నితిన్‌, చంద్రశేఖర్‌ ఏలేటి కాంబినేషన్‌లో రూపొందుతున్న చితం 'చెక్‌'. భవ్య క్రియేషన్స్‌ పతాకంపై వి. ఆనందప్రసాద్‌ ఈ చిత్రాన్ని నిర్మిస్తున్నారు. ఇందులో రకుల్‌ ప్రీత్‌ సింగ్‌, ప్రియా ప్రకాష్‌ వారియర్‌ కథానాయికలు. ఈ చిత్రం తాజా షెడ్యూల్‌ ఈనెల 10 నుండి హైదరాబాద్‌లో జరుగుతోంది.
ఈ సందర్భంగా నిర్మాత వి. ఆనందప్రసాద్‌ మాట్లాడుతూ, ''చెక్‌ టైటిల్‌కి మంచి రెస్పాన్స్‌ వచ్చింది. నటుడిగా నితిన్‌ స్థాయిని పెంచే చిత్రమిది. దర్శకుడు చంద్రశేఖర్‌ యేలేటి చదరంగం నేపథ్యంలో చాలా విభిన్నంగా ఈ చిత్రాన్ని తెరకెక్కిస్తున్నారు. ప్రస్తుతం హైదరాబాద్‌లో చిత్రీకరణ జరుగుతోంది. నితిన్‌, రకుల్‌ ప్రీత్‌ సింగ్‌, సాయి చంద్‌, సంపత్‌ రాజ్‌ తదితరులపై కీలక సన్నివేశాలు చిత్రీకరిస్తున్నాం. నవంబర్‌ 5 వరకు ఈ షెడ్యూల్‌ కొనసాగుతుంది. దాంతో దాదాపుగా సినిమా చిత్రీకరణ పూర్తవుతుంది' అని తెలిపారు. పోసాని కష్ణ మురళి, మురళి శర్మ, హర్షవర్ధన్‌, రోహిత్‌, సిమ్రాన్‌ చౌదరి తదితరులు ఈ చిత్రంలో ప్రధాన తారాగణం.
