Authorization
Mon Jan 19, 2015 06:51 pm
ఇంట్లో అనవసరమైన వస్తువులు పేరుకుపోతున్నాయని, క్లట్టర్ పెరిగిపోతుందని మనలో చాలా మంది అనుకుంటాం. క్లట్టర్ అంటే.. అసవరం లేని వస్తువులు. ఆ క్లట్టర్ ఒక లెవెల్ దాటాక దాన్ని ఎలా బాగు చేసుకోవాలో కూడా అర్ధం కాదు ఒక్కోసారి. ఈ విషయంలో నిపుణులు ఏమంటున్నారంటే రోజుకి ఒక ఐదు నిమిషాలు కేటాయించండి. టైమ్ లేదు అనుకున్నప్పుడు ఐదు నిమిషాలే ఈ పని మీద ఉండండి అంటున్నారు. ఐదు నిమిషాల్లో ఏం చేయగలమో చూద్దాం.
పేపర్స్కి ఓ స్థలం కేటాయించండి: ఇంట్లో అనవసర వస్తువులు పెరిగిపోడానికి పేపర్స్ ముఖ్య కారణం. ఎందుకంటే వీటిని ఎక్కడ పడితే అక్కడ పెట్టేస్తాం. సోఫాలో, టేబుల్ మీద, టీవీ పక్కన... ఎక్కడైనా ఉంటాయి. వీటి కోసం ఒక ట్రే గానీ, బాస్కెట్ గానీ కేటాయించండి. అందులో తప్ప పేపర్స్ ఇంకెక్కడా ఉండకూడదు. ఈ ఒక్క పనితో మీరు క్లట్టర్ తొలగించుకోవడానికి మొదటి అడుగు వేసినట్టే.
నో-క్లట్టర్ జోన్ : ఇంట్లో ఏదో ఓ స్పాట్ని నో క్లట్టర్ జోన్గా ప్రకటించండి. అది మీ సోఫా కావొచ్చు, దివాన్ కావొచ్చు, డైనింగ్ టేబుల్ కావొచ్చు. ఆ జోన్లో అక్కర్లేనివి ఏవీ ఉండకూడదు. నెమ్మదిగా ఈ నో-క్లట్టర్ జోన్ స్కోప్ని పెంచండి. మీకు తెలియకుండానే మీ ఇల్లు క్లట్టర్ ఫ్రీ అయిపోతుంది.
కౌంటర్ క్లియర్ చేయండి : ఒక పెద్ద టబ్ కానీ, బాస్కెట్ కానీ రెడీగా ఉంచుకోండి. బయటికి కనిపించేలా ఉన్న క్లట్టర్ని రోజుకో ప్లేస్ చొప్పున క్లియర్ చేసుకుంటూ రండి. కొన్ని వస్తువులు ఉంచాలో, పారేయాలో తెలియదు. వాటిని ముందు ఈ టబ్లో వేయండి.
ఒక షెల్ఫ్ క్లియర్ చేయండి : కౌంటర్స్ అన్నీ క్లియర్ చేసేశాక బాస్కెట్ కూడా క్లియర్ చేయండి. ఇప్పుడు షెల్ఫుల దగ్గరికి రండి. ఇది బుక్ షెల్ఫ్ కావచ్చు, వంటింట్లో షెల్ఫ్ కావచ్చు. మొత్తం బుక్ షెల్ఫ్ అంతా ఒక రోజే క్లియర్ చేద్దామనుకోకండి. రోజుకి ఒక అర అంతే.
డీ-క్లట్టర్ వీకెండ్ : నెలలో ఒక శనివారం ఇంట్లో అందరూ భాగస్వాములు అయ్యేలా ప్లాన్ చేసుకోండి. ఇది ముందే డిసైడ్ చేసుకుంటే ఇంకేం ప్రోగ్రాంలు పెట్టుకోకుండా ఉంటారు.
ఐదు వస్తువులు : రోజుకి ఐదు వస్తువులని వాటి ప్లేస్లో పెట్టండి. ఇంతవరకూ వాటికి ఒక ప్లేస్ లేకపోతే ఆ ప్లేస్ కేటాయించండి. ఆ వస్తువులు ఆ ప్లేస్లోనే ఉండాలి అని నియమం పెట్టుకోండి.
ఊహించండి : రూమ్ అంతా నీట్గా అయిపోయాక ఎలా ఉంటుందో, ఎలా ఉండాలని మీరు అనుకుంటున్నారో కండ్లు మూసుకుని ఒక్కసారి ఊహించుకోండి. ప్రతి కార్నర్, ప్రతి షెల్ఫ్, ప్రతి కౌంటర్ గురించి ఊహించుకోండి. ఇప్పుడు కండ్లు తెరిచి మీ ఊహలో లేనివన్నీ తీసెయ్యండి.
ఒక ''మే బీ'' బాస్కెట్ క్రియేట్ : మీరు ఇల్లంతా సర్దుతున్నప్పుడు మీకు కొన్ని వస్తువులు ఇంకా పనికి వస్తాయేమో అనిపించొచ్చు. వాటన్నింటిని ఈ మేబీ బాస్కెట్లో వేసి ఈ బాస్కెట్ని ఎక్కడైనా లోపలగా పెట్టెయండి, లేదా అటక ఎక్కించేయండి. ఆరు నెలల తర్వాత ఆ బాస్కెట్ తీసి చూడండి. ఏవి ఉంచాలో, ఏవి వదిలేయాలో మీకు ఇంకా క్లియర్ ఐడియా వస్తుంది. కొన్ని వస్తువుల విషయంలో మీకు ఇంకా డౌట్ ఉందనుకోండి. ఏం పర్వాలేదు. మళ్ళీ లోపల పెట్టేయండి.
డొనేట్ చేయండి : మీకు అవసరం లేదు కానీ, వస్తువు బాగానే ఉంది అనుకున్నప్పుడు ఆ వస్తువు ఎవరికైనా ఇచ్చేయండి. ఛారిటీ ఆర్గనైజేషన్స్ వాళ్ళకి చెప్తే వాళ్ళే వచ్చి కలెక్ట్ చేసుకుని వెళ్తారు.
ముప్పై రోజుల లిస్ట్ : నిత్యావసరాలు కాకుండా మీకు కొనాలి అనిపించిన ప్రతి వస్తువుని ఈ లిస్ట్లో డేట్ వేసి మరీ రాయండి. ముప్ఫై రోజుల తర్వాత కూడా ఆ వస్తువు కొనాలనిపిస్తే అప్పుడు కొనండి.
పిల్లలకి నేర్పండి : ఇంట్లో ఏ వస్తువు ఎక్కడ ఉండాలో, ఆ వస్తువుని అక్కడే ఎందుకు పెట్టాలో పిల్లలకి కూడా చెప్పండి. అయితే, వాళ్ళు వెంటనే నేర్చుకోరు. మీరే కొంచెం సహనంగా ఉండాలి.
ఫైల్స్ / ఫోల్డర్స్ : కొన్ని ఫైల్స్ / ఫోల్డర్స్ రకరకాల రంగుల్లో, సైజుల్లో తెచ్చి పెట్టుకోండి. వాటి మీద అవసరాన్ని బట్టి లేబుల్స్ అతికించుకుని వేటికి సంబంధించిన పేపర్స్ అందులో పెట్టేయండి. పోస్ట్, స్కూల్ నుంచి వచ్చిన ఇంఫర్మేషన్, శుభలేఖలు. ఇలా దాచారనుకోండి, మీకూ వీలుగా ఉంటుంది.
మెడిసిన్స్ కేబినెట్ : ఇంట్లో పెద్దవాళ్ళున్నా, చిన్న పిల్లలు ఉన్నా కొన్ని బేసిక్ మెడిసిన్స్ కంపల్సరీగా ఉంటాయి. ఇంత వరకూ మీకొక మెడిసిన్ కేబినెట్ లేకపోతే ఒకదాన్ని క్రియేట్ చేసుకోండి. ఎలాంటి బాక్స్ అయినా సరిపోతుంది. మెడిసిన్స్ అన్నీ అందులోనే ఉంచాలని నియమం పెట్టుకోండి. వీటిని నెలకోసారి చూస్తూ ఎక్స్పైరీ డేట్ అయిపోయిన వాటిని పారేయండి. మీ ఇంట్లో అల్లోపతి, హౌమియోపతి, ఆయుర్వేదం...ఇలా రకరకాల మెడిసిన్స్ ఉంటే మాత్రం ప్రతి దానికీ వేరే బాక్స్ పెట్టుకోండి. అన్నీ ఒక దాన్లో పెట్టకండి.
అక్కర్లేని బట్టలు : మీరు బీరువా తెరిచినప్పుడల్లా మీకు అక్కర్లేని, వేసుకోని, పట్టని బట్టలు కనపడితే వాటిని వెంటనే బయటికి తీసి ఒక బాస్కెట్లో పెట్టేయండి. ఆ బాస్కెట్ నిండగానే వాటిని ఇంకే విధంగానైనా రీసైకిల్ చేయొచ్చేమో చూడండి.