Authorization
Mon Jan 19, 2015 06:51 pm
- అది చెప్పడానికే ట్రంప్ ఐదు దేశాల పర్యటన
- మిత్ర దేశాలకు ఆయుధాలు అమ్మాలి...
- శత్రుదేశాల చుట్టూ రాజకీయ ఉచ్చు బిగించాలి..
- చైనా ఎదుగుదలపై భయాలు !
అంతర్గతంగా అమెరికాకు అనేక సమస్యలున్నాయి. స్థానిక అమెరికన్లకు ఉపాధి లేదు. ఆర్థిక పరిస్థితీ అంతంత మాత్రమే. ఒక్కమాటలో చెప్పాలంటే...ఇంట్లో ఈగల మోత. బయట పల్లకీల మోత. ఎన్నికల వాగ్ధానాలు, సమస్యలు చూస్తే ట్రంప్నకు ఊపిరాడటం లేదు. తొలుత విదేశాంగ విధానాన్ని, వ్యూహాల్ని మార్చాలని నిర్ణయించుకున్నాడు. అందునా ఆసియాలో అమెరికా వ్యూహం మార్చాలన్నది ట్రంప్ ప్రధాన ఉద్దేశం. ఏంటా వ్యూహం ? ఎందుకు ? అన్నది ప్రశ్న.
వాషింగ్టన్ : అమెరికా ఆర్థిక బలిమి, ప్రపంచంపై పెత్తనం దాని విదేశాంగ విధానంపై ఆధారపడి ఉంది. ఇప్పటివరకూ అమెరికా అనుసరించిన విదేశాంగ విధానంతో ఆయుధ లాబీ, కార్పొరేట్ వర్గం లాభాల్ని మూటగట్టుకున్నాయి. రాజకీయ, అధికార వర్గాలు పదవుల్ని అనుభవించాయి. సగటు అమెరికన్కు దక్కింది ఏమీలేదు. తయారీ, సేవల రంగాలు కుదేలయ్యాయి. ఈ పరిస్థితి మారుస్తానని చెప్పటం వల్లే డొనాల్డ్ ట్రంప్ అధ్యక్షుడయ్యాడు. మరి అమెరికాను, ఆ దేశ ప్రజల్ని ఒడ్డునపడేసే ట్రంప్ వ్యూహమేంటి ? అన్నది ఆసక్తిగా మారింది. మొదట్నుంచీ ఆయన దృష్టంతా ఆసియాపైనే ఉంది. ఆసియాలో అమెరికా వ్యూహాన్ని మార్చేశాడు. తన మిత్ర దేశాలకు కొత్త వ్యూహం చెప్పడానికి, కొత్త మిత్రుల్ని సంపాదించడానికే ఐదు దేశాల ఆసియా పర్యటన జరిపాడు.
నిజానికి ఇప్పటివరకూ అనుసరించిన విదేశాంగ విధానం అమెరికాను ముంచిందనే చెప్పాలి. సోవియట్ రష్యా కుప్పకూలటం వల్ల అమెరికా ఆడింది ఆట, పాడింది పాటగా సాగింది. పరిస్థితులు ఎప్పటికీ ఇలాగే ఉంటాయని అమెరికా అనుకోవటం లేదు. కమ్యూనిస్టు చైనా రోజు రోజుకీ ఎదుగుతున్న తీరు, ఆ దేశానికి పెరుగుతున్న ప్రపంచ ప్రాధాన్యత అమెరికాను తీవ్ర ఆందోళనకు గురిచేస్తున్నది. కాబట్టి ఆసియాలోనే చైనా చుట్టూ కొత్త మిత్రుల్ని (ఫిలిప్పైన్స్, వియత్నాం) సంపాదించుకోవాలి, పాత మిత్రులకు ఆయుధాల్ని అమ్ముకోవాలి. ఆసియాన్, ఆసియా-పసిఫిక్ ప్రాంతంలో సాధ్యమైనన్ని సమస్యలుంటేనే అమెరికా వాణిజ్య, ఆయుధ కాంక్షలు నెరవేరుతాయి. అందుకోసమే ఉ.కొరియాను ప్రపంచ సమస్యగా మార్చాడు. నిజానికి సమస్య అమెరికా-ఉ.కొరియా మధ్య. దీనిని బూచిగా చూపి..జపాన్, ద.కొరియాలకు ఆయుధాల్ని అమ్ముకోవాలి, వీలైనంత వేగంగా దీనిని అమలు చేయటం కోసమే ట్రంప్ ఆసియా పర్యటన.
వచ్చీ రాగానే జపాన్లో దిగిన ట్రంప్, మొదట అడిగిన ప్రశ్న.. ఇరు దేశాల మధ్య 'వాణిజ్య లోటు' సంగతేంది ? అని. జపాన్ ట్రంప్నకు నచ్చజెప్పే ప్రయత్నం చేసింది. కానీ, తమ ఆయుధాలు, సాంకేతిక పరిజ్ఞానం జపాన్ కొనాల్సిందేనని ట్రంప్ బెదిరింపుసైతం చేశారు. ఆసియాలో తమ విదేశాంగ విధానం మారిందని జపాన్ ప్రధాని షింజో అబేకు తెలియజేశాడు. ద.చైనా సముద్ర దీవులపై చైనా-జపాన్ మధ్య వివాదముంది. దీంట్లో తలదూర్చి రాజకీయంగా పెద్ద సమస్యను చేయాలన్నది అమెరికా వ్యూహం. ఇక్కడ జపాన్కు రాజకీయ లబ్ధి చేకూర్చటం అమెరికా ఉద్దేశం.
ద.కొరియాలో కూడా ట్రంప్ రెండు రోజులపాటు పర్యటించారు. ట్రంప్ చెప్పినదానికి ద.కొరియా అధ్యక్షుడు మూన్ తలూపకపోవటం అమెరికాను కొంత నిరాశపర్చింది. అంతేగాక ఉ.కొరియాకు వ్యతిరేకంగా అమెరికా ఏకపక్షంగా సైనిక చర్యకు దిగడానికి వీల్లేదంటూ మూన్ కుండబద్దలు కొట్టాడు. పిచ్చిగా, గుడ్డిగా యుద్ధం చేయాలని ట్రంప్ ముందుకెళితే... సియోల్లోని కోటి మంది ప్రజల పరిస్థితి ప్రమాదంలో పడుతుందని ఆయనముందే మూన్ ఆందోళనవ్యక్తం చేశాడు. ఉ.కొరియాతో దౌత్యసంబంధాల వ్యవహారం వాషింగ్టన్ నుంచి జరపకూడదని మొదట్నుంచీ వాదిస్తున్న వ్యక్తి మూన్.
ద.కొరియాతో అమెరికా 2012లో 'కోరస్ ఎఫ్టీఏ' (ద్వైపాక్షిక వాణిజ్య ఒప్పందం) కుదుర్చుకుంది. దీనివల్ల ద.కొరియా ప్రతీ ఏటా 1.80 లక్షల కోట్ల రూపాయలు ఆర్థిక లాభం పొందుతుందని ట్రంప్ టీమ్ లెక్కతేల్చింది. ద.కొరియా అధ్యక్షుడు మూన్ దగ్గర ఇదే విషయాన్ని ట్రంప్ ప్రస్తావించాడు. అమెరికా నుంచి ఆయుధాలు, సాంకేతిక పరిజ్ఞానం కొనుగోలు చేయండి, దీంతో వాణిజ్యలోటు భర్తీ అవుతుందని చెప్పాడు.
చైనా చుట్టూ కొత్త మిత్రులు కావాలి...
ట్రంప్ పెద్ద వ్యూహంతోనే వియత్నాంలో అడుగుపెట్టాడు. ఆసియా-పసిఫిక్ ఆర్థిక సహకార కూటమి (ఎపెక్) సదస్సుకు 21 దేశాల ముఖ్యనేతలు హాజరయ్యారు. సభ్య దేశాలన్నీ ముందు తమ స్వీయ ప్రయోజనాల్ని దృష్టిలో పెట్టుకోవాలని...విచిత్రమైన సందేశమిచ్చారు ట్రంప్. కూటముల వారీగాక, ప్రతీ దేశంతో వ్యూహాత్మక బంధాలకు ఆహ్వానం పలికాడు. వివిధ దేశాధినేతలతో విడి విడిగా చర్చలు కూడా జరిపాడు. చైనాను రాజకీయంగా దెబ్బకొట్టేందుకు ఆయా దేశాల ముందు ఆర్థిక వ్యూహాన్ని ముందుంచాడు.
ఆర్థికంగా, ఆయుధపరంగా చైనా ఎదుగుతున్న తీరు అమెరికాను భయ పెడుతున్నది. అందుకే చైనా చుట్టూ సాధ్యమైనన్ని సమస్యల్ని, అస్థిర వాతా వరణాన్ని తెచ్చిపెట్టాలన్నదే ట్రంప్ వ్యూహం. అందులో భాగంగానే వియత్నాం, ఫిలిప్పైన్స్ దేశాల్లో ట్రంప్ అడుగుపెట్టారు. వియత్నాంకు వచ్చిన ఎపెక్, మనీలాకు వచ్చిన ఆసియాన్ కూటమి సభ్య దేశాలన్నింటితో అమెరికా వ్యూహాత్మక కరచాలనం చేసింది. సభ్య దేశాల అధినేతలందరికీ తనదైన ఆర్థిక, రాజకీయ సూత్రాన్ని ట్రంప్ వివరించారు.
- మధ్య ఆసియాలో అమెరికా యుద్ధ వ్యూహాలకు ప్రత్యక్ష ఉదాహరణ లెబనాన్ అధ్యక్షుడు హారీరి రాజీనామా. ట్రంప్ మధ్య ఆసియా పర్యటన అనంతరం, ఎవరూ ఊహించని పరిణామం ఇజ్రాయిల్-సౌదీ రాసుకుపూసుకు తిరగటం. ఇజ్రాయిల్-సౌదీ రెండూ కలిసి ఇరాన్పై విరుచుకుపడటానికి సిద్ధంగా ఉండాలని ట్రంప్ మంత్రాంగం నడిపివెళ్లారు. దాంట్లో భాగంగానే లెబనాన్ను సౌదీ తన ఆధీనంలోకి తెచ్చుకుంది. ఇరాన్పై యుద్ధం కోసం మధ్య ఆసియాలో అమెరికా చేస్తున్న కుట్రలివి.
ఈనేపథ్యంలో ఉ.కొరియా సమస్యను పెద్దది చేసి ఆసియాలో యుద్ధ వాతావరణాన్ని అమెరికా తెచ్చిపెడుతుందన్న ఆందోళనలు వ్యక్తమవుతున్నాయి. ట్రంప్ వ్యవహారశైలి కూడా శాంతిసామరస్యాలు కాకుండా, యుద్ధాన్ని కోరుకునేలా ఉన్నాయి. అందులో భాగంగానే ద.కొరియాపై 'వాణిజ్య' బెదిరింపులకు అమెరికా దిగింది. మీ కార్లు, ఎలక్ట్రానిక్ ఉత్పత్తులపై పన్నులు పెంచుతామని ట్రంప్ బెదిరిస్తున్నారు.
ట్రంప్ 'ఇండో-పసిఫిక్' వ్యూహం
ఆసియాలో అమెరికా వ్యూహాన్ని ట్రంప్ మార్చాడు. ఆసియా-పసిఫిక్ దేశాల కూటమిగా కాకుండా, ఇండియా, మలేషియా, సింగపూర్ శ్రీలంక తదితర దేశాలతో కూడిన 'ఇండో-పసిఫిక్' కూటమిని ట్రంప్ తెరమీదకు తెస్తున్నాడు. ఇండో-పసిఫిక్ ప్రాంతంపై వాణిజ్య-భద్రతా విధానం బ్లూ ప్రింట్ కూడా తయారుచేయించాడు. భవిష్యత్తులో (చైనాను దృష్టిలో పెట్టుకొని)ఇక్కడ 'టీపీపీ' తరహా స్వేచ్ఛా వాణిజ్య ఒప్పందాన్ని అమలుచేయాలన్నది ట్రంప్ కోరిక. వీటన్నంటినితోనూ ద్వైపాక్షిక 'స్వేచ్ఛా వాణిజ్య బంధం' కుదుర్చుకోవాలని ట్రంప్ భావిస్తున్నారు. చిన్న చిన్న దేశాలకు ఆర్థిక ఆశల్ని కల్పించి, చైనా ఆర్థిక సంబంధాల్ని పరిమితం చేయాలన్నది ట్రంప్ అసలు వ్యూహం. ఇండియా-చైనాల మధ్య బలమైన ఆర్థిక సంబంధాలు లేకపోతే, చైనాకు వ్యతిరేకంగా ఇండియాను మార్చుకోవచ్చన్నది ట్రంప్ అంచనా.