పుడు ఫోన్ను దూరం పెట్టేయండి. డ్రైవింగ్ చేస్తూ ఫోన్ మాట్లాడడం ఎంతో ప్రమాదం. జాగ్రత్తగా ఉండకపోతే ఊహించని ప్రమాదాల బారిన పడే ఛాన్స్ ఉంది.
- వారంలో ఒకరోజు డిజిటల్ తెరకు దూరంగా ఉండేలా హాలీడే తీసుకోండి. సోషల్ మీడియా, ఆఫీసు ఈ మెయిల్స్, మెసేజ్ను పట్టించుకోకుండా ఆ ఒక్క రోజైనా ఉండేందుకు ప్రయత్నించండి. ఇలా చేయలేకపోతే.. సాధ్యమైనంత వరకు బ్రేక్ తీసుకోవడానికే ప్రయత్నించండి.
- రాత్రి పూట సరిపడా నిద్ర పోయేలా జాగ్రత్త పడండి. నిద్ర పోవడానికి రెండు గంటల ముందే స్క్రీన్లకు దూరంగా ఉండండి.
- మీలాగే వాట్సప్, ఆన్లైన్కి బానిసలైన వారితో కలిసి మీ ఆలోచనల్ని పంచుకోండి. ఇద్దరూ కలిసి ఆ అలవాటు నుంచి బయటపడటానికి ప్రయత్నించండి. మెసేజ్లు చేసే బదులు నేరుగా కలిసి గడపండి.