Authorization
Mon Jan 19, 2015 06:51 pm
అదో చెట్టు. ఆ చెట్టు కింద వో అరుగు. అరుగు మీద చాప. దాని మీద ఓ పంజరం. ఆ పంజరంలో అట్నించి ఇటు ఇటు నించి అటు తిరుగాడే ఓ చిలక పచ్చని చిలక. దాని ముక్కు ఎరుపు. పంజరాన్ని ఆనుకుని కూచున్న మనిషి కట్టుకున్నది ధోవతి. వేసుకున్నది పొడుగు చేతుల చొక్కా. పెట్టుకున్నది ముఖం మీద మూడు విభూతి రేకలు. వాటి మధ్య ఎరుపు బొట్టు. పంజరానికి ఎదురు గుండా ఉంది అట్టముక్కల దొంతర. ఆ అట్ట ముక్కల్లో ఉన్నది దేవుళ్ళు. ముక్కోటి దేవతల్లో ముఖ్యమైన వాళ్ళు.
తలమాసిన వాడు, తల్లో జుట్టు లేని వాడు ముఖం నిండా గడ్డమున్నవాడు పాత పంచెకట్టుకున్నోడు అక్కడక్కడా చిరుగుల ప్యాంటు తొడుక్కున్నోడు. ఏ వేషమయితేనేం ఏ మనిషయితేనేం అందరూ ముఖం వేళ్ళాడేసుకుని వచ్చేవాళ్ళే అందరి ముఖాల్లోనూ క్వశ్చన్ మార్కులే. చిలక చెప్పే ఫ్యూచర్ కోసం వచ్చే వాళ్ళందరి ముఖాల్లోనూ ముందు అగనా ముందు ముందు యేం జరగబోతున్నదో తెల్సుకోవాలన్న ఆరాటమే. ఇప్పుడున్న దరిద్రం యిలాగే కంటిన్యూ అవుతుందా లేక ఏ పగలో రాత్రో లక్ష్మీదేవి విష్ణుమూర్తిని వదిలేసి తమ ఇంట్లోకి వచ్చేస్తుందా అని తెల్సుకోవాలనే ఆరాటమే. ఈ జలుబూ జబ్బూ తుమ్మూ దగ్గూ ఆయాసమూ ఎంతకాలం పీడిస్తయి ఎప్పుడు వొదిలేసి వెళ్లయి అని తెల్సుకోవాలనే ఆరాటమే. ఇంకా ఇలాంటి ఆరాటాలనేకమే.
ఈ ఆరాటాలకి జవాబు చిలక. చిలక పంజరంలోంచి బయటకి నడిచి వచ్చి ముక్కుతో ఓ దేవుడ్నో దేవతనో పైకి లేపి తన 'బాస్'కి అందించి పంజరంలోకి 'రిట్రీట్' అయిపోతుంది. అట్టముక్కలో దేవుడ్ని ఎగాదిగా చూసి కళ్ళు మూసుకుని ధ్యానం చేసి ఆరాట పడేవాళ్ళకి ఊరట కలిగించే విధంగా జ్యోతిష్యం చెప్పడం చిలక జ్యోతిష్యుడికి పొట్ట కోసం వచ్చిన విద్య. అది వాళ్ళ ముఖాలను చదవడమే. కూటి కోసం కోటి విద్యల్లో ఒకటైన ఆ విద్య యిప్పుడు కనిపించటం మానేసింది. ఇప్పుడు చెట్టూ లేదు. చెట్టు కింద అరుగూ లేదు. అగురు మీద చాప చాపమీద పంజరం పంజరంలో చిలకా పక్కన జ్యోతిష్యుడు హాంఫట్!
కట్ చేస్తే టీవీ చానల్లో జ్యోతిష్యుడికి ధోవతీ వుంది. పొడుగు చేతుల చొక్కా వుంది. ముఖాన తెల్లగీతల మధ్య ముద్దొచ్చే ఎర్ర బొట్టూ వుంది. కానీ పంజరంలో చిలకే ఎగిరిపోయింది. అట్ట ముక్కల్లో దేవతలు బతుకుదేముదా అని పరారై పోయేరు. ఇప్పుడు పంజరం ఉండాల్సిన చోట కంప్యూటర్ వెలుగులు విరజిమ్ముతున్నది. పక్కనే చక్కనిచుక్క చిరునవ్వులు విసిరేస్తూన్నది. ఇప్పుడు జ్యోతి ష్యుడు ముఖం చదవటం మానేశాడు. శబ్దగ్రహణ విద్య నేర్చాడు. ఫోన్లో ప్రశ్నలు వినపడ్తయి. ప్రశ్నలకు జవాబులు చెప్పబడ్డయి. ఛానళ్ళు, జ్యోతిష్యులతో పాటు మొబైళ్ళ పొట్టలు కూడా నిండుతయి.
ఒక పట్టాన లైను దొరకదు. దొరికితే అడిగే వాడి పంట పండినట్టే.
హలో.. హలో..
చెప్పండి స్వామిజీ వింటున్నారు అని ముసిముసి నవ్వులు మెరిపిస్తుంది 'యాంకరి'.
అబ్బా ఎన్నాళ్ళకి దొరికిందిస్వామి లైను. ఎన్ని యేళ్ళ నుంచి 'ట్రై' చేస్తున్నాను అంటూ ఆ కొసన ఉన్నవాడు సంభ్రమాశ్చర్యాల్లో మునిగిపోతాడు.
అడగండి అడగండి అని తొందర పెడ్తుంది చిలక కాని చిలక.
మీ పేరేమిటి? ఎప్పుడు పుట్టారు? టైంలో ఆకాశంలో ఏ నక్షత్రం డ్యూటీలో ఉన్నది అని అడుగుతాడు స్వామీజీ. గుర్తున్నవాడు చెప్తాడు. లేని వాడ్ని ఒకటి నుంచి తొంభై అంకెల్లో ఏదో ఒక్కటి చెప్పమంటాడు. ఇష్టమైన పువ్వు లేదా దైవం ఎవరో చెప్పమంటాడు.
అడిగే వాడిది అదే ఆరాటం. అందరూ మోసం చేసే వాళ్ళే. ఎవర్ని నమ్మాలో తెలీడం లేదు. ఉద్యోగం లేదు. చదువు రావడం లేదు. పెళ్ళి కావడం లేదు. ఆరోగ్యం వుండి చావడం లేదు. ఆస్తి వస్తుందా లేదా? విదేశాలకు వెళ్తానా లేదా? ప్రశ్నలు.. ప్రశ్నలు. అవే ప్రశ్నలు అదే ఆరాటం. ముందు.. ముందు.. ఏం జరుగుతుంది ముందు?
జవాబులు.. జవాబులు.. అవే జవాబులు.. అంతా మంచే జరుగుతుంది. ఇప్పుడు 'టైం' ఏమంత బాగాలేదు. శని ఎక్కడ ఉండకూడదో అక్కడ కూచుని తీరిగ్గా చెవిలో పుల్లతో కెలుకుతున్నాడు. కుజుడు ఏదో ఇంట్లో జొరబడి ఖాళీ చేయను అంటున్నాడు. గురుడు గడ్డం దువ్వుకుంటూ 'బిజీ'గా ఉండటం వల్ల ఏ ఇంట్లోకి ప్రవేశించాలో ఆ ఇంట్లోకి రాకుండా 'డిలే' చేస్తున్నాడు.
అడిగిన వాడి ముఖం వాచిపోతుంది. గుండె జారి గల్లంతయి పోతుంది. అడిగేవాడికి చెప్పేవాడు పరిస్థితులు చక్కబడటానికి 'పరిహారం' చెప్తాడు. కొబ్బరికాయలు కొట్టమంటాడు. నెయ్యి దీపాలు వెలిగించమంటాడు. ఆవుకు అరటి పళ్ళు పెట్టమంటాడు. గుళ్ళో ప్రదక్షిణాలు చెయ్యమంటాడు. ఆరు వారాలు, నలభై రోజులు నాలుగు నెలలు టైం యిస్తాడు. కరెన్సీ కట్టలు రావడానికి, ఉద్యోగం ఆఫర్ అవడానికి, మ్యారేజి సెటిలవడానికి సంతానం కెవ్వుమనడానికి ఒంట్లో జబ్బు పత్తా లేకుండా పోవడానికి.
ముందు యేం జరగబోతుందో తెల్సుకోవాలనే ఆరాటం మనిషిలో ఎప్పుడు పుట్టిందో కాని దానికి మాత్రం చావులేదు. మనిషిలోని ఆ ఆరాటాన్ని ఒక నయం అవని జబ్బుని చేసి డబ్బు చేసుకునే వాళ్ళు ఎందరో! దీన్ని ఓ కార్పొరేటు బిజినెస్ చేసి అడిగేవాడికి లక్ష్మీదేవి అడ్రసు ఇవ్వకుండా తమ విజిటింగ్ కార్డు ఇచ్చేవాళ్ళు ఎందరో! స్టోన్ శాస్త్రం ఫింగర్ రింగ్ శాస్త్రం అంకెల్లో అదృష్ట శాస్త్రం పేర్లల్లో రిపేరు శాస్త్రం ధనరాశులు కురిపించే తంత్రం అర్ధరాత్రి అదృష్టం తలుపు బాదే యంత్రం బతుకు బండిని రిపేరు చెయ్యటానికి లేని శాస్త్రం లేదు. కొత్త ఆంగ్ల సంవత్సరం 'ఎంటర్' అయినా, సరికొత్త తెలుగు సంవత్సరం వచ్చి వాలినా టీవీల్లో, యూట్యూబ్ ఛానళ్ళలో, పత్రికల్లో చిలక లేకుండానే జ్యోతిష్యం బీభత్సంగా వర్థిల్లుతున్నది.
- చింతపట్ల సుదర్శన్,
9299809212