Authorization
Mon Jan 19, 2015 06:51 pm
2018-19 సంవత్సరానికి సంబంధించిన ప్రపంచ వేతన నివేదిక (గ్లోబల్ వేజ్ రిపోర్ట్)ను ఇంటర్నేషనల్ లేబర్ ఆర్గనైజేషన్(ఐఎల్ఓ) ఇటీవలే ప్రచురించింది. ప్రపంచ ఆర్థిక వ్యవస్థలో నిజ వేతనాల వృద్ధిరేటు గురించి తాజాగా అందుబాటులోకి వచ్చిన 2017 సంవత్సరానికి సంబంధించిన సమాచారాన్ని ఈ నివేదికలో పొందుపర్చారు. 2017లో ప్రపంచ ఆర్థిక వ్యవస్థలో నమోదైన నిజవేతన వృద్ధి 1.8శాతం. ఇది 2016లో నమోదైన 2.4శాతం కంటే తక్కువగా ఉండటమే కాకుండా 2008 సంవత్సరం తరువాత నిజవేతన వృద్ధి ఇంత తక్కువగా ఎప్పుడూ లేదు. 2008కి ముందు ప్రపంచ ఆర్థిక వ్యవస్థలో నమోదైన నిజవేతన వృద్ధిరేటు కంటే ఇది కచ్చితంగా తక్కువగా ఉంది. అంతేకాకుండా ఇతర దేశాలతో పోల్చినప్పుడు చైనాలో నిజవేతన వృద్ధిరేటు ఎక్కువగా ఉంది. చైనా పరిమాణం చాలా ఎక్కువగా ఉన్నందున అది ప్రపంచ సగటు మొత్తాన్ని పెంచింది. ఒకవేళ మనం చైనాను మినహాయించి చూసినట్టయితే 2016 సంవత్సరం 1.8గావున్న ప్రపంచ నిజవేతన వృద్ధిరేటు 2017లో 1.1శాతానికి పడిపోయింది. అభివృద్ధి చెందిన పెట్టుబడిదారీ దేశాలలో నిజవేతనాలు వాస్తవంగా స్తంభించాయని తెలియజేయటంలోనే ఐఎల్ఓ నివేదిక ప్రత్యేకత ఉంది. 2015లో అభివృద్ధి చెందిన జీ-20 గ్రూపు దేశాలలో నిజవేతన వృద్ధిరేటు 1.7శాతంతోను, 2016లో నమోదైన 0.9శాతంతోను పోల్చినప్పుడు 2017 సంవత్సరంలో నిజవేతన వృద్ధిరేటు కేవలం 0.4శాతంగా ఉంది. తూర్పు ఐరోపాను మినహాయించి ఐరోపాను చూచినప్పుడు 2015లో నిజవేతన వృద్ధిరేటు 1.6శాతంతోను, 2016లో నమోదైన 1.3శాతంతోను పోల్చినప్పుడు 2017లో నిజవేతన వృద్ధిరేటు పూర్తిగా పతనమైంది. అంటే సున్నాగా నమోదయింది. అమెరికాలో 2015లో 2.2శాతంగాను, 2016లో 0.7శాతంగాను నమోదైన అంకెలతో పోల్చినప్పుడు 2017లో నిజవేతన వృద్ధిరేటు 0.7శాతంగా నమోదైంది.
అభివృద్ధి చెందిన దేశాలలో నిజవేతన వృద్ధిలో ఏర్పడిన స్తంభనకు ప్రత్యేక ప్రాముఖ్యత ఉంది. ఎందుకంటే ఈ మధ్యకాలంలో ఈ ఆర్థిక వ్యవస్థలు పుంజుకుంటున్నాయని, దానితో నిరుద్యోగిత రేటు తగ్గుముఖం పట్టిందనే మాటలు వినపడుతున్నాయి. ఉదాహరణకు అమెరికాలో నిరుద్యోగం రేటు 3.7శాతం ఉందని అధికారికంగా ప్రకటించారు. ఇది గత 49ఏండ్లలో అత్యంత తక్కువ. అమెరికాలో లేబర్ మార్కెట్ అంత దృఢంగా వున్నప్పుడు నిజవేతనాల వృద్ధి రేటు అంత బలహీనంగా ఎలా వుంటుంది?
ఇక్కడ ముందుగా రెండు విషయాలను గమనించాలి. ఐఎల్ఓ సమాచారం గంటల ప్రకారం ఇచ్చే వేతనాన్ని కాకుండా నెలనెలా చెల్లించే వేతనాలను లెక్కించటంపై ఆధారపడి ఉంటుందనేది మొదటిది. కాబట్టి అనేక సంవత్సరాల కాలంలో నిజవేతనాలలో వచ్చే మార్పులలో గంటల ప్రకారం ఇచ్చే వేతన రేట్లలో, నెలకు పనిచేసే గంటల ప్రకారం ఇచ్చే వేతన రేట్లలో సంభవించే మార్పులు అంతర్భాగంగా ఉంటాయి. ఉద్యోగిత వృద్ధిరేటు పతనమౌతున్న ప్రస్తుత తరుణంలో నెలలో సగటున ఒక కార్మికుడు చేస్తున్న పని గంటలు పెరుగుతూ ఉండాలి. ఐఎల్ఓ వివరించినట్టుగా ఒకవేళ అభివృద్ధి చెందిన దేశాలలో నిజవేతనాలలో వృద్ధి దాదాపుగా లేనప్పుడు కార్మికుడు నెలకు పనిచేసే తలసరి గంటలు తప్పకుండా పెరగాలి. అటువంటి పరిస్థితులలో గంటకు చెల్లించే నిజవేతనం తప్పకుండా తగ్గి తీరుతుంది. ఐఎల్ఓ నివేదికలో పేర్కొన్నట్టు లేబర్ మార్కెట్ దృఢంగా ఉన్నప్పుడు గంటకు చెల్లించే నిజవేతనం రేటు తగ్గిందని చెప్పటంలో ఏదో కుతంత్రం ఉంది.
రెండవది. నగదు వేతన రేటు వృద్ధి ద్రవ్యోల్బణంతో సర్దుబాటు చేసి నిజవేతన వృద్ధిరేటును లెక్కగడతారు. ఎక్కువ వేతనం కోసం చేసే బేరసారాలు నగదు రూపంలో ఉంటాయి గనుక లేబర్ మార్కెట్ దృఢంగా ఉండటమంటే నగదు వేతన రేటు పెరుగుతుందని ఊహించుకోవచ్చు. అయితే ద్రవ్యోల్బణం పెరగటం లేక లాభాల కోసం పెట్టుబడిదారులు కుమ్మక్కై ధరలను నిర్ణయించినప్పుడు అది నిజవేతన రేటు వృద్ధికి దారితీయదు. అయితే నిరుద్యోగిత వేగంగా పడిపోతున్న పరిస్థితులలో కూడా నగదు వేతనాల రేటులో వృద్ధి లేకపోవటం ఐఎల్ఓ డేటాలో కొట్టొచ్చినట్టు కనపడుతుంది. వేరేమాటల్లో చెప్పాలంటే మనం నిజ వేతనాలకు సంబంధించిన సమాచారాన్ని కాకుండా నగదు వేతనాలకు సంబంధించిన సమాచారాన్ని చూసినప్పుడు కూడా లేబర్ మార్కెట్ దృఢంగా ఉన్నట్టుగా మనకు ఎటువంటి సాక్ష్యమూ లభించదు.
ఉదాహరణకు అమెరికాలో 2014లో నగదు వేతన వృద్ధిరేటు అంతకు ముందు సంవత్సరంతో పోల్చినప్పుడు 2.4శాతం ఉన్నట్టు మనకు కనపడుతుంది. ఆ తరువాతి మూడేండ్లలో అది 2.3శాతం, 1.95శాతం, 2.69శాతంగా ఉంది. వేరేమాటల్లో చెప్పాలంటే 2014, 2017 మధ్యకాలంలో నగదు వేతన వార్షిక వృద్ధిరేటు నామ మాత్రంగానే ఉంది. అయితే 2014 సంవత్సరం జనవరిలో 6.6శాతంగా వున్న నిరుద్యోగిత రేటు 2017 అక్టోబరు నెలలో 3.7శాతానికి తగ్గింది. వేరే మాటల్లో చెప్పాలంటే నిరుద్యోగిత రేటు దాదాపు సగానికి తగ్గినా నగదు వేతనాల వృద్ధిరేటు ఏ మాత్రం పెరగలేదు. ఇదెలా సాధ్యం?
ఐఎల్ఓ నివేదిక కూడా ఇటువంటి పరిస్థితిని అర్థం చేసుకోవటంలో గందరగోళంలో పడి అనేక రకాల ఊహనల(హైపోథీసెస్)ను ముందుకు తెచ్చింది. వీటిలో కొన్ని దేనికీ పనికిరానివి. ఉదాహరణకు 2017లో నిజవేతన వృద్ధిరేటు మందగించటానికి శ్రామిక ఉత్పాదకత వృద్ధిరేటు తగ్గటం కారణం కావచ్చని ఐఎల్ఓ నివేదిక పేర్కొంది. అయితే నిజవేతన వృద్ధిరేటు మందగించటాన్ని ఐఎల్ఓ నివేదిక వివరించగలిగినప్పటికీ నిజవేతన వృద్ధి స్థంభించటాన్ని అది వివరించలేకపోయింది. ఎందుకంటే శ్రామిక ఉత్పాదకత వృద్ధిరేటు పరిమాణం ఏమైనప్పటికీ ఎల్లవేళలా అది నిజవేతన వృద్ధిరేటు కంటే ఎక్కువగానే ఉంటుంది. ఒకవేళ శ్రామిక ఉత్పాదకత వృద్ధిరేటు 3శాతం నుంచి 2శాతానికి తగ్గితే నిజవేతన వృద్ధిరేటు కూడా 3శాతం నుంచి 2శాతానికి తగ్గటాన్ని అర్థం చేసుకోవచ్చు. అంతేగానీ శ్రామిక ఉత్పాదకత వృద్ధిరేటు ఎంతోకొంత ఉన్పప్పుడు నిజవేతన వృద్ధి అసలే లేకుండా సున్నాకు దిగజారటాన్ని అర్థం చేసుకోవటం కష్టం. చమురువంటి దిగుమతుల ధరలు పెరగటం కారణంగా నిజవేతనాలు స్వతంత్రంగా కుదింపునకు గురవుతాయని ఎవరైనా వాదించవచ్చనేది నిజమే. అయితే నిరుద్యోగిత రేటు తీవ్రస్థాయిలో పడిపోయినప్పుడు కూడా నగదు వేతన వృద్ధిరేటు ఎందుకు పెరగటంలేదనే విషయాన్ని ఇది వివరించలేదు.
దీనికి సంబంధించిన వివరణ వేరేచోట ఉంది. ఇక్కడ రెండు సాధ్యతలను ముందుకు తేవచ్చు. అభివృద్ధి చెందిన దేశాల ఆర్థిక వ్యవస్థలు ఆర్థికంగా కోలుకున్నాయని ప్రకటించటం అతిశయోక్తి మాత్రమే అనేది మొదటిది. 2017 అక్టోబరులో అమెరికాలో నిరుద్యోగిత రేటు 3.7శాతానికి పడిపోయిందని చెప్పినప్పుడు ఉత్పత్తిలో శ్రామికశక్తి పాల్గొనే రేటుకూడా పడిపోయిందనే విషయాన్ని దానితోపాటు చెప్పలేదు. 2008 జనవరిలో సంక్షోభం సంభవించక ముందు 66.2శాతంగా వున్న శ్రామికశక్తి పాల్గొనే రేటు 2017 అక్టోబరులో 62.9శాతంగా ఉన్నది. ఒకవేళ శ్రామికశక్తి పాల్గొనే రేటు పడిపోవటానికి కారణం 'కార్మికుడు నిరుత్సాహపడటం' అనుకుంటే, అంటే పనిదొరికే అవకాశం లేకపోతే ప్రజలు పనికోసం క్రియాశీలంగా అన్వేషించటానికి ఇష్టపడరు. దానితో వారు పని చేయటానికి సిద్ధపడినప్పటికీ శ్రామికశక్తి నుంచి వైదొలుగుతారు. అటువంటి పరిస్థితులలో నిరుద్యోగిత రేటును గతంలో శ్రామికశక్తి పాల్గొన్న రేటు ఆధారంగా పునఃగణించినప్పుడు అది చాలా ఎక్కువగా 8.5శాతం అవుతుంది. ఈ ఊహన సరియైన ఊహన కాకపోవచ్చు. అయితే 3.7శాతంగా నిర్ధారించబడిన నిరుద్యోగిత రేటుతో పాటుగా శ్రామికశక్తి పాల్గొనే రేటు కూడా అదే స్థాయిలో పడిపోయినప్పుడు వాస్తవ స్థితి ప్రతిబింబించదు. ఒకవేళ మనం లేబర్ మార్కెట్ దృఢంగా ఉందని భావిస్తే నిజ వేతనాలలో స్తబ్దత, నగదు వేతన వృద్ధిలో మందగొడిగా ఉండటం ఒక పజిల్గా మారుతుంది. లేబర్ మార్కెట్ చెబుతున్నంత దృఢంగా లేదనుకున్నప్పుడు విషయం తేటతెల్లమౌతుంది. ఐఎల్ఓ నివేదిక కూడా ఈ విషయాన్నే స్పష్టం చేసింది.
కార్మిక సంఘాలపై జరుగుతున్న పెను దాడులతో కార్మికులకుండే బేరమాడే శక్తి బలహీనపడిందనేది రెండవ కారకంగా ఉంది. ఈ బేరమాడే శక్తిని అనుసరించి నగదు వేతనాల పెరుగుదల రేటు నిరుద్యోగిత రేటుపై ఆధారపడి వుంటుంది. ఒకవేళ నిరుద్యోగిత రేటు పడిపోయినప్పటికీ అదే సమయంలో పరిశ్రమలను తక్కువ వేతనాలుగల దేశాలకు తరలించే ప్రమాదం (ట్రంప్ రక్షిత విధానాలు అమలులో ఉన్నప్పటికీ)తోసహా వివిధ రూపాలలో కార్మిక సంఘాలు బలహీనపడితే నగదు వేతనాల వృద్థిలో వేగం ఉండదు.
కార్మిక సంఘాలను బలహీనపర్చి నగదు వేతనాలను, ధరలను చెప్పుకోదగినంతగా పెంచకుండా ఆర్థిక వ్యవస్థలో కార్యకలాపాలను పెంచవచ్చనేందుకు రెండవ ప్రపంచ యుద్ధం ముందటి జపాన్ ఉదాహరణగా నిలిచింది. సైనిక పాలనలో ఆయుధాల ఉత్పత్తిపై పెంచిన వ్యయం కారణంగా జపాన్ ఆర్థిక వ్యవస్థ మహామాంద్యం నుంచి బయటపడింది (నిజానికి 'మిలిటరీ కినీషియనిజం' అని పిలవదగిన విధానం అమలుతో మహామాంద్యం నుంచి బయటపడిన మొట్టమొదటి దేశం జపాన్). అయితే ఫాసిస్టు స్వభావంగల ప్రభుత్వం కార్మిక సంఘాలను అణచివేసింది. జపాన్ ఆర్థిక వ్యవస్థ కోలుకోవటంవల్ల నిరుద్యోగిత తగ్గినా నగదు లేక నిజవేతనంలో పెరుగుదల నామమాత్రంగానే నమోద యింది. ఇతర అభివృద్ధి చెందిన పెట్టుబడిదారీ దేశాలతోసహా అమెరికాలో కార్మిక సంఘాలపై అటువంటి దాడులు జరగకపోవచ్చు. అయితే ప్రపంచీకరణ ఆధిపత్యం కారణంగా కార్మిక సంఘాలు చాలావరకు బలహీన పడ్డాయనేది పచ్చినిజం. నయా ఉదారవాద పాలనలో కార్మికులపై దాడులు ఉంటాయని, అంతేకాకుండా నయాఉదారవాదంలో నెలకొన్న సంక్షోభం కొనసాగుతూనే ఉంటుందని ఐఎల్ఓ నివేదిక నర్మగర్భంగా పేర్కొంది.
ప్రభాత్ పట్నాయక్
అనువాదం: నెల్లూరు నరసింహారావు
సెల్ : 8886396999