Authorization
Mon Jan 19, 2015 06:51 pm
మనకు ఎప్పుడు డబ్బు అవసరం... ఎంత అవసరం అనే విషయంలో ఒక అంచనా ఉంటుంది. కానీ, చాలామంది దాని గురించి సరిగా పట్టించుకోరు. అప్పుడు చూద్దాంలే అనే దాటవేస్తుంటారు. తీరా ఆ సమయం వచ్చేనాటికి చేతిలో డబ్బు లేక ఏం చేయాలో పాలుపోక అప్పులు చేసి తిప్పలు పడుతుంటారు. అలా కాకుండా అవసరాలకు తగ్గట్టు మీరు పెట్టుబడులు ఇప్పుడే ప్రారంభించాలి.
ఒకప్పుడు బీమా తక్కువ మొత్తం ఉన్నా సరిపోతుండేది. కానీ ఇప్పుడు మూడు నాలుగు లక్షలు దేనికీ సరిపోవు. కాబట్టి పెరిగిన వార్షికాదాయంతోపాటే బీమా మొత్తం కూడా పెరగాలి. ఏ మాత్రం పనికిరాని బీమా పాలసీలకు ప్రీమియం చెల్లించడం వల్ల ఆర్థికంగా భారమే తప్ప ప్రయోజనం ఉండదు. తక్కువ మొత్తంతో ఎక్కువ బీమా అందించే పాలసీలను ఎంచుకొని, ప్రత్యామ్నాయ పెట్టుబడుల మీద దృష్టి పెట్టడం మేలు.
పెద్దయ్యేకొద్దీ... ఆర్థికంగా బాధ్యతలూ పెరుగుతాయి. మీ సంపాదన, అయ్యే ఖర్చులు, భవిష్యత్తు అవసరాలు.. లక్ష్యాలు.. మీ ఆర్థిక ప్రణాళిక మొత్తం వీటి చుట్టూనే ఉంటుంది. పిల్లల ఉన్నత చదువులు పూర్తయి, ఉద్యోగంలో చేరేదాకా పెద్ద మొత్తంలో ఖర్చులు వస్తూనే ఉంటాయి. వీటన్నింటికీ సిద్ధంగా ఉండాల్సిందే. మీ సంపాదనలో కనీసం 20-30శాతం వరకూ భవిష్యత్తు కోసం పొదుపు, పెట్టుబడులకు కేటాయించడం ఎప్పుడూ ఉత్తమం. మిగతా మొత్తంతోనే ప్రస్తుత ఖర్చులను సరిపెట్టుకోవాలి. ఖర్చులు పెరిగినంత వేగంగా ఆదాయం పెరగదు.. కానీ, వచ్చిన ఆదాయం నుంచి పొదుపు చేసి, మిగతా మొత్తాన్నే ఖర్చు చేయడం అనేది నేర్చుకోవాలి.
సాధారణంగా ఏ నెల ఆదాయం ఆ నెల ఖర్చు పెట్టడమే చాలామందికి అలవాటు. ఏదైనా కారణంతో ఒక నెల ఆదాయం ఆగిపోతే.. అప్పు చేయడం తప్ప గత్యంతరం ఉండదు. ఇలాంటి పరిస్థితి రాకుండా ఉండాలంటే.. అత్యవసర నిధిని పెంచుకోవాలి. ఆర్థిక ప్రణాళికలో కీలక అంశం ఇది. అత్యవసరం అనేది ఏ రూపంలోనైనా రావచ్చు. కాబట్టి, ప్రతి కుటుంబానికీ కనీసం మూడు నుంచి ఆరు నెలల ఖర్చులకు సరిపడా అత్యవసర నిధి ఉండటం అవసరం. ఖర్చులు పెరిగినప్పుడు దానికి తగ్గట్టుగా మీ దగ్గర అత్యవసర నిధి ఉందా లేదా అనేది సరిచూసుకోవాలి.
ఉద్యోగ భవిష్య నిధి (ఈపీఎఫ్) గురించి కూడా కాస్త ఆలోచించాలి. ఉద్యోగాలు మారడం ఇప్పుడు సర్వసాధారణం. మీరు ఎన్ని ఉద్యోగాలు మారినా.. మీ ఈపీఎఫ్ ఖాతా జోలికి మాత్రం వెళ్లకండి. యూఏఎన్ ద్వారా ఇప్పుడు ఈపీఎఫ్ ఖాతాను ఏ ఉద్యోగ సంస్థకైనా సులువుగా మార్చుకోవచ్చు. పదవీ విరమణ తర్వాత పెద్ద మొత్తంలో నిధి సమకూరాలంటే.. ఈపీఎఫ్ను మధ్యమధ్యలో తీయకపోవడమే మంచిది.
ఉద్యోగం, వ్యాపారంలో వృద్ధి సాధించి, ఫలితంగా ఆదాయంలో కూడా మార్పు వచ్చినప్పుడు అందుకు అనుగుణంగా మీ పెట్టుబడి పథకాలను మార్చుకోవాలి. ఇక్కడ ఆదాయపు పన్ను శ్లాబులూ కీలకమే. కేవలం పన్ను ఆదా కోసం తక్కువ రాబడి ఇచ్చే పథకాలనే ఎంచుకోకుండా.. కాస్త నష్టభయం ఉన్నా.. మంచి రాబడి అందించేవాటిని పరిశీలించవచ్చు.
ఒక పథకంలో పెట్టుబడి పెట్టి, అందులో నష్టం వస్తున్నా.. దాన్ని అలాగే కొనసాగించడం సరికాదు. దీనివల్ల మీ పెట్టుబడి హరించుకుపోతుంది. కాబట్టి, మార్కెట్ పరిస్థితులను బట్టి, మీ పొదుపు, మదుపు పథకాలపై కన్నేయండి. ఏమాత్రం తేడాగా ఉన్నా నిర్మొహమాటంగా వాటిని వదిలించుకోండి. వీలైతే.. అప్పుడప్పుడూ కాస్త లాభాలనూ స్వీకరించండి.
పెరుగుతున్న ఖర్చులను పరిగణనలోనికి తీసుకుంటూ మీరు పెట్టే పెట్టుబడులు సరిపోతాయా లేదా అనేది కనీసం రెండేళ్లకోసారైనా చూసుకోవాలి. సంపాదన బాగున్నప్పుడే.. అవసరాలను కాస్త అధికంగా అంచనా వేసుకొని, అందుకు అనుగుణంగా పెట్టుబడి మొత్తాలను కేటాయించుకోవాలి. పెరిగే ఖర్చులు, మీ ఆదాయాన్ని బట్టి, ప్రణాళికలను సమీక్షించుకోవాలి.
పెట్టుబడులు, పొదుపు, బీమాలను సమీక్షించుకోవాలి. దీనివల్ల ప్రస్తుతం మనం ఎక్కడున్నాం.. ఆర్థిక ప్రయాణం సవ్యంగానే సాగుతోందా తెలుస్తుంది. గతంతో పోలిస్తే మెరుగయ్యామా? ఇంకా ఇబ్బందులు పడుతున్నామా అర్థమవుతుంది. లక్ష్యాల సాధన, వెళ్తున్న మార్గం విషయంలో మరింత స్పష్టత వస్తుంది. ప్రాధాన్యం లేని అంశాలను విస్మరించి, కచ్చితమైన అవసరాలపై దృష్టి పెట్టడానికి ఉపయోగపడుతుంది. బాధ్యతలు పెరిగినా.. సరైన ప్రణాళికతో వెళ్లడం వల్ల అవి బరువులుగా మారకుండా ఉంటాయి. నష్టదాయక పెట్టుబడుల నుంచి బయటపడేందుకు వీలవుతుంది. ు