Authorization
Mon Jan 19, 2015 06:51 pm
- భారత్ లక్ష్యం 407, ప్రస్తుతం 98/2
- రోహిత్ శర్మ అర్థ సెంచరీ
- స్మిత్, లబుషేన్, గ్రీన్ మెరుపులు
- భారత్, ఆసీస్ మూడో టెస్టు నాల్గో రోజు
సిడ్నీ (ఆస్ట్రేలియా) : సిడ్నీలో భారత జట్టు కఠిన పరీక్ష ఎదుర్కొంటుంది. 407 పరుగుల రికార్డు ఛేదనలో 98/2తో ఆశావహ పరిస్థితుల్లో కొనసాగుతోంది. ఓపెనర్ రోహిత్ శర్మ (52, 98 బంతుల్లో 5 ఫోర్లు, 1 సిక్స్) అర్థ సెంచరీతో కదం తొక్కాడు. అరంగేట్ర ఆటగాడు శుభ్మన్ గిల్ (31, 64 బంతుల్లో 4 ఫోర్లు) విలువైన ఇన్నింగ్స్ ఆడాడు. ఓపెనర్లు రాణించటంతో భారత్ నాల్గో రోజును 98/2తో ముగించింది. నేడు విజయానికి భారత్ మరో 309 పరుగులు అవసరం. కాగా, ఆస్ట్రేలియాకు మరో 8 వికెట్లు చాలు. ఐదో రోజు పిచ్పై ఆసీస్ భీకర పేస్ దాడిని ఎదురొడ్డి నిలువటం సామాన్య విషయం కాదు. చతేశ్వర్ పుజారా (9 బ్యాటింగ్), అజ్యిం రహానె (4 బ్యాటింగ్)లపైనే భారత్ అవకాశాలు ఆధారపడి ఉన్నాయి. గాయపడిన రిషబ్ పంత్, రవీంద్ర జడేజాలు నేడు బ్యాటింగ్కు వచ్చినా సహజ శైలిలో ఆడతారా? లేదా అనేది అనుమానమే. స్టీవ్ స్మిత్ (81, 167 బంతుల్లో 8 ఫోర్లు, 1 సిక్స్), కామెరూన్ గ్రీన్ (84, 132 బంతుల్లో 8 ఫోర్లు, 4 సిక్స్లు) అర్థ సెంచరీలతో ఆస్ట్రేలియా రెండో ఇన్నింగ్స్ను 312/6 పరుగులకు డిక్లరేషన్ ఇచ్చింది.
తొలి సెషన్ : మెరిసిన సైని, మురిసిన ఆసీస్
ఓవర్నైట్ స్కోరు 103/2తో నాల్గో రోజు బ్యాటింగ్కు వచ్చిన ఆస్ట్రేలియా తొలి సెషన్ను సంతృప్తికరంగా ఆరంభించింది. ఆరంభంలోనే స్టీవ్ స్మిత్కు జీవనదానం లభించటంతో ఆసీస్ భారీ స్కోరు చేసేందుకు అవకాశం ఏర్పడింది. ఆరంభంలోనే మార్నస్ లబుషేన్ 82 బంతుల్లో 6 ఫోర్లతో అర్థ సెంచరీ సాధించాడు. సిరీస్లో నిలకడగా ఫామ్ కొనసాగించాడు. డ్రింక్స్ విరామానికి ముందు నవదీప్ సైని బౌలింగ్లో లబుషేన్ వికెట్ కోల్పోయాడు. డ్రింక్స్ విరామం అనంతరం మాథ్యూ వేడ్ (4) సైతం సైని ఓవర్లోనే వికెట్ కోల్పోయాడు. అయినా, తొలి సెషన్లో ఆసీస్ 79 పరుగులు చేసింది. స్టీవ్ స్మిత్ సైతం ఐదు ఫోర్లతో 134 బంతుల్లో అర్థ సెంచరీ సాధించాడు. కామెరూన్ గ్రీన్తో కలిసి తొలి సెషన్లో మరో వికెట్ పడకుండా స్మిత్ స్కోరు బోర్డును ముందుకు నడిపించాడు. 182/4తో ఆస్ట్రేలియా లంచ్ విరామానికి వెళ్లింది. నవదీప్ సైని రెండు వికెట్లతో రాణించాడు.
రెండో సెషన్ : ఆస్ట్రేలియాకు భారీ ఆధిక్యం
తొలి ఇన్నింగ్స్లో స్ఫూర్తిదాయక శతకం సాధించిన స్టీవ్ స్మిత్ రెండో ఇన్నింగ్స్లోనూ సెంచరీ సాధించేలా కనిపించాడు. కానీ, అశ్విన్ మాయాజాలంతో స్మిత్ సెంచరీకి దూరంగా ఉండిపోయాడు. లంచ్ అనంతరం స్మిత్ సహా కామెరూన్ వేగంగా పరుగులు చేయటంతో ఆస్ట్రేలియా తిరుగులేని స్థితిలో నిలిచింది. స్మిత్, గ్రీన్ జోడి ఐదో వికెట్కు 60 పరుగులు జోడించారు. స్మిత్ నిష్క్రమించినా గ్రీన్ జోరు ఆగలేదు. 8 ఫోర్లు, నాలుగు సిక్సర్లతో కామెరూన్ గ్రీన్ విరుచుకుపడ్డాడు. కెప్టెన్ టిమ్ పైనె (39 నాటౌట్) సైతం దూకుడుగా బ్యాటింగ్ చేశాడు. గ్రీన్తో కలిసి అర్థ సెంచరీ భాగస్వామ్యం నెలకొల్పాడు. రెండో ఇన్నింగ్స్ను 312/6 వద్ద డిక్లరేషన్ ప్రకటించిన ఆస్ట్రేలియా.. భారత్కు 407 పరుగుల లక్ష్యాన్ని నిర్దేశించింది
మూడో సెషన్ : రోహిత్ శర్మ అర్థ సెంచరీ
407 పరుగుల రికార్డు ఛేదనను భారత్ దూకుడుగా ఆరంభించింది. ఓపెనర్లు వరుసగా రెండో ఇన్నింగ్స్లో శుభారంభం అందించారు. తొలి ఇన్నింగ్స్లో శుభ్మన్ గిల్ అర్థ సెంచరీ బాదగా.. రెండో ఇన్నింగ్స్లో రోహిత్ శర్మ చెలరేగాడు. ఓపెనర్గా విదేశీ టెస్టులో రోహిత్ శర్మకు ఇదే తొలి అర్థ సెంచరీ. ఆసీస్ పేస్ త్రయాన్ని సమర్థవంతంగా ఎదుర్నొన్న రోహిత్ శర్మ (52, 98 బంతుల్లో 5 ఫోర్లు, 1 సిక్స్) అలవోకగా పరుగులు పిండుకున్నాడు. గిల్ (31, 64 బంతుల్లో 4 ఫోర్లు) సైతం సాధికారికంగా ఆడాడు. ఓపెనర్లు తొలి వికెట్కు 71 పరుగులు జోడించారు. అర్థ సెంచరీ అనంతరం రోహిత్ శర్మ వికెట్ కోల్పోగా.. శుభ్మన్ గిల్ను హెజిల్వుడ్ ముందుగానే అవుట్ చేశాడు. చతేశ్వర్ పుజారా (9 నాటౌట్), అజింక్య రహానె (4)లు మరో వికెట్ పడకుండా నాల్గో రోజును ముగించారు. నాల్గో రోజు ఆట ముగిసే సమయానికి భారత్ 98/2తో కొనసాగుతోంది.
స్కోరు వివరాలు
ఆస్ట్రేలియా తొలి ఇన్నింగ్స్ : 338 ఆలౌట్
భారత్ తొలి ఇన్నింగ్స్ : 244 ఆలౌట్
ఆస్ట్రేలియా రెండో ఇన్నింగ్స్ : డెవిడ్ వార్నర్ (ఎల్బీ) అశ్విన్ 13, విల్ పకోస్కీ (సి) వృద్దిమాన్ సాహా (బి) సిరాజ్ 10, మార్నస్ లబుషేన్ (సి) వృద్దిమాన్ సాహా (బి) సైని 73, స్టీవ్ స్మిత్ (ఎల్బీ) అశ్విన్ 81, మాథ్యూ వేడ్ (సి) వృద్దిమాన్ సాహా (బి) సైని 4, కామెరూన్ గ్రీన్ (సి) వృద్దిమాన్ సాహా (బి) బుమ్రా 84, టిమ్ పైనె నాటౌట్ 39, ఎక్స్ట్రాలు : 08, మొత్తం :(87 ఓవర్లలో 6 వికెట్లకు) 312 డిక్లేర్డ్.
వికెట్ల పతనం : 1-16, 2-35, 3-138, 4-148, 5-208, 6-312.
బౌలింగ్ : జశ్ప్రీత్ బుమ్రా 21-4-68-1, మహ్మద్ సిరాజ్ 25-5-90-1, నవదీప్ సైని 16-2-54-2, అశ్విన్ 25-1-95-2.
భారత్ రెండో ఇన్నింగ్స్ : రోహిత్ శర్మ (సి) మిచెల్ స్టార్క్ (బి) పాట్ కమిన్స్ 52, శుభ్మన్ గిల్ (సి) టిమ్ పైనె (బి) జోశ్ హజిల్వుడ్ 31, చతేశ్వర్ పుజారా బ్యాటింగ్ 9, అజింక్య రహానె బ్యాటింగ్ 4, ఎక్స్ట్రాలు : 02, మొత్తం : (34 ఓవర్లలో 2 వికెట్లకు) 98.
వికెట్ల పతనం : 1-71, 2-92.
బౌలింగ్ : మిచెల్ స్టార్క్ 6-0-27-0, జోశ్ హజిల్వుడ్ 8-3-11-1, పాట్ కమిన్స్ 9-1-25-1, నాథన్ లయాన్ 9-3-22-0, కామెరూన్ గ్రీన్ 2-0-12-0.