Authorization
Mon Jan 19, 2015 06:51 pm
అసలు లోకమనగానేమి? అంటే కొందరు ఇదని కొందరు అదని రకరకాలుగా విడమర్చి విప్పి చెప్తారు కాని చెప్పడానికి ఏముందసలు? లోకం అంటే ఇచ్చి పుచ్చుకోవడం తప్ప మరేం కాదు. ఇదో పెద్ద 'క్విడ్ప్రోకో'. ఇంకా కొంచెం లోతుకి మునిగితే ఏముంది లోకం అంతా కొనడమూ అమ్మడమే!
మాల్లో వస్తువులు కొంటాం. గుళ్ళో పుణ్యం కొంటాం. ఆస్పత్రిలో ఆరోగ్యం కొంటాం. హౌటల్లో ఇడ్లీ సాంబార్ కొంటాం. అవసరమైతే మనుషుల్ని కొంటాం. చుట్టాల్నీ పక్కాల్నీ స్నేహితుల్నీ మనుషుల మధ్య సం బంధాల్నీ కొంటాం. అన్నీ కొంటమే. కొంటం కోసం అమ్మడమే. అమ్మడం కోసం ఇచ్చుకోవడం పుచ్చుకోవడం యింతేకదా లోకం. ఎంత నలగ్గొట్టినా, ఎంత సాగదీసినా ఎంత కరగబోసినా!
అనగా అనగా అదో జమానా లో ఓ రాజ్యం ఉండేది. దాని కోసం రాజూ రాణికో కొడుకూ ఉండే వారు. రాజు కొడుక్కి కష్టమంటే తెలీదు. ఎక్కడానికి ఏనుగులూ, ఈదడానికి సరస్సులూ, ధారళంగా గాలి పీల్చడానికి ఉద్యాన వనాలూ వాటిల్లో లేళ్ళూ నెమళ్ళూ చదువు చెప్పటానికి పంతుళ్ళూ సమకూ ర్చారు రాజుగారు. ఏ వయస్సులో ముచ్చట ఆ వయస్సులోనే ముచ్చట గనక రాజావారి కొడుకు అబ్బాయి కనక ఓ అమ్మాయినిచ్చి పెళ్ళి చేశారు. పెళ్ళయ్యేక చిన్న రాజావారికి ఓ బుల్లి రాజావారు పుట్టారు. అంతా సాఫీగా సజావుగా అవుటర్ రింగ్ రోడ్డు మీద స్పోర్ట్స్ బైక్లా పరుగెడ్తున్నది. కాకపోతే చిన్న రాజావారికి లోకానికి సంబం ధించి కొన్ని కొత్త విషయాలు తెలిశాయి. పంతుళ్ళు తనకు చెప్పిన చదువు వొట్టి చదువేకాని జ్ఞానం కానేకాదని జ్ఞానమనేదే లేనివాడు మనిషనే వాడు కానేకాదని వో అర్ధరాత్రి పూట కోట గుమ్మంలోంచైతే దొరికిపోతామనీ దొడ్డిదారిన కోట దూకేశాడు.
జ్ఞానమంటే ఏమిటో తెల్సుకోడానికి కాళ్లు అరిగేట్టు తిరిగి 'టైరై'పోయి ఓ పెద్ద చెట్టు కింద కూలబడ్డాడు. ఆ చెట్టు నీడలో అది విసిరిన గాలిలో చిన్న రాజా వారికి జ్ఞానోదయం అయింది. అది అలాంటిలాంటి జ్ఞానంకాదు. లోకమంతా 'స్ప్రెడ్'అయింది.
అసలు అదీ జ్ఞానమంటే. అసలాజ్ఞానమే ఉంటే లోకం ఏమిటో తెల్లగా తేటమవుతుంది. జ్ఞానమనే ంండక్షరాల పదం చాలా బరువైనదీ లోతైనదీ అంతులేనిదీ అంతు చిక్కనిదీ! పూరానా జమానా లోంచి నయా జమానాలోకి వద్దాం. జ్ఞానమనే మాట ఈ రోజుల్లోనూ వినపడేదే. జ్ఞానమంటే బుద్ధి అని కొందరు తర్జుమా చేస్తారు. జ్ఞానమో బుద్ధో ఈ మాటలు మరీ చిక్కు ముళ్ళయ్యేయి మనుషుల బయోగ్రఫీల్లో.
అయిదేళ్ళు దాటిన అబ్బాయి వీపు మీద గుద్దుతో పాటు వెధవకి బుద్ధిలేదు అన్న మాటలు వినపడ్తయి. ఆ తర్వాత పదేళ్ళు వచ్చి దాటినయి అయినా వెధవకి బుద్ధి లేదు జ్ఞానం లేదు అన్న మాటల్తో వాడి నుదురు బొప్పి కడుతుంది. మైండ్ బ్లాకవడమే కాదు బ్లాంకు కూడా అయిపోతుంది.
ఒంట్లోనే కాదు స్కూల్లో టీచర్లు కూడా బుద్ధి జ్ఞానాల్ని విరివిగా వాడేస్తుంటారు. హౌం వర్కు చెయ్యకపోతే బుద్ధిలేదు అంటారు. అడిగిన ప్రశ్నలకి జవాబులు చెప్పలేక 'వాటర్' నములుతుంటే జ్ఞానం లేదు అంటారు. ఇంటా బయటా బుద్ధీ జ్ఞానమూ లేదనే వారే కాని బుద్ధి అంటే ఏమిటో జ్ఞానం అంటే ఏమిటో సెలవిచ్చే వారు కనపడనే కనపడరు. తెలుగును ఇంగ్లీషులో చెప్పే పంతుళ్ళు, ఇంగ్లీషును తెలుగులో చెప్పే పంతుళ్ళు, చరిత్ర భూగోళమూ, సైన్ను చెప్పే పంతుళ్ళూ, లెక్కల్తో డొక్క చింపేసే పంతుళ్ళు ఉంటారు. కానీ బుద్ధి జ్ఞానమూ చెప్పడానికి ఒక్క పంతులు కూడా ఉండడు.
అబ్బాయి యువకుడైనా కూడా ఈ బుద్ధీ జ్ఞానమూ జాడ తెలవకుండా ఉండి పోతయి. కాలేజీలో కూడా ఇంగ్లీషూ, సంస్కృతమూ, సైన్సూ, లెక్కలు అమ్ముతారు కానీ బుద్ధీ జ్ఞానమూ అమ్మరుగాక అమ్మరు. బాగా రాచిరంపాన పెట్టి బుర్ర చింపి ఫార్ములాలు వేసి కుక్కి బట్టీ పెట్టించి కాల్చి ర్యాంకులు తెప్పించే వారే కానీ బుద్ధి జ్ఞానమూ చెప్పే వారు వుండరు. టైమంతా హుటాహుటీగా పోటా పోటీగా ర్యాంకుల రణక్షేత్రంగా, కౌన్సిలింగుల కురుక్షేత్రంగా గడిచి పోతుంది.
కాలం గడవగా గడవగా చదువుకీ, బుద్ధి జ్ఞానాలకి సంబంధం లేదని అర్థమవుతుంది. ఎంత చదువు చదివి ఎన్ని విన్నను గాని హీనుడవగుణంబు మానలేడు అన్నాడో కవి. చెట్టు కింద జ్ఞానం సంపాదించి చిన్న రాజావారు చదువంటే నాలుగు గోడల మధ్య ఘోషకాదని ఈ లోకమనేది ఒక పెద్ద పాఠశాల అని మనిషి అనుభవాలే పాఠాలని తెలుసుకున్నాడు. అంచేతే చెడు మార్గం నుంచి మంచి మార్గంలోకి నడవాలని, చీకట్లోంచి వెలుతురులోకి ప్రయాణించాలనీ చెప్పారు.
మనిషి లోపల వున్న మృగాన్ని, రాక్షసుడ్ని బయటకు తరిమి సత్యం, ధర్మం, కరుణ, ప్రేమ, సమత్వ వంటి విలువల్ని మేలుకొలిపే జ్ఞానం కానీ బుద్ధి కానీ ఎవరూ అమ్మడం లేదు. అరువివ్వడం లేదు. ఉచిత బోధన అంతకంటే లేదు.
లోకంలో ఎంటరయ్యిన్నాట్నించి ఎగ్జిట్ అయ్యేదాకా 'ఏళ్ళొ చ్చేయి ఏం లాభం బుద్ధీజ్ఞానమూ రాలేదు'అని అనిపించుకోని చదువు చదువుకోవలసిందే కాని కొనవలసింది కాదు!!
- చింతపట్ల సుదర్శన్,
9299809212