ప్రస్తుత రోజుల్లో స్మార్ట్ఫోన్ ఉపయోగించని వారెవరూలేరంటే అతిశయోక్తి కాదు. స్కూల్కు వెళ్ళే పిల్లలే కాదు చిన్నారులు కూడా వీటిని సులువుగా ఆపరేట్ చేయగలుగుతున్నారు. స్మార్ట్ఫోన్లకు ప్రజలు అంతగా అలవాటు పడిపోయారు. ఫోన్లు ఎక్కువగా వాడితే ప్రమాదకరమని అందరికీ తెలుసు.. వాటి నుంచి వెలువడే రేడియషన్ ప్రభావం వల్ల ఆరోగ్య సమస్యలు తలెత్తుతాయని పరిశోధకులు చెబుతున్నారు. మొబైల్ కొనేపుడు అందులో ఏమేమి ఫీచర్లు ఉన్నాయి.. కెమెరా ఎంత పిక్సల్ ఉంది.. ఫ్రంట్ ఎంత, బ్యాక్ ఎంత.. ర్యామ్ ఎంత.. ఇంటర్నల్ స్టోరేజ్ ఎంత.. అయితే ఈ రేడియేషన్ను ఎంత మోతాదులో ఉండాలి.. దానిని ఎలా ఎంచుకోవాలనే విషయాలపై చాలా వరకు అవగాహన లేదనే చెప్పవచ్చు. ఎవరూ కూడా రేడియేషన్ పరిధి ఎంత ఉంది అనే అంశాన్ని పరిగణలోకి తీసుకోవడం చాలా అరుదు. కానీ ముఖ్యమైనది అదే. రేడియేషన్ను ఎలా కొలుస్తారు. ఎంత పరిధిలో ఉంటే మంచిది.. దానిని ఎలా ఎంచుకోవాలనే అంశాల గురించి తెలుసుకుందాం..
ఇంట్లో ఉండే చాలా ఎలక్ట్రానిక్ వస్తువులలో రేడియేషన్ ఉంటుంది. అయితే వాటిని ఏదో కొంత సమయం అవసరం ఉన్నంత వరకు మాత్రమే వాడి పక్కకు పెడతాం. కానీ మొబైల్ అలా కాదు.. అది నిరంతరం మనతోనే ఉంటుంది. ఇంకా కొంత మందికి పడుకునేపుడు కూడా పక్కనే పెట్టుకుని పడుకోవడం అలవాటు. సాధారణంగా ఫోన్ వాడేపుడు రేడియో తరంగాలు విడుదలవుతుంటాయి.
ఏ తరంగాలు దేని కోసం..
తరంగాలనేవి అనేక రకాలుగా ఉన్నాయి. శబ్ద తరంగాలు, కాంతి తరంగాలు, నీటి తరంగాలు, విద్యుత్ అయస్కాంత తరంగాలు ఉన్నాయి. విద్యుదయస్కాంత తరంగాలు 8 రకాలుగా ఉంటాయి. అవి.. 3 రకాల అయోనైజింగ్ రేడియేషన్స్, 5 రకాల నాన్ అయోనైజింగ్ రేడియషన్స్. అయోనైజింగ్ రేడియేషన్స్ చాలా ప్రమాదకరం. అవి.. ఎక్స్ కిరణాలు, ఆల్ట్రావైలెట్ కిరణాలు, గామా కిరణాలు. ఎక్స్ కిరణాలు ప్రమాదకరమే అయినప్పటికీ శరీరంలో విరిగిన ఎముకలను గుర్తించడానికి, శరీరం లోపలి అవయవాలను పరిశీలించడడానికి ఉపయోగిస్తారు. ఆల్ట్రావైలెట్ (యూవీ) కిరణాలు కాంతి ప్రసరణ కోసం ఉపయోగిస్తారు. ఎక్కువగా దంత వైద్యశాలల్లో నీరు లేదా ద్రవాలను శుభ్రపరచడానికి, స్కానర్లలో డిటెక్టర్గా ఉపయోగిస్తారు. గామా కిరణాల తరంగాల మధ్య దూరం చాలా తక్కువ. అణుబాంబు పేలుడు, న్యూక్లియర్ ప్లాంట్స్ నుంచి ఉత్పత్తి అవుతాయి. కానీ వీటిని తక్కువ మోతాదులో జీవులపై ఉపయోగించి కాన్సర్ కణాలను చంపడానికి ఉపయోగిస్తారు. నానో అయోనైజింగ్లో ఉద్గార కాంతి కిరణాలు, ఇన్ఫ్రారెడ్ తరంగాలు, రేడియో తరంగాలు, వెరీ ఫ్రీక్వెన్సీ వేవ్స్, ఈఎల్ఎఫ్ (ఎగ్జాక్ట్లీ లో ఫ్రీక్వెన్సీ) తరంగాలుగా ఉన్నాయి. వీటిలో విజిబుల్ కాంతి కిరణాలలో అన్ని రంగులను మనిషి చూడగలడు. ఇన్ఫ్రారెడ్ తరంగాలు వేడిని ప్రసరిపంజేస్తాయి. వీటిలో జీవులు తట్టుకోలేని అత్యంత ప్రమాదకరమైన అతినీల లోహిత కిరణాలు ఓజోన్ పొరపైనే ఆగిపోతాయి. మామూలు వేడి కలిగించే కిరణాలు మాత్రం భూమి మీదకు వస్తాయి. రేడియో తరంగాలలో ఉండే మైక్రో తరంగాలు కొంచెం గాఢమైనవే.ఇవి మైక్రో ఓవెన్ల, మొబైల్ సిగల్స్లో, బ్లూ టూత్ వైఫై సిగల్స్, రాడార్ సిగల్స్లో ఉపయోగపడతాయి. రేడియో తరంగాలలో మైక్రో వేవ్స్ కాని తరంగాలను టీవీ, రేడియో వంటి ప్రసార మాధ్యమాల్లో వినియోగిస్తుంటారు. తక్కువ తక్కువ తరంగధైర్ఘం ఉన్న తరంగాలను మాత్రం కంప్యూటర్, చిన్న చిన్న ఎలక్ట్రానిక్ గాడ్జెట్లలో వాడతారు. ఈఎల్ఎఫ్ తరంగాలను కండక్టర్స్లో విద్యుత్ సరఫరాకు ఉపయోగిస్తారు.
అన్నింటిలోకెల్లా అయోనైజింగ్ రేడియేషన్కి సంబంధించిన విద్యుద యస్కాంత తరంగాలు చాలా ప్రమాదకరమైనవి. వీటి ప్రవాహం కొంచెం పెరిగినా జీవుల్లో కణాలు దెబ్బతింటాయి. ప్రమాదకరమైన వ్యాధులు తలెత్తుతాయి. నాన్ అయోనైజింగ్ రేడియేషన్ అంత ప్రమాదకరమైనవి కాదు. ఇవి మానవ కణాలపై ఎలాంటి ప్రభావం చూపవు. వీటితోనే మొబైల్, గాడ్జెట్లలో ఉపయోగించే రేడియేషన్ ఉంది. కాబట్టి వీటిని వాడడం అంత ప్రమాదకరం కాదు.
ఎస్ఏఆర్ :
మొబైల్ రేడియేషన్ను ఎస్ఏఆర్ విలువలతో చూపిస్తారు. ఎస్ఏఆర్ (స్పెసిఫిక్ అబ్జప్షన్ రేట్ ) అంటే నిర్దిష్ట చోదక లేదా శోషణ రేటు అంటారు. ఇది మొబైల్స్లో ఎంత ఉందో తెలుసుకోవడానికి లిచ07చ కు డయల్ చేస్తే హెడ్ ఎస్ఆర్ఏ వాల్యు, బాడీ ఎస్ఆర్ఏ వాల్యు అని రెండు రకాలుగా వస్తుంది. హెడ్ ఎస్ఆర్ఏ వాల్యు అంటే మొబైల్ చెవి దగ్గర పెట్టుకుని మాట్లాడేపుడు శోషణ రేటుగా పిలుస్తారు. బాడీ ఎస్ఏఆర్ వాల్యు అంటే మొబైల్ను జేబులోగాని, చేతిలో గాని ఉంచినపుడు ఉండే శోషణ రేటుగా పేర్కొంటారు.
అమెరికా లెక్కలే పరిగణలోకి..
ఎస్ఏఆర్ విలువలను అమెరికా సంయుక్త రాష్ట్రాలకు సంబంధించిన ఫెడరల్ కమ్యూనికేషన్ కమిషన్ (ఎఫ్సీసీ) నిర్ణయిస్తుంది. 1 గ్రాము మానవ కణంపై పరిశోధన చేసి అత్యధికంగా 1.6 వాట్స్/ కేజీ గా నిర్ణయించారు. దీనిని యూరోపియన్ యూనియన్ వాళ్ళు 10 గ్రాముల మానవ కణంపై పరిశోధన చేసి అత్యధికంగా 2.0 వాట్స్ / కేజీగా నిర్ణయించారు. మన దేశంలో సజీవంగా ఉన్న శరీరాలపై పరిశోధన చేసేందుకు అనుమతి లభించడం చాలా కష్టం. అందుకే మన దేశంలోనూ అమెరికా నిర్ణయించిన విలువనే పరిగణలోకి తీసుకుంటున్నారు.
మొబైల్ రేడియేషన్ ప్రమాదకరమా.. కాదా..?
మొబైల్ రేడియేషన్ ప్రమాదకరమా.. కాదా..? అనే ప్రశ్న తలెత్తితే ప్రమాదకరం కాదనే పరిశోధకులు చెబుతున్నారు. అయితే కొంచెమైనా దీని ప్రభావం ఉంటుంది. ఎక్కువగా ఫోన్లు వాడే వాళ్ళు.. కాల్స్ మాట్లాడేపుడు బ్లూటూత్లను ఎక్కువగా వినియోగించొద్దు. బ్లూటూత్ వల్ల రేడియేషన్ విడుదలయ్యే అవకాశాలు ఉన్నాయి. అందుకే సాధ్యమైనంత వరకు హెడ్ఫోన్స్ వాడడం ఉత్తమం. అంతేకాదు.. అవసరమైతే సాధ్యమైనంత వరకు ఇంట్లో ఉన్న సమయంలో ఫోన్ను చేతిలో, జేబుల్లో ఉంచుకోకపోవడమే మంచిది. పిల్లలు, గర్భిణులకు మొబైల్స్ దూరంగా ఉంచడం ఆరోగ్యదాయకం. చార్జింగ్లో ఉన్న మొబైల్ అయినా, తక్కువ చార్జింగ్ ఉన్న మొబైల్ అయినా రేడియేషన్ చాలా ఎక్కువగా ఉద్గారమవుతుంది. అలాంటి సమయాలలో సాధ్యమైనంత వరకు ఫోన్ వాడకపోవడమే మంచిది.
ఎలా ఎంచుకోవాలి
ఎక్కడా కూడా ఎస్ఏఆర్ విలువ ఎంత ఉండాలనే దానిపై కచ్చితమైన నిర్దిష్టత లేదు. మన దేశంలో 1.6 వాట్స్ / కేజీగా వినియోగంలో ఉంది కాబట్టి, మొబైల్ కొనేపుడు వెనుక వైపు వీటికి సంబంధించిన సమాచారం ఉంటుంది. ఎస్ఏఆర్, పరిధి ఎంత, హెడ్కు ఎంత, బాడీకి ఎంత అని విడివిడిగా నమోదు చేసిన స్టిక్కర్ ఉంటుంది. లేదంటే ఫోన్ బాక్స్ మీద ఏదో ఒక పక్క కచ్చితంగా ముద్రించి ఉంటుంది. ఆన్లైన్లో కొనే మొబైల్స్ అయినా సరే వాటికి సంబంధించిన సమాచారం కింద నిక్షిప్తమై ఉంటుంది. ఒకవేళ అలాంటి సమాచారం లేదు అంటే.. ఆ మొబైల్ పరిధికి మించి ఉన్నట్టే లెక్క..
Authorization