ప్రధాన వాణిజ్య పంటలైన చెరకు, పత్తి తర్వాత గోగు కూడా అతి ముఖ్యమైనదే. గోగును నార కొరకే కాకుండా ఇతర పరిశ్రమల్లో కూడా ఉపయోగిస్తారు. గోగు మొక్కల నుండి తీసిన గుజ్జు వార్తా పత్రికల ముద్రణకు అవసరమయ్యే కాగితాన్ని తయారు చేయడానికి ఉపయోగిస్తారు. గోగు పువ్వుల పత్ర దళాలు (కేలిక్స్) సహజ రంగుల తయారీలోనూ వినియోగించబడుతున్నాయి. గోగు విత్తనాల నుండి తీసిన నూనెను సబ్బుల పరిశ్రమల్లో ఉపయోగిస్తున్నారు. గోగునారను ఎక్కువగా జనపనారతో కలిపి తివాచీలు, సంచులు, గోనె సంచులు, పురి, ప్యాకింగ్క్లాత్, సీలింగ్కు పనికొచ్చే కార్డుబోర్డులు, గృహాలంకరణ వస్తువుల తయారీలో ఉపయోగిస్తున్నారు. ఇన్ని రకాల ఉపయోగాలున్న గోగు పంట గురించి మరిన్ని వివరాలు ఈ వారం కిసాన్లో...
గోగును అన్ని నేలల్లో సాగు చేయవచ్చు. తేలిక రకపు గరపనేలలు, ఎర్రనేలలు, మురుగు నీరు పోయే వసతి గల నేలలు అనుకూలం. ఆమ్ల భూములకు భూసార పరీక్షననుసరించి ఎకరానికి 1 టన్ను వరకు సున్నం వేయాలి.
విత్తన మోతాదు-విత్తన శుద్ధి: నార గోగు (హైభిస్కస్ సబ్డరిఫా) ఎకరానికి 5కిలోలు, కూర గోగు (హైబిస్కస్ కెన్నాభినస్) ఎకరానికి 6 కిలోలు. కిలో విత్తనానికి 5 గ్రాముల ఇమిడాక్లోప్రిడ్ లేదా 4 గ్రాముల థయోమిథాక్సిమ్ను తరువాత మెటలాక్సిల్ ఎంజెడ్ 2 గ్రాములు లేదా మెటలాక్సిల్ 3 గ్రాములు లేదా 3 గ్రాముల మాంకోజెబ్ మందును కలిపి విత్తనశుద్ధి చేస్తే పంట తొలిదశలో ఆశించు రసం పీల్చు పురుగులను విత్తన, భూమి ద్వారా సంక్రమించు ఇనుప తెగులును నివారించవచ్చు.
విత్తే కాలం: మే మొదటి పక్షం నుంచి జూన్ మొదటి పక్షం వరకు విత్తుకుంటే అధిక నార దిగుబడి వస్తుంది. రబీలో నీటి వనరులు గల మాగాణి భూముల్లో వరికోసిన తర్వాత రెండో పంటగా వేస్తారు.
విత్తడం: సాంప్రదాయంగా వెదజల్లే పద్ధతిలో సాగు చేస్తారు. వరుసల్లో వేసినట్టయితే గొర్రుతో 30×10 సెం.మీ దూరంతో విత్తాలి. వెదజల్లుట పద్ధతికన్నా వరుసలలో వేయడం చాలా ఉత్తమం. గోగులో మిశ్రమ పంటగా 4 కిలోల మినుము విత్తనం కలిపి వెదజల్లవచ్చు.
నీటి యాజమాన్యం: నారగోగును వర్షాధారంగా పండిస్తారు.
ఎరువులు: ఎకరానికి 5 టన్నుల పశువుల ఎరువు వేసుకోవాలి. ఆమ్ల భూములకు భూసార పరీక్షననుసరించి ఎకరానికి 1 టన్ను వరకు సున్నం విత్తనం వేసేందుకు పక్షం రోజులు ముందుగా వేసికలియదున్నాలి. ఆఖరి దుక్కిలో 18 కిలోల యూరియా, 50 కిలోల సింగిల్ సూపర్ ఫాస్ఫేట్, 13.5 కిలోల మ్యూరేట్ ఆఫ్ పొటాష్ వేయాలి.పైపాటుగా మరో 16కిలోల యూరియాను విత్తిన మూడు వారాలకు మొదటి గొప్పులో వేయాలి. పైపాటుగా వేయలేని పక్షంలో, నీటి ఎద్దడి పరిస్థితిలో లీటరు నీటికి 2శాతం యూరియాను, 1శాతం మ్యూరేట్ ఆఫ పొటాష్ను కలిపి విత్తన 40నుండి 60 రోజులలో వారం రోజుల వ్యవధిలో రెండుసార్లు ఆకులు తడిసేటట్టు ఎకరానికి 200 లీటర్ల ద్రావణాన్ని పిచికారి చేయాలి.
గోగు ఆధారిత పంట సరళి: ఎక్కువగా లాభాలు పొందేందుకు గోగులో 4కిలోల మినుము విత్తనాన్ని కలిపి మిశ్రమ పంటగా వేసుకోవడం లేదా గోగుతో అంతర పంటగా మినుము లేక పెసర రెండు వరుసల పద్ధతిలో వేసుకోవడం లేదా తేలికపాటి భూములలో గోగు తరువాత ఉలవ వేసుకోవడం లేదా మధ్యస్థ భూములలో గోగు తరువాత వేరుశనగ లేక రాగి పంటలు వేసుకోవడం వల్ల ఎక్కువ ఆదాయం పొందవచ్చు.
అంతరకృషి: విత్తిన 3 నుండి 5 వారాలకు గొప్పు, కలుపు తీయడం చేయాలి. వరుసలలో వేసిన పంటలో విత్తిన 20నుండి 25 రోజులలో గొర్రుతో అంతరకృషి చేయాలి. కలుపు తీవ్రతను బట్టి విత్తిన 7 వారాలలోపు రెండోసారి గొప్పు తవ్వాలి. సకాలంలో అంతరకృషి చేయకపోతే నార దిగుబడి దాదాపు 30శాతం తగ్గుతుంది. మొదటి గొప్పు బదులుగ, కలుపు నివారణ మందు ప్లూకోరాలిన్ 45శాతం ఎకరాకు 800 మి.లీ లీటర్లు లేదా పెండిమిధౄలిన్ 30శౄతం ఎకరాకు 1 నుండి 1.3 లీటర్ల చొప్పున విత్తిన వెంటనేగానీ మరుసటిరోజుగానీ పిచికారి చేసి కలుపును సమర్ధవంతంగా నివారించవచ్చు.
రకాలు-పంట కాలం, దిగుబడి- గుణగణాలు, (నారగోగు-హైభిస్కస్ సబ్డరిఫా):
1. ఎ.ఎమ్వి-1 రకం 165 రోజుల్లో పంట చేతికొస్తుంది ఎకరానికి 6క్వింటాళ్ల దిగుబడినిస్తుంది. పురుగులు, తెగుళ్లను తట్టుకునే శక్తిలేదు.
2. ఎ.ఎమ్.వి-2, 165 రోజులు, 6నుంచి 7 క్వింటాళ్లు, పురుగులు, తెగుళ్లను తట్టుకునే శక్తి ఉండదు.
3. ఎ.ఎమ్.వి-3, 150 రోజులు, 7.5క్వింటాళ్లు, అన్ని ప్రాంతాలకు అనువైనది. నీటి ఎద్దడిని,ఇనుప తెగులును తట్టుకుంటుంది.
4.ఎ.ఎమ్.4(కళింగ), 150 రోజులు, 8 క్వింటాళ్లు, నీటి ఎద్దడిని తట్టుకుంటుంది. వర్షాధార పంటగా అనుకూలమైనది. పురుగులు, తెగుళ్లను ఓ మోస్తరుగా తట్టుకుంటుంది.
5. ఎ.ఎమ్.వి-5 (దుర్గ), 135 నుంచి 140 రోజులు, 10 క్వింటాళ్ల దిగుబడి. అధిక నార దిగుబడి ఇచ్చే రకం. పురుగులు, తెగుళ్లను ఓ మోస్తరుగా తట్టుకుంటుంది.
6. ఎ.ఎమ్.వి-7(జనార్ధన్) 130 నుంచి 135 రోజులు, 12 క్వింటాళ్ల దిగుబడి వస్తుంది.
కూరగోగు (హైభిస్కస్ కెన్నాభినస్)
భీమిలి-7(ఎఎమ్సి108) 120 నుంచి 130 రోజులు, 5 క్వింటాళ్ల దిగుబడి వస్తుంది. నార నాణ్యత కలిగి అలంకార వస్తువుల తయారీకి అనువైన రకం.
పంట కోత: నార గోగును 50శాతం పూత దశలోను, కూరగోగు రకాలను చిన్న పిందె ఏర్పడే దశలలోను కోయడం మంచిది. గోగు కర్రలను వేర్లతో సహాపీకడం కన్నా నేల మట్టానికి కోయడం మంచిది. దీనివల్ల కర్ర త్వరగా ఊరి నాణ్యమైన నార వస్తుంది. కోసిన కర్రలను నేలమీద వేసి 2,3 రోజుల తర్వాత చిన్నచిన్న కట్టలుగా కట్టి ఊరవేతకు సిద్ధం చేసుకోవాలి.
పంట కోత తర్వాత నష్టాలు:
నీటి కొరత వల్ల పంట కోతకు ఊరవేయడానికి మధ్య కాల వ్యవధి ఉన్నట్టయితే కర్రను చెదలు నష్టపరుస్తాయి. ఆ పరిస్థితుల్లో చెదలును నివారించడానికి కర్రలపై కార్బరిల్ పొడిని చల్లాలి. లేదా కోలరిఫైరిఫాస్ 2 మి.లీ లీటరు నీటికి కలిపి మొదళ్లపై పిచికారి చేయాలి.
గోగు ఊరవేయడం, నార తీత: గోగు కర్ర ఊరినార తీసేందుకు సాధారణంగా 3 వారాలు పడుతుంది. ఊరేందుకు పట్టే సమయం, నీటి ఉష్ణోగ్రత, నీటి ఉదజని సూచిక, ఊరుటకు అవసరమయ్యే సూక్ష్మజీవులు, నీటిలో అమ్లజని, గోగు కర్రల పరిపక్వత మొదలగు అంశాలపై ఆధారపడుతుంది.
ఆధునిక పద్ధతులలో గోగునార తీసే విధానం: ఈ విధానాలలో అతి తొందరగా ఊరడానికి కావాల్సిన సూక్ష్మజీవుల సముదాయాన్ని ఉపయోగించుట వల్ల నార ఊరు కాలం చాలా వరకు తగ్గడమే కాకుండా, కావాల్సిన నీటి పరిమాణం తగ్గుతుంది. ఈ విధానాలను ఆనుసరించడం వల్ల వాతావరణ కాలుష్యం బాగా తగ్గి నాణ్యమైన నారు లభించే ఎక్కువ ధర పలుకుతుంది.
గోగుతో అదనపు విలువలు గల ఉత్పత్తులు: పురి, గోనె సంచులు, తివాచీలు, కాగితపు ప్లేట్లు, గ్లాసులు, ప్యాకింగ్, సామాగ్రి, గోంగురతో పచ్చళ్లు, చెట్నీలు, రక్షక పత్రాల నుండి సహజ రంగులు, స్వ్కాష్లు, గృహాలంకరణ వస్తువుల, న్యూస్ ప్రింట్లు, డ్రాయింగ్పేపర్, సీలింగ్కు పనికొచ్చే కార్డుబోర్డులు, పాదరక్షలు, టేబుల్మేట్స్, డోర్మేట్స్, హాండ్బ్యాగ్స్, విత్తనం నుండి తీసిన నూనెను సబ్బుల పరిశ్రమలలోనూ చెక్కపిండి, పశువుల దాణాగాను ఉపయోగపడుతుంది. గోగు కర్రలు వంట చెరకుగా ఉపయోగపడుతుంది.
Authorization