దశాబ్దంన్నర నుంచి సమాచారం అందించడానికి సెల్ఫోన్ తప్పనిసరి అయిపోయింది. స్మార్ట్ఫోన్ల వల్ల డేటా వినియోగమూ పెరిగిపోయింది. ఈ వినియోగానికి తగినట్టుగానే.. నెట్వర్క్ల నుంచి తక్కువ మొత్తానికే ఎక్కువ జీబీ డేటా లభిస్తోంది.ఆ ప్రభావం టవర్ సామర్థ్యంపై పడుతుంది. ఫలితరగా కాల్ డ్రాప్స్, నెట్ ఆగిపోవడం వంటివి సర్వసాధారణం అయిపోయాయి. ప్రయాణాలలో ఉన్నపుడు ఈ సమస్య మరీ ఎక్కువగా ఉంటుంది. వాతావరణంలో మార్పులు చోటుచేసుకున్నపుడు ఈ సమస్య మరీ అధికంగా ఉంటుంది. ఇలాంటి సమస్యలనుమ అధిగమించేందుకు, సిగల్ సామర్ధ్యం తెలుసుకునేందుకు పాటించాల్సిన కొన్ని విషయాలను ఈ వారం తెలుసుకుందాం..
ఆండ్రాయిడ్ ప్రస్తుత హైటెక్ యుగంలో అందరికీ అవసరమైనదే. ఎక్కడికి వెళ్ళినా తప్పనిసరి వినియోగించే వస్తువు అయిపోయింది. స్మార్ట్ఫోన్ వినియోగం పెరిగిపోవడంతో కాల్స్, మెసేజ్లే కాదు, దాదాపు అన్ని సేవలు ఫోన్ ద్వారానే పొందగలుగుతున్నాం. అయితే ఈ మధ్య కాలంలో ఎక్కువగా కాల్స్ మెర్జ్ అవ్వడం, సిగల్ సరిగా లేకపోవడం వంటివి సర్వసాధారణం అయిపోయాయి. మనం ఉపయోగించే కాల్స్, మెసేజ్లకే కాక, జీపీఎస్, జీపీఆర్ఎస్కు సిగల్స్ అందాలన్నా, ప్రతి దానికి రేడియో యాక్టివ్ ఫీల్డ్ నిరంతరం సెల్ టవర్ చుట్టూ ఆవరించుకుని ఉంటుంది. అయితే పెరుగుతున్న వినియోగం వల్ల నెట్వర్క్లో సమస్యలు తలెత్తుతున్నాయి. అసలు ఇలాంటి సమస్యలు ఎందుకు ఏర్పడుతుంటాయో, టవర్ సిగల్స్ ఉన్నా, క్వాలిటీ అందడం లేదు.అయితే వీటన్నింటికీ మనం వాడే డివైజ్లో మోడెమ్ తోడ్పడుతుంది. చూడడానికి ఇది విడిగా ఉండదు. ఫోన్లో నిక్షిప్తమై ఉంటుంది. దీన్ని సిస్టమ్ ఆన్ చిప్ లేదా ప్రాసెసర్ అని పిలవవచ్చు. క్వాల్ కామ్ స్నాప్డ్రాగన్ 660 ప్రాసెసర్ ఉన్న ఫోన్ను కొనుగోలు చేస్తే, అందులోనే మోడెమ్ సదుపాయం ఉంటుంది. ఇది మనం ఎవరికైనా కాల్ చేసినపుడు, మోడెమ్లో అంతర్గతంగా అమర్చి ఉన్న యాంటెన్నాల ద్వారా విద్యుదయస్కాంత రేడియో తరంగాలను వెలువరిస్తుంది. ఫోన్ ద్వారా వెలువడే ఈ తరంగాలు సమీపంలోని సిమ్ నెట్వర్క్కు సంబంధించిన టవర్లోని యాంటెన్నాలు స్వీకరిస్తాయి. అంటే సెల్టవర్కు అమర్చిన యాంటెన్నాలు వాటి పరిధిలో ప్రస్తుతమున్న మొబైల్ ఫోన్ల ద్వారా వచ్చే రేడియో ఫ్రీక్వెన్సీ సిగల్స్ను స్వీకరించగలుగుతాయి. ఆయా మొబైల్ ఫోన్లకు ఇతర ప్రదేశాల నుంచి వచ్చే వాయిస్, డేటా సమాచారాన్ని రేడియో ఫ్రీక్వెన్సీ ఆధారంగా ప్రసారం చేయగలుగుతాయి. ఒక మొబైల్ ఫోన్ నుంచి ఒక ఫోన్ కాల్ వస్తే, రేడియో ఫ్రీక్వెన్సీ ద్వారా రిక్వెస్ట్ వచ్చిన వెంటనే దానిని మనం ఎవరికైతే కాల్ చేయాలనుకుంటున్నామో వారికి కనెక్ట్ చేసేలా స్విచ్చింగ్ టవర్కు సిగల్ అందుతుంది. దీనినే మనం టెలిఫోన్ ఎక్స్ఛేంజ్ అని పిలుస్తాం. ఒక రెండున్నర దశాబ్దాల క్రితం సినిమాలు లేదా పాత సినిమాలలో ల్యాండ్ లైన్ నుంచి కాల్స్ చేసి వారు ఎవరికి ఎక్కడకు మాట్లాడాలనుకుంటున్నారో చెప్తే ఇక ఆపరేటర్ ఆ కాల్ను ఇద్దరికీ కనెక్ట్ చేస్తుంది. దానిని ట్రంక్ కాల్ పద్ధతి అనేవారు. ప్రస్తుతం ఇలాంటి వ్యవస్థే సెల్ఫోన్లకు సిగల్స్ అందిస్తుంది.
టవర్ రేంజ్..
సాధారణంగా ఒక టవర్ పరిధి అనేక అంశాల మీద ఆధారపడి ఉంటాయి. యాంటెన్నా హైట్, సిగల్స్ ఫ్రీక్వెన్సీ, టవర్లో ఏర్పాటు చేసిన ట్రాన్స్మీటర్ సామర్ధ్యం, టవర్లోని యాంటెన్నాలు ఏయే దిక్కులకు ఏ మేరకు సిగల్ ప్రసారం చేస్తాయన్న అంశాల మీద టవర్ మీద ఆధారపడి ఉంటుంది. ప్రస్తుతం సెల్టవర్లు ఇంటి పక్కనో, ఇంటి మీదనో ఉంటున్నాయి. అయినా సిగల్స్ అందడం కష్టంగానే ఉంటోంది. ఎక్కువ శాతం ఎత్తైన భవనాలు, గాలి చొరబడని ప్రదేశాలతో కాంక్రీట్ జంగిల్లా ఉంటున్నాయి. అవన్నీ సిగల్స్కు ఆటంకాలుగానే మారుతుంటాయి. స్థానిక వాతావరణ పరిస్థితులు, భౌగోళిక పరిస్థితులు సిగల్స్ సామర్థ్యాన్ని అడ్డుకుంటాయి. అంతేకాక ఏవైనా ప్రత్యేక సందర్భాలలో ఎక్కువ మంది ఒకే చోట ఉండి ఫోన్ మాట్లాడడం కూడా సిగల్స్ మీద ప్రభావం చూపిస్తుంటాయి.
యాంటెన్నా
ఒక సెల్ టవర్లో అనేక యాంటెన్నా లుంటాయి. అవి ఆయా ప్రాంతాలను బట్టి అందులో యాంటెన్నాలు అమరుస్తుంటాయి. టవర్లో వాడే యాంటెన్నాలు, ఉపయోగించే టెక్నాలజీని బట్టి నెట్ వర్క్ కవరేజీ ఆధారపడి ఉంటుంది. అయితే ఏ టవర్ మీద ఎన్ని యాంటెన్నాలు అమర్చాలన్నది నెట్వర్క్ సంస్థలు నిర్ణయించుకుంటాయి.
ఒక టవర్ నుంచి మరో టవర్కు..
ప్రయాణ సమయాలలో పోన్ మాట్లాడడం అంటే చాలా ఇబ్బందిగా ఉంటుంది. డేటా వినియోగమైనా ఇబ్బందే. ప్రాంతాలు మారుతుండే కొద్ది, అవాంతరాలు ఏర్పడుతుంటాయి. కొన్ని సందర్భాల్లో కాల్ కంటిన్యూ అవుతూనే ఉంటుంది. వాస్తవానికి మనకు తెలియకుండానే, జర్నీలో ఒక టవర్ రేంజి నుంచి మరో టవర్ రేంజ్కు మారుతుంటాం. అయినా కాల్ కంటిన్యూలోనే ఉంటుంది. అయినా ఎలా పనిచేస్తుందంటే, టవర్లో బేస్ స్టేషన్ కంట్రోలర్ ఉంటుంది. అది మనం ఎప్పటికప్పుడు ఏ సమయంలో ఏ టవర్ సిగల్ స్వీకరించాలి.. దేని నుంచి డిస్ కనెక్ట్ అవ్వాలనే అంశం నిర్ణయిస్తుంటుంది. అంతేకాదు, బలమైన సిగల్ కలిగిన టవర్ ఏది ఉంటే దానికి మన కాల్ కనెక్ట్ అయిపోతుంది. ఒక వేళ ఆ పరిధిలో బలమైన సిగల్స్ ఉన్న టవర్ లేకుంటే సిగల్స్లో అప్ అండ్ డౌన్స్ ఏర్పడుతుంటాయి. లేదంటే మొత్తానికే సిగల్ పోతుంది.
సిగల్ సామర్థ్యం
సిగల్ సామర్థ్యం తెలుసుకోవాలంటే, గూగుల్ ప్లే స్టోర్లో సిగల్ స్ట్రెంథ్ అనే అప్లికేషన్ ఉంటుంది. దానిని డౌన్లోడ్ చేసుకుంటే, దగ్గర్లలోని టవర్ స్ట్రెంథ్ తెలుసుకోవచ్చు. ఇది డెసిబుల్ మిల్లీవాట్స్లో సిగల్ సామర్థ్యం చూపిస్తుంది. ఇది సున్నా ఉంటే, నాణ్యంగా ఉన్నట్టు. మైనస్లలో ఉంటే సిగల్ లేనట్టు పరిగణనలోకి తీసుకోవాలి.
నెట్వర్క్పై ప్రభావం
వినియోగదారులు కాల్డ్రాప్స్ వల్ల ఇబ్బందులు పడుతుంటే, టెలికాం సంస్థలు మాత్రం ఆశ్రద్ధ వహిస్తున్నాయని ఉంది. అయితే రిలయన్స్ జియో సేవలు ప్రారంభించక మునుపు కేవలం వాయిస్ కాల్స్ వరకే టవర్లమీద ప్రభావం పడేది. ఆ తర్వాత నుంచి పెరిగిన అన్లిమిటెడ్ కాల్స్, డేటా వినియోగంతో టవర్ల మీద విపరీతమైన లోడ్ పడుతుంది. లోడ్ పడుతున్నా, నెట్వర్క్లు మాత్రం కొత్త టవర్లు ఏర్పాటు చేయడం లేదు. అందుకు మొదటిది రేడియేషన్ భయంతో స్థానికులు టవర్లు ఏర్పాటు చేయడానికి అనుమతించడం లేదు. రెండవది ఆదాయలోపం. ఒక వినియోగదారుని నుంచి నెలకు వచ్చే సగటు ఆదాయాన్ని లెక్కగడతారు. కానీ జియో తర్వాత ప్రముఖ టెలికాం సంస్థలు నష్టాలు చవిచూశాయి. అందువల్ల అదనపు సదుపాయాలు కల్పించే పరిస్థితిలో లేవు. అందుకే ఈ మధ్య ప్రతి నెట్వర్క్ ప్రతి నెలా తప్పనిసరి రీచార్జ్ చేసుకునేలా నిబంధనలు విధించాయి. లేదంటే ఇన్కమింగ్, అవుట్ గోయింగ్కాల్స్ను కట్ చేస్తున్నాయి. డేటా వినియోగాన్ని వినియోగదారులు తగ్గిస్తే తప్ప పరిస్థితుల్లో మార్పు రాదు. అయితే టెలికాం సంస్థలే సరైన సేవలు అందించడం లేదని భావిస్తున్నాం. అందువల్ల ఇటువంటి సమస్యలు ఉత్పన్నమవుతున్నాయి.
కాల్ కట్కు..
ఒక టవర్కు ఎక్కువ మొత్తంలో మొబైల్ఫోన్లు కనెక్ట్ అయి ఉండడం, భవనాలు అడ్డుగా ఉన్నపుడు, టవర్ కవరేజ్ సరిగా లేకపోవడం, నాణ్యమైన సిగల్స్ అందకపోవడం, సాంకేతిక సమస్యలు తలెత్తినపుడు, ప్రయాణ సమయలలో టవర్ లోకేషన్ మారడం, వర్షం పడినపుడు వంటి కారణాలు కాల్కట్కు కారణమవుతున్నాయి. వీటితో పాటు ఎక్కువగా యూట్యూబ్ వాడకం కూడా నెట్వర్క్ సిగల్స్ మీద ప్రభావం చూపస్తుంటాయి. వర్షం పడినపుడు హైఫ్రీక్వెన్సీ తరంగాలు నీటి ద్వారా ప్రయాణించలేకపోవడం వల్ల ఎక్కువగా సిగల్ సమస్యలు తలెత్తుతుంటాయి. వాతావరణం బాగా వేడిగా ఉన్నా సెల్ సిగల్స్ నాణ్యత క్షీణిస్తుంది. బాగా మంచు పడినపుడూ ఇలాంటి పరిస్థితే ఉత్పన్పమవుతుంది. అందువల్ల కాల్కట్ అవ్వడానికి ఒకటే కారణం అని చెప్పలేము.
Authorization