కంటికి వచ్చే వ్యాధుల్లో గ్లకోమా ఒకటి. ఈ వ్యాధి కారణంగా పోగొట్టుకున్న చూపును తిరిగి తెప్పించటం కుదరదు. అయితే చికిత్సతో భవిష్యత్లో మరింత నష్టం జరగకుండా నివారించవచ్చు. గ్లకోమా వ్యాధిని ప్రారంభంలోనే గుర్తించి వెంటనే చికిత్స ప్రారంభించాలి. ఎక్కువగా గ్లకోమాపై అవగాహన లేని కారణంగా లక్షణాలను గుర్తించలేకపోతున్నారు. ప్రపంచవ్యాప్తంగా గ్లకోమా ఉన్నవారు 3.54శాతం ఉన్నట్లుగా గుర్తించారు. ఆసియా, ఆఫ్రికాదేశాల్లో ఎక్కువగా ఉంది. వివిధ అధ్యయనాలు ప్రకారం 2020 నాటికి ఎనభై లక్షల మంది ఈ వ్యాధి బారిన పడే ప్రమాదం ఉంది. మన దేశంలో ప్రస్తుతం దాదాపు 12లక్షల మంది ఈ వ్యాధి కారణంగా బాధపడుతున్నారు.
గ్లకోమా అంటే?
కంటి చూపు నెమ్మదిగా మందగించి కొంతకాలానికి పూర్తి అంథత్వం రావడాన్నే గ్లకోమా అంటారు. శరీరానికి రక్తం ద్వారా పోషకాలు అందినట్టే కనుగుడ్డుకి 'ఆక్వియస్ హూమర్' ద్రవం ద్వారా పోషకాలు అందుతూ ఉంటాయి. పల్చగా, నీళ్లను పోలి ఉండే ఈ ద్రవం కనుపాప, 'కార్నియా'ల మధ్య ప్రసరిస్తూ కంటిని ఆరోగ్యవంతంగా ఉంచుతుంది. రక్తం నుంచి తయారయ్యే ఈ ద్రవం కంట్లోకి వెళ్లి తిరిగి రక్తంలో కలిసి పోతూ ఉంటుంది. ఈ ద్రవం పయనించే మార్గాన్ని 'యాంగిల్' అంటారు. ఈ మార్గంలో అడ్డంకులు ఏర్పడి ద్రవం కంట్లోనే నిలిచిపోతే కనుగుడ్డుపై ఒత్తిడి పెరిగి కంటి చూపుకు తోడ్పడే 'ఆప్టిక్ నర్వ్' దెబ్బ తింటుంది.
వయసుపరంగా ..
గ్లకోమాను 'నీటి కాసులు' అని కూడా అంటారు. ఈ వ్యాధి గర్భస్థ శిశువులు మొదలుకుని వృద్ధుల వరకూ అన్ని వయసులవారినీ బాధిస్తుంది. ఒక కంట్లో లేదా ఒకేసారి రెండు కళ్లలోనూ గ్లకోమా రావొచ్చు. రోగుల్లో 90శాతం మందికి ఒకే సమయంలో రెండుకళ్ళలో గ్లకోమా వస్తుంది.వయసు, కారణం, రుగ్మత ఆధారంగా గ్లకోమాను రెండు రకాలుగా వర్గీకరించారు.
కంజెనైటల్ గ్లకోమా: గర్భాశయంలో పిండం సరిగా అభివ ద్ధి చెందనప్పుడు కళ్ల మీద ఒత్తిడి పెరిగి ఆప్టిక్ నర్వ్ డ్యామేజ్ అవుతుంది. ఫలితంగా పుట్టుకతోనే పసికందులు గ్లకోమాను వెంట తెచ్చుకుంటారు.
ఓపెన్ యాంగిల్ గ్లకోమా: ఈ సమస్యలో కన్నుగుడ్డు లోపల అధిక భారం పడటం, అధిక హ్రస్వదృష్టి, వయసు పెరగడంతో ఎవరిలోనైనా రావచ్చు. అధిక రక్తపోటు, మధుమేహం, ఇన్హేలర్ల రూపంలో స్టెరాయిడ్లు, కుటుంబంలో ఎవరికైనా గ్లకోమా ఉండటం వల్ల రావచ్చు. కంటికి ప్రమాదాలు సంభవించడం వల్ల కూడా రావచ్చు. ద్రవం బయటకు లోపలికి వెళ్లటానికి ఉపయోగపడే యాంగిల్ ఆఫ్ యాంటీరియర్ ఛాంబర్ పూర్తిగా మూసుకుపోయి ఉంటుంది.
యాంగిల్ క్లోజర్ గ్లకోమా: యాంగిల్ సన్నబడి క్రమేపీ మూసుకుపోతుంది.
కొందరిలో యాంగిల్ ఆరోగ్యంగానే ఉంటుంది, ఆక్వియస్ హూమర్ ప్రవాహం కూడా సక్రమంగానే జరుగుతూ ఉంటుంది. అయినా కంట్లో ఒత్తిడి పెరిగి ఆప్టిక్ నర్వ్ దెబ్బతింటుంది. ఇలాంటి రుగ్మతను నార్మల్ టెన్షన్ గ్లకోమా అంటారు.
గ్లకోమా లక్షణాలు
లక్షణాలు తీవ్రంగా ఉండకపోవటం, చివరి దశ వరకూ కంట్లో అసౌకర్యం కలగకపోవడంలాంటి కారణాల వల్ల గ్లకోమాను ముందుగానే కనిపెట్టడం కష్టం. అప్రమత్తతతో కళ్లను ఎప్పటికప్పుడు పరీక్షించుకుంటూ గ్లకోమాను తొలి దశలోనే కనిపెట్టే ప్రయత్నం చేయాలి. అప్పుడే చికిత్స సులువవుతుంది.
- ఒక కన్ను మూసి రెండో కన్ను తెరచి చూసినప్పుడు మార్పు స్పష్టంగా తెలుస్తుంది. ఇలా కళ్లను పరీక్షించుకోవడం ద్వారా గ్లకోమాను ప్రారంభ దశలోనే గుర్తించవచ్చు.
- సాయంత్రం చీకటిపడే సమయంలో కంట్లోని యాంగిల్ మూసుకుపోతుంది. ఫలితంగా కంట్లో ఒత్తిడి పెరుగుతుంది. కాబట్టి ఆ సమయాల్లో కంట్లో అసౌకర్యం, నొప్పి లక్షణాలు కనిపిస్తాయి.
- తల బరువుగా ఉండటం.
- కంట్లో విపరీతంగా ఒత్తిడి పెరిగిపోయినప్పుడు 'అటాక్స్' వస్తాయి. అప్పుడు కన్ను ఎరుపెక్కి, రెప్పలు వాచిపోయి విపరీతమైన నొప్పి రావొచ్చు.
- వెలుగుతున్న బల్బ్లను చూసినప్పుడు వాటి చుట్టూ రంగులు కనిపించటం. (యాంగిల్ క్లోజర్)
- కంటి చూపు విస్తారం క్రమంగా తగ్గుతుంది. అది కొంతకాలానికి పూర్తిగా కుదించుకుపోయి చూపు పోతుంది.
- గ్లకోమా వ్యాధి వచ్చే అవకాశాలు వయసు తోపాటు పెరు గుతాయి. కాబట్టి 40 ఏళ్లు దాటిన ప్రతి ఒక్కరూ కంటి వైద్యుల్ని సంప్రదించి గ్లకోమా చెకప్ చేయించుకోవాలి.
కారణాలు
గ్లకోమా ఎవరికైనా, ఎప్పుడైనా రావొచ్చు. ఇందుకు ఎన్నో కారణాలున్నాయి.
మధుమేహం, రక్తపోటు, హైపర్ టెన్షన్, గుండె జబ్బు తదితర కారణాల వల్ల కంటికి రక్త ప్రసారం తగ్గటం మూలంగా కూడా గ్లకోమా రావొచ్చు.
- వంశపారంపర్యంగా సంక్రమించవచ్చు.
- కంటికి తగిలే దెబ్బల వల్ల కూడా కంట్లో గ్లకోమా రావొచ్చు. (ట్రామాటిక్ గ్లకోమా)
- వ్యాధుల నివారణలో భాగంగా విచ్చలవిడిగా స్టిరాయిడ్స్ వాడేవాళ్లు గ్లకోమా బారిన పడే ప్రమాదం ఉంది.
పరీక్షలు
గ్లకోమా రకం, దశ, కారణాలను తెలుసుకోవడం కోసం పలు రకాల పరీక్షలు అందుబాటులో ఉన్నాయి.
గోనియోస్కోపీ: ఆక్వియస్ హూమర్ ప్రవాహానికి తోడ్పడే యాంగిల్లో తలెత్తిన ఇబ్బందిని ఈ పరీక్షతో గుర్తించవచ్చు.
ఆప్టిక్ డిస్క్ ఇవాల్యుయేషన్: కంట్లోని ఆప్టిక్ నర్వ్కి జరిగిన నష్టాన్ని అంచనా వేయవచ్చు.
చికిత్సలు
గ్లకోమాను పూర్తిగా నివారించటం అసాధ్యం. చికిత్సతో వ్యాధి మరింత ముదిరిపోకుండా అదుపు చేయవచ్చు. రోగి వయసు, గ్లకోమా రకం, కారణం, దశ, సంబంధం ఉన్న వ్యాధులు, అలర్జీలు ఇలా అనేక అంశాలను పరిగణనలోకి తీసుకుని చికిత్సను దశలవారీగా అందించాలి. నోటి మాత్రలు, సిరప్, చుక్కల మందులు, ఇంజెక్షన్లను వైద్యుల సూచనల మేరకు తీసుకుంటే వ్యాధి అదుపులోకొస్తుంది. యాంగిల్ క్లోజర్ గ్లకోమాను సరిదిద్దడం కోసం 'లేజర్ ట్రీట్మెంట్' ఇస్తారు.
గ్లకోమా రాకుండా ఉండాలంటే?
వంశపారంపర్యంగా వచ్చే ప్రైమరీ గ్లకోమాను నియంత్రించే అవకాశాలు లేకపోయినా అప్రమత్తతతో వ్యాధి ముదిరిపోకుండా చికిత్సతో అదుపు చేయవచ్చు. అలాగే ఇతర వ్యాధుల ప్రభావం, స్టిరాయిడ్ మందులు, ప్రమాదాల వల్ల వచ్చే గ్లకోమాలను కూడా కొన్ని ముందు జాగ్రత్త చర్యలతో నివారించవచ్చు.
- వంశపారంపర్యంగా గ్లకోమా వచ్చే అవకాశం ఉన్న వ్యక్తులు క్రమం తప్పక వైద్యుల చేత కంటి పరీక్షలు చేయించుకోవాలి.
- స్టిరాయిడ్స్ వాడకం వీలైనంత తగ్గించాలి.
- కళ్లను బాధించే చిన్న చిన్న రుగ్మతలకు వైద్యుల ప్రమేయం లేకుండా స్టిరాయిడ్ కలిగిన చుక్కల మందులు వాడేయకూడదు.
- కళ్లకు దెబ్బలు తగలకుండా కాపాడుకోవాలి.
- ఆటలు ఆడేటప్పుడు ఎంతో జాగ్రత్తగా ఉండాలి.
- రక్తపోటు, హైపర్ టెన్షన్ అదుపులో ఉండేలా చూసుకోవాలి.
- మధుమేహులు చక్కెర స్థాయిల్ని అదుపులో ఉంచుకోవాలి.
- టపాసులు కాల్చేటప్పుడు నిప్పు రవ్వలు కంట్లో పడకుండా చూసుకోవాలి. ఈ ప్రమాదాల వల్ల కూడా కళ్లలో గ్లకోమా రావొచ్చు.
- కంటి చూపులో ఏ చిన్న తేడా వచ్చినా వెంటనే వైద్యుల్ని సంప్రదించాలి.
- ఒక కంటిని మూసి ఉంచి రెండో కంటి చూపును పరీక్షించుకోవాలి. ఇలా రెండు కళ్లనూ స్వీయ పరీక్ష చేసుకుంటూ గ్లకోమాను ప్రారంభ దశలోనే గుర్తించే ప్రయత్నం చేయాలి.
- డాక్టర్ ప్రణతి,
కన్సల్టెంట్ ఆప్తల్మాలజిస్ట్,
కిమ్స్ హాస్పిటల్స్, సికింద్రాబాద్
Authorization