Authorization
Mon Jan 19, 2015 06:51 pm
'30 రోజుల్లో ప్రేమించటం ఎలా?' చిత్రంతో యాంకర్ ప్రదీప్ మాచిరాజు హీరోగా పరిచయం అవుతున్న సంగతి తెలిసిందే. మున్నా దర్శకత్వం వహించిన ఈ చిత్రంలో నాయికగా అమృతా అయ్యర్ నటించారు. కన్నడలో పలు విజయవంతమైన సినిమాలు తీసిన నిర్మాత ఎస్.వి. బాబు ఈ చిత్రాన్ని ఎస్.వి. ప్రొడక్షన్స్ బ్యానర్పై నిర్మించారు. జీఏ2-యువి క్రియేషన్స్ ద్వారా ఈనెల 29న ఈ చిత్రాన్ని విడుదల చేసేందుకు ఆయన సన్నాహాలు చేస్తున్నారు.
ఈ సందర్భంగా బుధవారం మీడియాతో ముచ్చటించారు. ఆ విశేషాల సమాహారం ఆయన మాటల్లోనే..''నీలి నీలి ఆకాశం' పాటని బ్లాక్ బస్టర్ హిట్ చేసిన రెండు రాష్ట్రాల ప్రజలకు ధన్యవాదాలు. ఇప్పటికి 300 మిలియన్ వ్యూస్ దాకా వెళ్లింది. అలాగే మరో పాట కూడా 20 మిలియన్ వ్యూస్ సాధించింది. స్నేహం మీద చేసిన సాంగ్కు సుమారు 10 మిలియన్ వ్యూస్ వచ్చాయి. పాటల మాదిరిగానే సినిమా కూడా చాలా బాగుంటుంది. నిర్మాతగా ఇది నాకు 18వ సినిమా. నాకైతే కథ విన్నప్పటి కంటే సినిమా చూశాక మంచి ఫీల్ కలిగింది. ఇంటర్వెల్ తర్వాత వచ్చే సెంటిమెంట్ ఆడియెన్స్ మనసుల్ని కదిలిస్తుంది. యాక్టర్ల పర్ఫార్మెన్స్ హైలైట్ అవుతుంది. డైరెక్టర్ కొత్తవాడైనప్పటికీ సినిమాని అద్భుతంగా తెరకెక్కించారు.
హీరో ప్రదీప్ గురించి ఎంత చెప్పినా తక్కువే. అందరూ ఇష్టపడే విధంగా ప్రతి ఫ్రేమ్లో ఆయన నటించారు. ఆయన నటన మా మూవీకి చాలా ప్లస్. ఈ సినిమాకి ప్రధాన బలం కథ. మంచి సెంటిమెంట్, కామెడీ ఉన్నాయి. సినిమా రెండు షేడ్స్లో ఉంటుంది. కరోనా లాక్డౌన్ కారణంగా ఓటీటీ కోసం డిస్కషన్స్ జరిగాయి. కానీ మా సినిమా మీద చాలా నమ్మకం ఉంది. అలాగే ప్రదీప్ గారికి ఇది ఫస్ట్ ఫిల్మ్. థియేటర్లలో విడుదల చెయ్యాలనే ఉద్దేశంతోనే ఓటీటీ గురించి ఆలోచించలేదు. అలాగే ఈ సినిమాని అల్లు అరవింద్, బన్నీ వాసు చూశారు. వాళ్లు ఇష్టపడి, వాళ్ల బ్యానర్ ద్వారా ఈ సినిమాని రిలీజ్ చేస్తున్నారంటే అదష్టంగా భావిస్తున్నాను. సినిమా ఎక్కడా కూడా బోర్ కొట్టదు. ప్రేక్షకుల నమ్మకాన్ని వమ్ము చేయదు. సినిమా చూసిన ప్రేక్షకుడు హాయిగా థియేటర్ నుంచి బయటకు వస్తాడు. అందుకే పాటంత బాగా సినిమా ఉంటుందనే క్యాప్షన్ కూడా పెట్టాం. ఇండిస్టీకి చెందిన పెద్దవాళ్లు ఈ సినిమాని చూశారు. అందరూ ప్రశంసించారు. మరి ప్రేక్షకులు ఏం చెబుతారో ఈ నెల 29 మార్నింగ్ తెలిసిపోతుంది. 'నీలి నీలి ఆకాశం' పాటను మేం 2020 జనవరి 30న రిలీజ్ చేశాం. అంటే జనవరి 29కి ఆ పాట విడుదలై 365 రోజులన్న మాట. అలా సెంటిమెంట్గా విడుదల తేది కుదిరినందుకు చాలా హ్యాపీగా ఉంది. నేను ప్యాషన్తో ఫిల్మ్ ఇండిస్టీలోకి వచ్చాను. హైస్కూల్లో చదివేటప్పుడు అర్జున్ సర్జా వాళ్ల నాన్నగారు మాకు డ్రిల్ మాస్టారు. అప్పట్లో ఆయన సినిమాల్లో విలన్గా నటించేవారు. ఆయనతో ట్రావెల్ అయ్యాక సినిమాలపై పిచ్చి ప్రేమ ఏర్పడింది. పెద్దయ్యాక నేను వైజాగ్లో ట్రావెల్ ఏజెన్సీలు నడిపాను. ఓసారి సినిమా షూటింగ్ ఎలా ఉంటుందో చూడాలని నాగార్జునకి డ్రైవర్గా కూడా వెళ్లిన సందర్భాలున్నాయి. సినిమాలపై ఉన్న ప్యాషన్తో కన్నడలో సినిమాలను నిర్మించాను. తర్వాత తెలుగులోనూ తీశాను. 50 శాతం ఆక్యుపెన్సీ అయినప్పటికీ మాగ్జిమమ్ థియేటర్స్ వస్తాయని ఆశిస్తున్నాం. వీలైనన్ని థియేటర్లలో రిలీజ్ చెయ్యాలని మేం ప్లాన్ చేస్తున్నాం. తెలుగు, తమిళ ప్రేక్షకులు సినిమాని చాలా ఎక్కువగా ప్రేమిస్తారు. కన్నడంలో అలా కాదు. ప్రస్తుతం ఏ కన్నడ ప్రొడ్యూసర్ కూడా ధైర్యం చేసి సినిమాని రిలీజ్ చేయటం లేదు. అయితే 'కేజీఎఫ్' వంటి పాన్ ఇండియా సినిమా బ్లాక్బస్టర్తో కన్నడ సినిమా గురించి దేశం మొత్తం తెలియడం ఆనందంగా ఉంది.