గల్లీల్లోని జిమ్లు సైతం హౌస్ఫుల్గా ఉంటున్నాయి. ఏ పార్క్లో చూసిన అన్ని వయసుల వారు బిజీబిజీగా కనిపిస్తున్నారు. అందరి లక్ష్యం వ్యాయామం. ఆరోగ్యం! అదుపుతప్పుతున్న ఆహారపు అలవాట్లు, మారుతున్న జీవనశైలులు, హార్మోన్ల హెచ్చుతగ్గులపై ప్రభావం చూపిస్తూ ఆరోగ్యాన్ని దెబ్బతీస్తున్నాయి. దాంతో ఎవరికి వారు ఎంతో కొంత వ్యాయామం చేయడానికి సన్నద్ధం అవుతున్నారు. మరి తమకు తగిన వ్యాయామాన్ని ఎలా ఎంచుకోవాలి? ఏ ప్రాతిపదికన, ఏ అంశాల ఆధారంగా వ్యాయామ నియమాల్ని పాటించాలి అన్నది తెలుసుకుంటే వ్యాయామం ద్వారా ఆరోగ్యం దక్కుతుంది. లేకపోతే మరిన్ని సమస్యలు వచ్చే ప్రమాదం ఉంది.
శక్తిని ఖర్చుచేసేలా..
వ్యాయామం ముఖ్య ఉద్దేశం శరీరంలో కొవ్వును కరిగించడమే. వ్యాయామ పద్దతులన్నింటిలో ఏరోబిక్స్ చేయడం వల్ల ఎక్కువ శక్తి ఖర్చవుతుంది. ఏరోబిక్స్ కీళ్ల సమస్యలు లేని ఏ వయసువాళ్లైనా చేయవచ్చు. వయసులవారీగా ఏరోబిక్ వ్యాయామాలు ఉంటాయి. టీనేజర్లు, యూత్ పవర్ ఏరోబిక్స్ చేస్తే మంచిది. స్కిప్పింగ్, వెయిట్ లిఫ్టింగ్, ట్రెడ్మిల్, సైక్లింగ్ చేస్తే మంచిది.
మధ్యవయసులో ఉన్న మహిళల కోసం రెండు రకాల వ్యాయామ పద్ధతులు ఉంటాయి. వెయిట్ బేరింగ్, నాన్ వెయిట్ బేరింగ్ పద్ధతులో వ్యాయామం చేయాలి. కాళ్ల మీద నిలబడి చేసే వ్యాయామాలు 'వెయిట్ బేరింగ్', కూర్చుని చేసే వ్యాయామాలు 'నాన్ వెయిట్ బేరింగ్' అంటారు. కూర్చుని చేసే వ్యాయామాలతో ఫిట్నెస్ పెంచుకోవాలంటే 'స్టాటిక్ సైక్లింగ్' (కదలకుండా తొక్కే సైకిల్) చేయాలి. ఆర్థ్రయిటిస్ ఉన్న వారిలో ఈ వ్యాయామం వల్ల కీళ్ల మీద బరువు పడదు. 30 నుంచి 50 ఏండ్ల వయసు మహిళలు, ఆర్థ్రయిటిస్ లేనివాళ్లైతే స్టాటిక్ సైక్లింగ్కు బదులుగా సైక్లింగ్ చేయవచ్చు.
50 ఏండ్లు పైబడిన వారు చేతులు, కాళ్లను కదిలించేలా ఏరోబిక్స్ చేయాలి. స్టాటిక్ సైక్లింగ్, వాకింగ్ చేస్తే మంచిది. యోగా చేయాలనుకునేవారు తేలికగా ఉండే ఆసనాలు ఎంచుకోవాలి. ప్రాణాయామం చేయాలి. కీళ్ల నొప్పులు ఉండేవాళ్లు పద్మాసనంలో కూర్చుని చేసే వ్యాయామాలు మానేయాలి.
ఆరునెలలకో సారి..
వ్యాయామం మొదలు పెట్టే ముందు ఫిజియోథెరపిస్ట్ను సలహా తీసుకోవాలి. వయసు, శరీర బరువు, ఆరోగ్య సమస్యల వివరాలను చెప్పి, తగిన వ్యాయామాలను సూచించమని అడిగితే మంచిది. కొంతమంది మహిళలు ఇంటిపనే వ్యాయామంగా భావిస్తూ ఉంటారు. కానీ ఇంటిపనితోపాటు ప్రతిరోజూ కచ్చితంగా అరగంటపాటు వ్యాయామం చేయడం ఆరోగ్యానికి మంచిది. వ్యాయామం చేసిన తర్వాత వచ్చే మార్పును వైద్యపరంగా తెలుసుకోవాలి. 'బోన్ మినరల్ డెన్సిటీ' పరీక్ష ఆరు నెలలకోసారి చేయించుకుంటే, ఎముకల్లో క్యాల్షియం ఎంత పెరిగిందో తెలుసుకోవచ్చు. క్యాల్షియం పెరుగుదల కనిపిస్తే చేస్తున్న వ్యాయామం సరైనదే అన్నది స్పష్టమవుతుంది.
ఆర్థ్రయిటిస్ ఉన్నా వాళ్లు బరువులు ఎత్తే వ్యాయామాలు చేయకూడదు. ట్రెడ్మిల్ మీద నడిచేటప్పుడు అనుకూలంగా ఉండే వేగంలోనే నడవాలి. స్టాటిక్ సైక్లింగ్ చేసేటప్పుడు కూడా కీళ్ల మీద ఒత్తిడి పడకుండా చూసుకోవాలి.
Authorization