Authorization
Mon Jan 19, 2015 06:51 pm
కొత్త బాధ్యతలను తీసుకోవడంలో మహిళలు ఎప్పుడూ ముంద. వృత్తిపరంగానూ, వ్యక్తిగతంగానూ తమదైన ముద్ర వేస్తారు. ఆర్థిక స్వేచ్ఛ విషయంలో మాత్రం కొన్ని ఒత్తిళ్లను ఎదుర్కొంటున్నారు. దీన్ని అధిగమించడం ఎలా? అనుకోని పరిస్థితులు ఎదురైనప్పుడు వాటిని తట్టుకునేందుకు ఎలా సిద్ధం అవ్వాలి?
మహిళలు చాలామంది సరైన ఆర్థిక ప్రణాళిక వేసుకోవాలనే విషయాన్ని విస్మరిస్తుంటారు. ఆర్జిస్తున్న వారైనా.. ఇంటిని చక్కదిద్దుతున్న గృహిణులైనా.. ముందుగా తమకంటూ ఒక ఆర్థిక లక్ష్యాన్ని నిర్దేశించుకోవాలి. ముఖ్యంగా ఒంటరిగా ఉండే మహిళల విషయంలో ఇది తప్పనిసరి. మీకు ఆర్థికంగా ఏమేమి కావాలో తెలుసుకోవాలి. పిల్లల చదువులు, పదవీ విరమణ ప్రణాళిక.. భవిష్యత్తులో అనుకోని సంఘటనలతో ఎదురయ్యే ఆర్థిక సవాళ్లు.. ఇవన్నీ ఆలోచించుకోవాలి. ఉమ్మడి ఆర్థిక ప్రణాళిక వేరు, సొంతంగా ప్రణాళిక వేరు అనేది గుర్తు పెట్టుకోండి. ఇప్పటి ఖర్చుతోపాటు.. భవిష్యత్తులో అయ్యే ఖర్చును కూడా లెక్కలోకి తీసుకోండి. ఈ లెక్కలన్నీ వేసుకొని, దాన్ని అందుకునేలా పెట్టుబడులు పెట్టాలి.
ఏదైనా పెట్టుబడి పథకాన్ని ఎంచుకునేప్పుడు నిపుణుల సలహాలు తీసుకోవడం మంచిదే. అయితే, సొంతంగా పరిశోధన చేయడం మాత్రం తప్పనిసరి. ప్రస్తుతం ఏ పథకం గురించైనా ఇంటర్నెట్, పుస్తకాలు, పత్రికల్లో కావాల్సినంత సమాచారం అందుబాటులో ఉంటోంది. ఈ సమాచారాన్ని ఉపయోగించుకొని, ఒక పథకం మంచి చెడులను సులభంగా విశ్లేషించుకోవచ్చు. వీటి సాయంతో మీరు సొంతంగా ఒక నిర్ణయం తీసుకొని మంచి పాలసీని ఎంపిక చేసుకోవచ్చు. అవసరమైతే మీ నిర్ణయాన్ని సమీక్షించుకునేందుకు వ్యక్తిగత ఆర్థిక నిపుణుల సలహాలు తీసుకోవచ్చు.
ఆర్థిక పరిస్థితి అందరిదీ ఒకేలా ఉండదు. కాబట్టి, ఆర్థిక ప్రణాళికల విషయంలోనూ అన్నీ ఒకేలా చూడటం సాధ్యం కాదు. ఒకరికి నప్పేవి.. మరొకరికి సరిపోకపోవచ్చు. కాబట్టి, ఎవరికి వారు సొంతంగా ప్రణాళిక వేసుకోవాలి. నష్టభయం భరించే శక్తి, ఆర్థిక లక్ష్యాలు, అవసరాలు ఇవే పెట్టుబడి పథకాలను నిర్ణయిస్తాయి. అందువల్ల అనుసరించడం కాకుండా.. ఆలోచించి, పరిశోధించి పెట్టుబడి పథకాలను నిర్ణయించుకోవాలి. ఒక పెట్టుబడి పథకాన్ని ఎంచు కోగానే.. దాని నుంచి రాబడులను ఆశించడం సరికాదు. ఏ పథకమైనా రాబడిని వ్వాలంటే.. దానికి కొంత వ్యవధినివ్వాలి. దీర్ఘకాలిక పెట్టుబడి పథకం నుంచి స్వల్పకాలంలోనే ఫలితాలు ఆశించడం వల్ల ఫలితం ఉండదు. మార్కెట్లో బీమా పాలసీలు, మ్యూచువల్ ఫండ్లు, ఫిక్స్డ్ డిపాజిట్లు, పీపీఎఫ్లాంటి అనేక పథకాలు అందుబాటులో ఉన్నాయి. వీటన్నింటికీ విభిన్నమైన వ్యవధి ఉంటుంది. మీ దగ్గర ఉన్న వ్యవధి ఆధారంగా దేన్ని ఎంపిక చేసుకోవాలన్నది నిర్ణయించుకోవాలి.
ఆర్థిక, పెట్టుబడి ప్రణాళికలు వేసుకునేప్పుడు భవిష్యత్తు గురించి పూర్తిగా సిద్ధం కావాలి. ఇందులో అనుకోని దుర్ఘటనల సందర్భంలో ఏం చేయాలన్నదీ కీలకమే. దురదృష్టవశాత్తూ జీవిత భాగస్వామి దూరం కావచ్చు. విడాకులు తీసుకోవచ్చు. ఇలాంటివి జరిగితే ఆర్థికంగా తమ సొంత కాళ్ల మీద నిలబడాల్సిన సమయంలో.. ఇబ్బందులు ఎదురవ్వకుండా చూసుకోవాల్సిన అవసరం ఉంటుంది. పిల్లలు, తల్లిదండ్రుల బాధ్యతను తీసుకునేందుకు సిద్ధంగా ఉండా లంటే.. మీరు ముందునుంచీ ఉన్న మీ నిర్ణయాలు, పెట్టుబడులే మీకు రక్షణగా నిలుస్తాయి.
పెట్టుబడులకు సంబంధించిన పత్రాలను పోగొట్టడం, లేదా తప్పుగా పూర్తి చేయడంలాంటి వాటి వల్ల ఎంతోమంది తమ పెట్టుబడులను వెనక్కి తీసుకోకుండా ఉన్న సంఘటనలు అనేకం ఉన్నాయి. ఇలాంటి పరిస్థితులు రాకుండా ఉండాలంటే.. పెట్టుబడులు పెట్టేప్పుడు సంబంధింత పత్రాల్లో సరైన సమాచారం ఇవ్వాలి. మీతోపాటు మరొక వ్యక్తికి కూడా మీ పెట్టుబడులకు సంబంధించిన విషయాలు తెలిసి ఉండేలా జాగ్రత్త తీసుకోవాలి.
ఆర్జిస్తున్న ప్రతి వ్యక్తీ కుటుంబంలో కీలకమే. ఒక్కరి ఆదాయం ఆగిపోయినా ఆ కుటుంబానికి ఎంతోకొంత ఇబ్బంది తప్పదు. అప్పటి వరకూ ఉన్న జీవన శైలిలో మార్పులు వచ్చే అవకాశం ఉంది. ఇలాంటప్పుడు ఆర్థికంగా ఆ కుటుంబానికి ఏ లోటూ రాకుండా చూసుకునేందుకు తగిన మొత్తానికి జీవిత బీమా పాలసీలు తీసుకొని ఉండటం ఎప్పుడూ అవసరం. బీమా సంస్థల వెబ్సైట్లలోనూ, ఇతర సైట్లలోనూ మీకు ఎంత బీమా పాలసీ అవసరం అనేది గణించేందుకు వీలుంటుంది. తక్కువ ప్రీమియంతో ఎక్కువ రక్షణ కల్పించే టర్మ్ ఇన్సూరెన్స్ పాలసీని తీసుకోవడం ఎప్పుడూ ఆచరణీయం. పదవీ విరమణ తర్వాత పింఛను వచ్చేలా ఒక పెన్షన్ పాలసీని ఎంచుకోవడమూ అవసరమే.
ఉద్యోగంలో చేరిన వెంటనే.. అంటే సంపాదన ప్రారంభం కాగానే ఆర్థిక ప్రణాళిక వేసుకోవాలి. దాన్ని ఆచరించాలి. చిన్న వయసులో ఉన్నప్పుడే, దీర్ఘకాలిక లక్ష్యాలను దృష్టిలో పెట్టుకొని పెట్టుబడులు పెట్టాలి. వాయిదా వేయడం వల్ల లక్ష్యాన్ని చేరుకోవడానికి పెట్టాల్సిన పెట్టుబడి మొత్తం పెరుగుతుంది. అంతిమంగా ఇది భారమే. ఇంకా కొన్నాళ్లు ఆగితే.. పెట్టుబడి పెట్టడం ఇష్టం కాకుండా.. కష్టంగా మారే ఆస్కారం ఉంటుంది.