- రాష్ట్రంలో పలుచోట్ల తేలికపాటి జల్లులు
- వచ్చే రెండ్రోజులు అక్కడక్కడా వర్షం పడే అవకాశం
నవతెలంగాణ బ్యూరో-హైదరాబాద్‌
            రాష్ట్రం మీదుగా తూర్పు, ఆగేయ దిశ నుంచి తెలంగాణ మీదుగా చల్లటి గాలులు వీస్తుండటంతో వాతావరణం చల్లబడింది. హైదరాబాద్‌ నగరాన్ని మబ్బు కమ్మేసింది. వచ్చే 24 గంటల పాటూ మేఘావృతమై ఉండే సూచనలు కనిపిస్తున్నాయి. హైదరాబాద్‌లో ఉదయం పూట పొగమంచు ఏర్పడే అవకాశముంది. రాబోయే మూడు రోజుల పాటు రాష్ట్రంలో తేలిక పాటి నుంచి మోస్తరు వానలు పడే అవకాశం ఉందనీ, అక్కడక్కడా ఉరుములు, మెరుపులతో కూడిన వర్షం కూడా పడే సూచనలున్నాయని హైదరాబాద్‌ వాతావరణ కేంద్రం ప్రధాన అధికారి కె.నాగరత్న తెలిపారు. ఆదివారం రాత్రి తొమ్మిది గంటల వరకు రాష్ట్రంలో 159 ప్రాంతాల్లో వర్షపాతం నమోదైనట్టు తెలంగాణ స్టేట్‌ డెవలప్‌మెంట్‌, ప్లానింగ్‌ సొసైటీ వెదర్‌ రిపోర్టులో తెలిపింది. రంగారెడ్డి జిల్లా పరిధిలోని శేరిలింగంపల్లి పరిధిలో అత్యధికంగా 2.35 సెంటీమీటర్ల వర్షం కురిసింది.