Authorization
Mon Jan 19, 2015 06:51 pm
స్త్రీ కావచ్చు, భూమి కావచ్చు, ఆడవి కావచ్చు వీటిని నాశనం చేయడానికి, జీవం లేకుండా చేయడానికే మనవ జాతి ప్రస్తుతం పూనుకుంది. ఆడ బిడ్డలను పుట్టకముందే చిదిమేస్తున్నారు, భూమిని ఇష్టం వచ్చినట్లు దోచుకుటున్నారు, అడవిని కసి తీరా నరికేస్తున్నారు. ఇవి మూడు రాబోయే తరాల వినాశనానికే దారి తీస్తాయి అన్నది అర్థం. కాని అహంకార సమాజానికి వారు చేసే తప్పిదాలను చెప్పే ప్రయత్నం చేసిన ఒక చిన్న సినిమా ఒరియా భాషలో వచ్చిన ''జంగల్ డాకుచే ఆ''. పెద్ద సినిమాకున్న హంగులేమీ దీనికి లేవు. కేవలం గంట మాత్రమే నిడివి ఉన్న ఈ ఒరియా చిత్రం గొప్ప నిజాయితీతో తీసిన సినిమా. అందుకే ఈ సినిమాని ప్రత్యేకంగా ఇక్కడ ప్రస్తావించాలి. ''జంగల్ డాకుచే ఆ'' అంటే అడవి పిలుస్తుంది రా... ఈ సినిమాలో కథానాయిక పియరి. ఆఖరున పియరి ఊరివారిని ఎదిరిస్తూ స్త్రీ, భూమి, అడవికి జరుగుతున్న అన్యాయాన్ని ప్రశ్నించడం, అసలు ఆ విషయాన్ని ప్రస్తావించిన విధానమే ఈ సినిమాను ఉన్నత స్థాయిలో నిలబెడుతుంది. మొత్తం సినిమా టీం చెప్పాలనుకునే విషయాన్ని ఏ కతిమత్వానికి లొంగకుండా చెప్పిన తీరు ఈ చిన్న సినిమాకు గొప్ప విలువను ఆపాదిస్తుంది. అందుకే ఒక గొప్ప స్త్రీ పాత్రగా పియరిని ఈ వారం చర్చించుకుందాం.
ఒక అడవి మధ్య చిన్న ఊరు. అందులో నేత్రా అనే ఒక రైతు. అడవిని తల్లిగా భావించి జీవించే పేద రైతు ఇతను. తన తాతలు నాటిన అడవిని సంరక్షించడం తన భాద్యతగా భావిస్తుంటాడు. కాని మారుతున్న ఊరు భావజాలం అతన్ని ఒంటరిని చేస్తుంది. ఆ ఊరి వారందరూ ఏదో విధంగా అడవి మీద ఆధారపడి బతుకుతున్న వారే. కాని అడవిపై ప్రేమలో అందరూ ఒక్కటిగా ఉండదు. ఆ ఊరిలో సాధు అనే ఒక వ్యక్తి మరణిస్తాడు. అతన్ని పులి చంపిందని ప్రచారం జరుగుతుంది. పులి గోరు గుర్తులు సాధు శవంపై కనిపిస్తాయి. కాని ఆ విషయాన్ని నేత్ర నమ్మడు. ఎప్పుడో తాతల సమయంలో తప్ప పులి అడవిలో కనిపించడం ఇప్పటిదాకా జరగలేదని, ఇప్పుడు హఠాత్తుగా పులి మనిషిని చంపడం ఏంటని అతని వాదన. పైగా తాము పూజించే అమ్మవారి వాహనం పులి అని అది తమను ఏం చేయదని అతని నమ్మకం. అందుకే ఊరంతా అడవి వైపుకి వెళ్ళడానికి ఇష్టపడకపోయినా అతను అడవిలోకి వెళ్తాడు. దారిలో ఆ ఊరికి కొత్తగా వచ్చిన ఫారెస్ట్ ఆఫీసర్ అతన్ని అటకాయించడంతో పులి పేరుతో ఏదో మోసం జరుగుతుందని నేత్రకు అర్థం అవుతుంది. ఊరందరూ అతన్ని అడవిలోకి వెళ్ళవద్దు అన్నందుకు అతను వారితో వైరం పెట్టుకుంటాడు. కూతురు పియరీతో మాత్రం తనకేదైనా జరిగితే అడవిని సంరక్షించే భాధ్యత తను తీసుకోవాలని మాట అడుగుతాడు. కూతురు ఆ భాధ్యత తీసుకుంటుందని కూడా అతని నమ్మకం. అతనికి తాను అడవిని సంరక్షిస్తానని పియరి మాట ఇస్తుంది.
ఆ ఊరి పెద్ద చిన్న చిన్న రైతులకు అప్పు ఇస్తూ ఉంటాడు. అతన్ని అడవిని నకడం వలన చాలా సంపాదించవచ్చని ఊరి వారితో ఆ సంగతి చెప్పి కొంత మందిని ఆ పనికి ఒప్పించమని ఫారెస్ట్ ఆఫీసర్ చెబుతాడు. దానికి కొంత డబ్బు కూడా ముట్టజెబుతాడు. డబ్బు మోహంతో నిజంగానే అడవిని నరుకుదాం అని, అలా పులి నుండి కూడా తమను తాము కాపాడుకోవచ్చని ఊరి పెద్ద కొందరు గ్రామస్తులకు చెబుతారు. తమ పేదరికం అడవిని నరకడంతో పోతుందని విని వారు అందుకు అంగీకరిస్తారు. కాని నేత్ర ఆ పనికి ఒప్పుకోడు. తన ప్రాణాలు ఇచ్చయినా అడవిని కాపాడుకుంటానని, బతకడానికి తల్లి లాంటి అడవిని నరకవలసిన అవసరం లేదని, కష్టపడి చేసే పనులు చాలా ఉన్నాయని నేత్ర ఎదురు తిరుగుతాడు.
మరుసటి రోజు నేత్ర శవాన్ని ఆ ఊరిలోని ఒక పిచ్చివాడు అడవి నుండి మోసుకొస్తాడు. అతని శవంపై కూడా పులి గోర్ల గుర్తులు ఉంటాయి. తమ మాట వినకుండా అతను అడవికి వెళ్ళడం, ఊరందరిని ఎదిరించడం తప్పు అని, అందువలన అతని శవ దహన సంస్కారాలకు కూడా తాము సహాయం చేయమని, ఊరి మాట వినని వాడిని వెలివేస్తాం అని ఊరందరూ ప్రకటిస్తారు. బతిమాలినా సహాయపడని గ్రామస్తుల ముందు నిస్సహాయంగా ఆ పిచ్చివాడు మరో మరుగుజ్జు సహాయంతో పియరి తండ్రి అంతక్రియలు నిర్వహిస్తుంది. ఎవరూ మాట్లాడక ఆ ఊరిలో ఒంటరిగా మిగిలిపోతుంది. ఆ ఊరి పెద్ద కొడుకు నీరా కాలేజీలో చదువుకుంటూ ఉంటాడు. పట్నం వెళ్ళి ఉద్యోగం చేయడం అతనికి ఇష్టం ఉండదు. ఊరి వారి బాగు కోసం తన చదువును ఉపయోగిస్తూ తండ్రిలాగే వ్యవసాయం చేసుకుంటానని అతను చెప్పినప్పుడు అతని స్నేహితులు ఆశ్చర్యపోతారు. తండ్రి డబ్బు కోసం అడవిని కొట్టే పని చేయబోతున్నాడని అతనికి పియరి ద్వారా తెలుస్తుంది. నీరా, పియరి బాల్య స్నేహితులు. విషయం తెలిసి నీరా తండ్రిని మందలిస్తాడు. అడవిని కాపాడడం తమ భాధ్యత అని తండ్రికి బోధ చేయబోతాడు. తండ్రి అహం దెబ్బతింటుంది. కొడుకు తనను ఎదిరించడానికి కారణం పియరి అని ఆమెను ద్వేషించడం మొదలెడుతుంది నీరా కుటుంబం.
పియరి ఒంటరిదయి అడవిని తాను ఒక్కత్తి ఎలా కాపాడగలను అని భయపడుతున్నప్పుడు, తండ్రికిచ్చిన మాట నేరవేర్చలేనని భాధపడుతున్నప్పుడు నీరా అతని స్నేహితులు ఆమెతో కలుస్తారు. తాను ఆమె ఆశయానికి తోడుంటానని నీరా చెప్పడం వల్ల పియరి బలం పుంజుకుంటుంది. ప్రతి ఇంటికి వెళ్ళి ప్రతి ఒక్కరిని కలిసి మొక్కలు నాటి అడవిని సంరక్షించమని ప్రేరేపించాలని ఆ బందం ప్రయత్నిస్తుంది. కాని ఈ చిన్నవారి ప్రయత్నంలోని గొప్పతనాన్ని పెద్దలు అర్థం చేసుకోరు. అయినా ఆ యువకులు ఒక బందంగా ఏర్పడి కొన్ని మొక్కలను నాటి వాటికి నీరు పోసి అడవిని పెంచే పని చేస్తూ ఉంటారు. ఫారెస్ట్ ఆఫీసర్ ఈ పరిణామాలకు బెదిరి ఊరి పెద్దను బెదిరిస్తాడు. పిల్లలను ఆ పని నుండి విరమించుకునేలా చేయమని చెబుతాడు. ఆ యువకుల తల్లితండ్రులు ఏదో సమయంలో తన దగ్గర అప్పు తీసుకున్న వారే కాబట్టి ఆ ఊరి పెద్ద వారి తల్లి తండ్రులను బెదిరించి వారి పిల్లలు అడవి వైపు రాకుండా చేయగలుగుతాడు. కాని అతని కొడుకు నీరాని ఆపడమే అతనికి కష్టమవుతుంది. ఆ రాత్రి కూడా నీరా అడవిలోకి కాపలాకు వెళతాడు. పులి అతన్ని చంపేస్తుంది. విషయం తెలిసి పియరి హతాశురాలవుతుంది. తన బిడ్డ చావుకు ఆమే కారణం అని నీరా తల్లి అనడం ఊరంతా ఆమెను దెయ్యం అని అనడం భరించలేక పియరి అడవిలోకి వెళ్ళిపోతుంది.
ఫారెస్ట్ ఆఫీసర్ తన స్నేహితులతో ఆ ఊరిలో చావులన్నిటికి తనే కారణం అని ఆ మాత్రం భయం లేకపోతే ఆ ఊరి జనం అడవిని నరకడానికి ఒప్పుకోరు అని ఆ ఊరి పెద్దను మోసం చేయకపోతే ఊరి సహకారం తమకు అందదని చెబుతున్నది విని పియరి జరిగిన విషయాలు అర్థం చేసుకుంటుంది. ఊరి పెద్దకు వచ్చి జరుగుతున్న మోసం గురించి చెప్పినా అతను నమ్మడు. ఊరిలో జనం మాత్రమే ఎందుకు చనిపోతున్నారు ఆ పులి అడవిలో మేతకు వెళ్ళిన జంతువులను ఎందుకు చంపట్లేదు అని అడిగిన పియరి మాటలు ఆ భార్యాభర్తలు పట్టించుకోరు. ఊరంతా అడవిని కొట్టడానికి వెళ్ళినప్పుడు వాళ్ళు చేస్తున్న తప్పు చెప్పి అడవిలో చెట్ల కన్నా ముందు తన మెడ నరకమని పియరి వారిని అటకాయిస్తుంది. ఆ ఊరి విషయం కొందరి యువకుల ద్వారా తెలుసుకున్న పై ఆఫీసర్ వచ్చి ఆపడం, ఆ ఫారెస్ట్ ఆఫీసరే ఈ హత్యలు చేసాడని నీరా స్నేహితులైన యువకులు నిరూపించడం ఊరంతా పియరీకి క్షమాపణ చెప్పి ఆ ఊరిపెద్ద ఆమెను తన కూతురుగా స్వీకరించడంతో సినిమా ముగుస్తుంది.
అంత పెద్ద సమస్య అంత సులువుగా పరిష్కారమవడం కొంత సినిమాటిక్గా అనిపించినా పియరీ పాత్రను మలచిన తీరు బావుంటుంది. చాలా సహజమైన వాతావరణంలో సహజంగా నటించిన టీంలోని అందరి నటన ఆకట్టుకుంటుంది. సరోజ్ కుమార్ దాష్ ఈ సినిమాకి కథ అందించి దర్శకత్వం చేశారు. స్క్రీన్ పై వచ్చే పేర్ల ఆధారంగా ప్రధాన తారాగణంను కనుక్కుని పోల్చుకోవడం కష్టంగా ఉన్న కారణంగా పియరీ పాత్ర వేసిన నటి పేరు తెలుసుకోలేక పోయాను. ఏ భాషలో సినిమా వచ్చినా, ఏ స్థాయి సినిమా అయినా ఒక మంచి ఉద్దేశంతో, ప్రజల మధ్యకొచ్చే కళారూపాన్ని ఆదరించడం మన కర్తవ్యం అన్న భావనతో ఎంతో నచ్చిన ఈ మంచి సినిమాలోని పియరీ పాత్రను సినీ ప్రేమికులతో పంచుకోవడం అవసరం అని అనిపించింది. నేను చూసిన భారతీయ సినిమాలోని గొప్ప స్త్రీ పాత్రల మధ్య ఈ ఒరియా సినిమాలోని పియరికి స్థానం ఇవ్వడం సముచితంగా అనిపించింది. యూ ట్యూబ్లో ఈ సినిమా ఇంగ్లీష్ సబ్ టైటిల్స్తో అందుబాటులో ఉంది. అడవి కోసం తండ్రిని, ప్రేమించిన వ్యక్తిని పోగొట్టుకున్నా కూడా తాను కూడా బలి కావడానికి సిద్ధపడిన పియరి నిజంగా గొప్ప పాత్ర.
- పి.జ్యోతి,
9885384740