Authorization
Mon Jan 19, 2015 06:51 pm
చాలామందికి తరచుగా తలనొప్పి వస్తుంటుంది. విపరీతమైన నొప్పి కారణంగా పని మీద ఏకాగ్రత కూడా నిలవదు. నొప్పి తగ్గడానికి మందులు వాడదామంటే.. ఎలాంటి చెడు ప్రభావాలు వస్తాయేమోనని భయం. కొందరు తలనొప్పి బారి నుంచి తప్పించుకోవడం కోసం టీ, కాఫీలను ఆశ్రయిస్తుంటారు. పదే పదే వీటిని తీసుకోవడం వల్ల కెఫిన్ ప్రభావంతో నిద్రకు దూరమయ్యే అవకాశాలున్నాయి. అయితే తీవ్ర ఇబ్బందికి గురి చేసే తలనొప్పికి వంటింట్లోనే పరిష్కారాలున్నాయి. అవేంటో చూద్దాం..
- అల్లం తలలోని రక్తనాళాల్లో ఉండే మంటను తగ్గించి రిలీఫ్ ఇస్తుంది. తలనొప్పి నుంచి ఉపశమనం కోరుకునే వారు అల్లం తీసుకోవడం వల్ల ఫలితం ఉంటుంది. అల్లం రసం, నిమ్మరసాన్ని సమపాళ్లలో కలిపి రోజూ రెండుసార్లు తీసుకోవడం వల్ల తలనొప్పి నుంచి బయటపడొచ్చు. పచ్చి అల్లాన్ని నీటిలో వేసి ఉడికించి ఆవిరిని పీల్చడం ద్వారా కూడా తలనొప్పి నుంచి ఉపశమనం లభిస్తుంది.
- తలనొప్పిని పారదోలడంలో దాల్చిన చెక్క ఎంతగానో తోడ్పడుతుంది. దాల్చిన చెక్కను మెత్తగా దంచి పొడి చేసుకోవాలి. దానికి నీరు కలిపి పేస్టులా చేయాలి. దీన్ని నుదురుపై రాసి అరగంట ఆగాక గోరు వెచ్చని నీటితో కడిగేసుకోవడం వల్ల ఫలితం ఉంటుంది.
- లవంగాల ద్వారా సహజంగా తలనొప్పిని తగ్గించవచ్చు. వీటిలో ఉండే చల్లని, నొప్పి నివారణ గుణాలు తలనొప్పిని దూరం చేస్తాయి. కొన్ని లవంగాలను నలిపి వాటిని కర్చీఫ్లో ఉంచాలి. ఆ వాసనను పీల్చడం ద్వారా కాసేపటికి నొప్పి తగ్గి రిలీఫ్గా ఫీలవుతారు.