Authorization
Mon Jan 19, 2015 06:51 pm
గత 5వ తేదీ నుంచి తెలంగాణ ఆర్టీసీ కార్మికుల సమ్మె నోటీసుకు కూడా స్పందిం చని ప్రభుత్వం, కార్మికుల సమ్మెను మాత్రం ఇల్లీగల్ సమ్మెగా చెబుతోంది. ముఖ్యమంత్రే స్వయంగా కార్మికులు బ్లాక్మెయిల్ చేస్తున్నారనీ, అది చెల్లదనీ సెలవిచ్చారు. దీనర్థం ఏమిటి? ఒక వ్యక్తిలో, సంస్థలో లోపాలున్నప్పుడే ఇతరులు బ్లాక్ మెయిల్ చేసే అవకాశం ఉంటుంది. అంటే ముఖ్యమంత్రి, ప్రభుత్వంలో లోపాలున్నట్టే లెక్క. కాబట్టి తన లోపాలను ప్రభుత్వం, సీఎం సరిచేసుకోవాలి. అలాగే ముఖ్యమంత్రి కార్మికుల గూండాగిరీ నడవదన్నారు. కార్మికులు ఏ వ్యక్తుల మీదయినా దాడి చేశారా, ఆఫీసులు బద్దలుకొట్టారా, బస్సులను తగలబెట్టారా, మరి ఇవేవీ లేనప్పుడు కార్మికులది గూండా గిరీ ఎలా అవుతుంది?
ఆర్టీసీ ప్రభుత్వరంగ సంస్థ. ప్రభుత్వంలో సాధారణంగా రెండు రకాల ఉద్యోగులుంటారు. ప్రభుత్వాలు మారినా పర్మినెంట్గా ఉండేవి. డిపార్టుమెంట్లు, రెవెన్యూ, విద్య, వైద్యం, ప్రజా పన్నులశాఖ, పోలీసు, ఫైర్ లాంటివి. వీటిలో పనిచేసేవారిని ప్రభుత్వోద్యోగులు అంటారు. ఆర్టీసీ, విద్యుత్, నీటి సరఫరా, బ్యాంకులు, పబ్లిక్ సెక్టార్ లాంటివి ప్రభుత్వం నడిపే సంస్థలు. వీరికి కార్మికచట్టాలు వర్తిస్తాయి. కానీ ప్రభుత్వం ఆర్టీసీ వారిని ఎమర్జెన్సీ సంస్థగా పిలుస్తూ సమ్మెలు నిషేధిస్తున్నది. ఇది అన్యాయం. ప్రభుత్వ పచ్చి అవకాశవాదం. కానీ బలి అవుతున్నది మాత్రం కార్మికులు, ప్రయాణీకులు. ప్రపంచంలో, మనదేశంలో ప్రయాణం అనేది తప్పనిసరి. ముఖ్యంగా భారతదేశంలో కనీసం రాబోయే రెండు వందల సంవత్సరాల వరకు ప్రజారవాణా తప్పదు. సామాన్య ప్రజానీకం గురించి ఆలోచించే ఏ ప్రభుత్వమైనా ప్రజా రవాణా వ్యవస్థను బలోపేతం చేయవలసి వస్తుంది. అందుకు తెలంగాణ ప్రభుత్వం ఆర్టీసీని వెంటనే ప్రభుత్వంలో విలీనం చేసి డిపార్టుమెంటుగా ప్రకటించి లాభనష్టాలతో ప్రమేయం లేకుండా ప్రజోపయోగ డిపార్టుమెంటుగా చేయాలి. గతంలో ఆర్టీసీ బస్సుల ఎంబ్లం మీద ప్రజాసేవయే మా కర్తవ్యం అని రాసి ఉండేది. దానిని సార్థకం చేసుకోవాలి. రైల్వేలు, ఇతర చోట్ల ప్రయివేటైజేషన్ చేయడంలేదా, మరి కేంద్ర ప్రభుత్వాన్నెందుకు నిలదీయడం లేదని సీఎం ప్రశ్నించారు. అంటే తాను చేసింది సరికాదని సీఎం ఒప్పుకున్నట్టే గదా! గతంలో సీఎం నష్టాలొస్తే ఆర్టీసీని మూసివేస్తామన్నారు. మరి రాష్ట్ర ప్రభుత్వమే నష్టాల్లోకి పోతుండగా లక్షలకోట్లు అప్పు చేస్తున్నారు. కాబట్టి ప్రభుత్వానికి లాభం రావటం లేదు. కాబట్టి ప్రభుత్వాన్ని ప్రయివేటు చేసి సీఎం, మంత్రులు, ఎమ్మెల్యేలు, యాదాద్రిలో భజన చేసుకుంటూ గడుపుతారా?
- టి. మోహనరావు
సెల్: 9908503997