Authorization
Mon Jan 19, 2015 06:51 pm
నేటి ఆధునిక సమాజంలో ప్రేమలు, పెండిండ్లు ఎక్కువ కాలం నిలబడటం లేదు. మనుషుల మధ్య అనుబంధాలు తగ్గడం, ఓపిక తగ్గిపోతుండటం వంటి కారణాలతో ఏ బంధానైన్నా తెంచుకోవడానికే నేటితరం ముందడుగు వేస్తోంది. అయితే బ్రేకప్ తర్వాత జరిగిన దాన్ని తలుచుకుని చాలామంది డిప్రెషన్లోకి వెళ్లిపోయి మద్యానికి, డ్రగ్స్కు బానిసలుగా మారుతున్నారు. కొంతమంది ప్రాణాలు తీసుకోవడానికి కూడా వెనుకాడటం లేదు. బ్రేకప్ డిప్రెషన్ నుంచి బయటపడటం కష్టమే అయినా కొన్నింటిని పాటించడం ద్వారా సులువుగా బయటపడొచ్చు.
మనసులో బాధను అలాగే పెట్టేసుకుంటే పెరుగుతుందే తప్ప తగ్గదు. అందుకే ఆత్మీయులు, స్నేహితులతో దాన్ని పంచుకుంటే వారిచ్చే ఓదార్పు మీకు చాలా స్వాంతన కలిగిస్తుంది. మీ సన్నిహితులతో ఎక్కువ సమయం గడిపేందుకు ప్రయత్నించండి.
మీ మనసులో కలిగే ఆలోచనలను ఎప్పటికప్పుడు పేపర్పై రాసుకోండి. ఈ భావాలను సోషల్మీడియాలో మాత్రం అస్సలు పంచుకోవద్దు. దీనివల్ల కీడే తప్ప మేలు ఉండదు. ఆ సమయంలో సామాజిక మాధ్యమాలకు వీలైనంత దూరంగా ఉండటం మంచింది. మరీ ముఖ్యంగా మీ ఎక్స్ను పదేపదే గుర్తుచేసుకుని విమర్శించొద్దు.
మనసులో కొండంత భారం ఉన్నప్పుడు దాన్ని ఎవరికి చెప్పుకున్నా పూర్తిస్థాయిలో భారం దిగదు. అలాంటప్పుడు తనివితీరా ఏడ్చేయండి. దీనివల్ల భారం దిగిపోతుంది. పాత భాగస్వామిని వీలైనంత త్వరగా మరిచిపోయేందుకు ప్రయత్నించండి.
పాత రిలేషన్ను మరిచిపోవాలంటే వెంటనే కొత్తవారిలో రిలేషన్ మొదలుపెట్టమని చాలామంది సలహాలు ఇస్తుంటారు. అలాంటి చెత్త సలహాలు పట్టించుకోవద్దు. తనతోనే జీవితం అనుకున్న వ్యక్తి కారణంగా కలిగే బాధను మరిచిపోవడం ఎవరికీ అంత సులువైన పని కాదు. ఒకవేళ మీరు వారి సలహాలు పాటించి కొత్త రిలేషన్ ప్రారంభించినా.. అక్కడ కూడా బ్రేకప్ వస్తే ఇక మీరు జీవితంలో కోలుకోలేరు. అందుకే కొత్త రిలేషన్ స్టార్ట్ చేయడం కంటే ముందు మీ పాత భాగస్వామిని జీవితం నుంచి పూర్తిగా తీసేందుకు ప్రయత్నించండి.
పాత విషయాల నుంచి బయటపడేందుకు ఏదొక వ్యాపకం మొదలుపెట్టండి. వ్యాయామం, గార్డెనింట్, పుస్తకాలు చదవడం లాంటివి అలవాటు చేసుకోంది. కొద్దిరోజులు ఎక్కడికైనా టూర్లకు వెళ్లిరండి. దీనివల్ల పాత జ్ఞాపకాల నుంచి పూర్తిగా బయటపడే అవకాశం ఉంటుంది.
జరిగిపోయిన దాని గురించి పదేపదే ఆలోచించొద్దు. నాకే ఎందుకిలా జరిగింది, అలా జరగకపోయి ఉంటే బాగుండేది అంటూ ఆవేదన చెందొద్దు. జరిగినదంతా మన మంచికే అన్న ధోరణి అలవాటు చేసుకుంటే జీవితంలో ఎదురయ్యే ఎదురుదెబ్బలను సులభంగా తట్టుకోవచ్చు.
శరీరానికే కాదు, మనసుకు తగిలిన గాయాలను నయంచేసే శక్తి కాలానికి ఉంటుంది. మనకు బాగా బాధ కలిగించే విషయాలు కాలంతో పాటు కనుమరుగైపోతుంటాయి. మనకు బాధ కలిగించే చాలా విషయాలను కాలంతో పాటు మరిచిపోతుంటాం. అందువల్ల మీ జీవితంలో ఎదురయ్యే ఆటుపోట్లకు భయపడిపోకుండా పాత జీవితం గురించి మరిచిపోయి కొత్త జీవితానికి పునాది వేసుకోండి.