Authorization
Mon Jan 19, 2015 06:51 pm
- యువ బ్యాట్స్మన్ శుభ్మన్ గిల్
న్యూఢిల్లీ : ఆస్ట్రేలియాతో తొలి టెస్టు అనంతరం సూపర్స్టార్ విరాట్ కోహ్లి జట్టుకు దూరమవటం టీమ్ ఇండియాకు పూడ్చలేని లోటని, కానీ అతడు గైర్హాజరీలో ఓ యువ ఆటగాడు సత్తా చాటేందుకు సిద్ధంగా ఉన్నాడని క్రికెట్ దిగ్గజాలు సచిన్, లక్ష్మణ్ సహా ఆసీస్ మాజీలు వ్యాఖ్యానించారు. దిగ్గజాల మాటలను నిజం చేస్తూ బ్యాటింగ్ లైనప్లో యువ ఆటగాడు శుభ్మన్ గిల్ అద్భుతంగా రాణించాడు. మెల్బోర్న్ టెస్టులో అరంగేట్రం చేసిన శుభ్మన్ గిల్ తొలి ఇన్నింగ్స్లోనే అర్థ సెంచరీతో కదం తొక్కాడు. బ్రిస్బేన్ టెస్టు ఛేదనలో 91 పరుగుల ఇన్నింగ్స్తో భారత్ను గెలుపు కోసం పోరాడేలా చేశాడు. బ్రిస్బేన్లో శుభ్మన్ గిల్పై ఆసీస్ పేసర్లు బౌన్సర్ల వర్షం కురిపించారు. ఓ వైపు చతేశ్వర్ పుజారా, మరో ఎండ్లో గిల్లు బౌన్సర్ల దాడికి ఎదురొడ్డి నిలిచారు. ప్రపంచ శ్రేణి పేసర్లు పాట్ కమిన్స్, మిచెల్ స్టార్క్, జోశ్ హజిల్వుడ్ బౌన్సర్ల సునామీని ఎదుర్కొవటంపై శుభ్మన్ గిల్ స్పందించాడు. ' నువ్వు ఎప్పుడైతే బంతికి బలైతావో, నీ భయం అప్పుడే మాయమైతుంది. నీ భయం బంతిని ఎదుర్కొవటం వరకే, ఒక్కసారి ఆ అనుభవం చవిచూస్తే అంతా సాధారణంగా ఉంటుంది. ఇక భయం పూర్తిగా కనుమరుగు అవుతుంది' అని ఐపీఎల్ ప్రాంఛైజీ కోల్కత నైట్రైడర్స్ అధికారిక వెబ్సైట్తో గిల్ అన్నాడు. ' నేను కుర్రాడిగా ఉన్నప్పుడు, బౌన్సర్లకు విపరీతంగా భయపడేవా డిని. అందుకే ముందస్తుగా ఛాతి ఎత్తులో వచ్చే బంతులను ఆడుతూ సాధన చేశాను. నేను డ్రైవ్ షాట్లు ఎక్కువగా సాధన చేసేవాడిని, అలాగే స్ట్రయిట్ బ్యాట్తో ఫుల్ షాట్ ఆడటంలో నేను పరిణితి సాధించాను. నేను కాస్త పక్కకు జరుగుతూ కట్ షాట్ ఆడటాన్ని సైతం సాధన చేశాను. నేను బౌన్సర్లకు భయపడేవాడిని, అందుకే ఆ లైన్లో బంతులను ఆడేందుకు దూరంగా ఉండేవాడిని, అందుకు ప్రతిగా కట్ షాట్ ఆడేవాడిని. నా చిన్ననాటి నుంచి ఈ 2-3 షాట్లు నా ఫేవరేట్. నాకు తొమ్మిదేండ్ల వయసు ఉండగా, నాకంటే ఎక్కువ వయసు గ్రూప్ జట్టుతో ఆడాలని చెప్పారు. ప్రతి అకాడమీలో ఉన్నట్టే ఆ అకాడమీలో అత్యంత వేగంగా బంతులు సంధించే ఓ బౌలర్ ఉండేవాడు. అతడిని ఎదుర్కొనేందుకు బౌన్సర్లపై భయ పడేవాడిని. అతడు బౌన్సర్ వేయగానే నేను డకౌట్ అవుతానని ముందే అనుకునేవాడిని. అతడు బౌన్సర్ వేసినా, అది వేరే లైన్లో వెళ్లిపోయేది. 2-3 బౌండరీలు బాదిన తర్వాత అంతా సాధారణమైపోయేది. నేను చాలా చిన్నవాడిని కావటంతో నా ఆటకు అందరూ ఆశ్చర్యపోయే వారు. అది నాలో ఆత్మవిశ్వాసం పెంపొందేందుకు దోహదం చేసింది. ఆ సంఘటన లెదర్ బంతిపై, బౌన్సర్పై నాలో ఉన్న అన్ని రకాల భయాలను దూరం చేసింది' అని శుభ్మన్ గిల్ అన్నాడు. ఆస్ట్రేలియా పర్యటనలో ప్రపంచ శ్రేణి పేసర్లను ఎదుర్కొన్న శుభ్మన్ గిల్ అర్థ సెంచరీ సాధించినా, తక్కువ స్కోరుకే నిష్క్రమించినా.. ఎప్పుడూ క్రీజులో అసౌకర్యంగా కనిపించలేదు. ఎంతో అనుభవం కలిగిన క్రికెటర్ మాదిరిగా ఆత్మవిశ్వాసంతో ఆడాడు. అన్నింటికి మించి, బౌలర్లపై శుభ్మన్ గిల్ సుమారు 90 శాతం నియంత్రణతో పరుగులు సాధించాడు. బ్రిస్బేన్ టెస్టు రెండో ఇన్నింగ్స్లో శుభ్మన్ గిల్ 91 పరుగులు చేసి చారిత్రక విజయంలో ముఖ్య భూమిక వహించిన సంగతి తెలిసిందే.