Authorization
Mon Jan 19, 2015 06:51 pm
ప్రతి ఒక్కరిలోనూ ఆకర్షణీయమైనవి, అందాన్ని మరింత పెంచేవి కళ్ళు. అందంగా కనిపించేందుకు ముఖానికి మేకప్ వేసుకోవడం, పెదవులకు లిప్స్టిక్ అప్లై చేసుకోవడం ఇలా సాధారణంగా అందరూ చేస్తున్నవే. అయితే కనుబొమ్మలు, కనురెప్పల గురించి చాలా తక్కువమందే పట్టించుకుంటూ ఉంటారు. అందుకే, ఇక్కడ మీ కనుబొమ్మలు, కనురెప్పల అందాన్ని పెంచుకోవడానికి ఏం చేయాలో చూడండి..
ఆముదం, కొబ్బరినూనె: ఒకటి లేదా రెండు చుక్కల ఆముదంలో మరో చుక్క కొబ్బరినూనె కలిపి మిక్స్ చేయాలి. ఇందులో కాటన్ లేదా బ్రష్ ఉంచి, కనురెప్పలు, కనుబొమ్మలపై అప్లై చేసుకుని పడుకోవాలి. ఉదయాన్నే కాస్త గోరువెచ్చని నీటితో శుభ్రం చేసుకోవడం వలన కనురెప్పలు సురక్షితంగా, అందంగా ఉంటాయి. అలాగే వెంట్రుకలు దట్టంగా పెరుగుతాయి. కొబ్బరినూనె అవసరం లేకుండా ఆముదం అయినా రాసుకోవచ్చు. ఇక ఆముదంకు బదులుగా రోజ్ మేరీ ఆయిల్, టీ ట్రీ ఆయిల్, ఆలివ్ ఆయిల్, ఆల్మండ్ ఆయిల్ ఉపయోగించవచ్చు. ప్రతిరోజు రాత్రి పడుకునేముందు ఇలా చేస్తే సరిపోతుంది.
అలోవెరా జెల్: అలోవెరా జెల్ వలన ఎన్ని ప్రయోజనాలున్నాయో ప్రత్యేకంగా చెప్పక్కర్లేదు. అందుకే ఇంటి పరిసరాలలో ఈ మొక్క ఉండాలని మన పెద్దలు, ఆయుర్వేద నిపుణులు చెబుతుంటారు. కనురెప్పలు అందంగా ఉండేందుకు, కనురెప్పల వెంట్రుకలు బాగా ఆకర్షణీయంగా కనిపించేందుకు కాస్త తాజా అలోవెరా జెల్ తీసుకుని కనురెప్పలపై రాసుకోవాలి. ఉదయాన్నే నీటితో శుభ్రం చేసుకోవాలి. ఇది చాలా సులభమైనది. మీ కనురెప్పలు అందంగా కనిపించేందుకు బాగా ఉపయోగపడుతుంది.
వాజిలిన్ లేదా పెట్రోలియం జెల్లీ: కాస్త పెట్రోలియం జెల్లీని తీసుకుని కనురెప్పలు, కనుబొమ్మలపై రాసుకుని నిద్రించాలి. ఇది కనురెప్పలపై రాసుకునేటప్పుడు చాలా జాగ్రత్తగా వ్యవహరించాలి. ఉదయాన్నే చల్లని నీటితో కనురెప్పల వెంట్రుకలపై పెట్రోలియం జెల్లీ లేకుండా బాగా క్లీన్ చేసుకోవాలి. ఇది కనురెప్పల వెంట్రుకలు అందంగా పెరిగేందుకు ఉపయోగపడుతుంది.
మెంతి నూనె: ఒక స్పూన్ మెంతి నూనెలో రెండు లేదా మూడు చుక్కల ఆలివ్ ఆయిల్ మిక్స్ చేసుకుని అందులో కాటన్ ఉంచి కనురెప్పలపై మసాజ్ చేసుకోవాలి. ఇలా చేయడం వలన కనురెప్పలు అందంగా ఉండటంతో పాటు ఒత్తుగా పెరుగుతాయి. ఉదయాన్నే బాగా శుభ్రం చేసుకుంటే సరిపోతుంది.
నిమ్మ తొక్కలు: నిమ్మతొక్కలను చిన్నగా కట్ చేసుకుని పక్కన ఉంచుకోవాలి. మూడు స్పూన్లు ఆలివ్ ఆయిల్ లేదా ఆముదం తీసుకోవాలి. ఇందులో నిమ్మతొక్కలు వేసి రెండు రోజుల పాటు ఉంచాలి. ఈ మిశ్రమాన్ని రెండు రోజుల తర్వాత కనురెప్పలపై అప్లై చేసుకుని నిద్రించి, ఉదయాన్నే నీటితో బాగా కడిగేసుకోవాలి. ఇలా చేయడం వలన కనురెప్పలు అందంగా ఉంటాయి.