- బస్సు, ట్రాక్టర్‌ ఢకొని ఐదుగురు మృతి
- మరో ఏడుగురికి తీవ్ర గాయాలు
- కృష్ణగిరి సమీపంలో ఘటన
కృష్ణగిరి : తమిళనాడులోని కృష్ణగిరిలో గురువారం ఉదయం ఘోర ప్రమాదం చోటుచేసుకుంది. వ్యవసాయ కార్మికులతో వెళుతున్న ట్రాక్టర్‌ను ఒక ప్రయివేటు లగ్జీరి బస్సు ఢ కొనడంతో ఐదుగురు కష్టజీవులు ప్రాణాలు కోల్పోయారు. మరో ఏడుగురు తీవ్రంగా గాయపడ్డారు. కృష్ణగిరి జిల్లాలోని కావేరిపట్నం సమీపంలోని ఎర్రహల్లి వద్ద ఈ ప్రమాదం జరిగింది. ధర్మపురి జిల్లాలోని నూలహల్లి తాలూకా శవులూరు గ్రామానికి చెందిన వ్యవసాయ కార్మికులు ఆంధ్రప్రదేశ్‌లోని డెకోట గ్రామానికి వ్యవసాయ పనుల కోసం ట్రాక్టర్‌పై వెళుతున్నారు. ఈ ట్రాక్టర్‌ను శివకాశీ నుంచి బెంగళూరు వెళుతున్న ఓమ్ని బస్సు ఎర్రహల్లి వద్ద ఢ కొట్టింది. ఈ సమయంలో ట్రాక్టర్‌పై 12 మంది ఉన్నారు. వీరిలో మూడు నెలల శిశువుతో సహా ఐదుగురు మృతి చెందారు. మరో ఏడుగురు తీవ్రంగా గాయపడగా వారిని కృష్ణగిరి ప్రభుత్వ వైద్య కళాశాల ఆసుపత్రికి తీసుకుని వెళ్లారు. మృతుల్ని మునుసామి (50), మల్లి (65), ముతు (20), వాసంతి (45)గా గుర్తించారు. ఈ ప్రమాదంపై కావేరిపట్నం పోలీసులు కేసు నమోదు చేశారు. డ్రైవర్‌ కరుపుసామి (50)ను అదుపులోకి తీసుకున్నారు. ప్రమాదస్థలాన్ని కృష్ణగిరి జిల్లా కలెక్టర్‌ దీపక్‌ జాకోబ్‌ సందర్శించారు. అలాగే వైద్య కళాశాల ఆసుపత్రిలో చికిత్స పొందుతున్న బాధితుల్ని పరామర్శించారు.