Mon 07 Nov 04:08:34.271084 2022
పోరాటం పుట్టిమునిగింది
ఆశ అడియాస అయ్యింది
అరచేతులు అడ్డుపెట్టి ఏళ్లతరబడి
కాపుగాసిన ఆశయం-
కొత్త కాపేమీ కాయకుండానే వట్టిపోయింది
రెపరెపలాడుతున్న దీపం
గాలి హౌరు లేకుండానే మలిగిపోయింది
*
జరిగిన అత్యాచారమే కాదు,
వారికి జరిగిన సత్కారం కూడా-
నిన్ను ఏకాకిని చేసి దూరంగా నిలబెట్టింది
దోషులను బోనులెక్కించకపోవడమే కాదు,
వారిని అక్కున చేర్చుకుని కూడా-
చూపుడు వేళ్లన్నీ నిన్ను మానసిక ఉరికంబం ఎక్కించాయి
మలినాన్ని నీ దేహానికి పులమడమే కాదు,
వారిని పరిశుద్ధులుగా కొలిచి కూడా-
సభ్యసమాజం తన ఆత్మను చంపేసుకుంది
*
అడియాసలు వడిసెలు తిప్పే రోజు వస్తుంది
ఆశయం కొత్త చిగుర్లతో కొమ్మలు చాస్తుంది
పోరాటం అరచేతిలో పురివిప్పుకుంటుంది
కొండెక్కిన దీపం మళ్లీ దావానలమై చిచ్చురేపుతుంది
దుఃఖాన్ని విడిచిన దేహం-
కొత్త ఆత్మను ఆవాహన చేసుకుంటుంది
- దేశరాజు
మీ స్నేహితులకు రికమెండ్ చెయ్యండి
