నవతెలంగాణ బ్యూరో-హైదరాబాద్‌
           రాష్ట్రంలో వచ్చే రెండ్రోజుల పాటు తేలికపాటి నుంచి మోస్తరు వానలు కురిసే అవకాశం ఉందని హైదరాబాద్‌ వాతావరణ కేంద్రం ప్రధాన అధికారి కె.నాగరత్న తెలిపారు. తెలంగాణ మీదుగా తూర్పు, ఆగేయ దిశల నుంచి గాలులు వీస్తున్నాయి. హైదరాబాద్‌ నగరంలో వచ్చే 24 గంటల పాటు ఆకాశం మేఘావృతమై ఉంటుంది. అక్కడక్కడా తేలికపాటి వర్షం పడే సూచనలున్నాయి. అదే సమయంలో ఉదయం పూట పొగమంచు ఏర్పడే అవకాశముంది. తెలంగాణ డెవలప్‌మెంట్‌ ప్లానింగ్‌ సొసైటీ రిపోర్టు ప్రకారం..నల్లగొండ జిల్లా చందంపేటలో అత్యధికంగా 2.75 సెంటీమీటర్ల వర్షపాతం రికార్డయింది. మొత్తంగా సోమవారం రాత్రి పదున్నర వరకు 176 ప్రాంతాల్లో వర్షపాతం నమోదైంది.