Mon 23 Jan 01:20:17.027479 2023
మనం మనుష్యులం కాదు
మనకు ఏవో పేర్లు ఉన్నాయి
అవీ కాదనీ
తోకలు తొడిమెలు ఓ గంప నిండేటన్నీ ఉంటాయి.
మనిషిని మనిషనీ పిలిచే కాలం కాదు.
ప్రాధాన్యతకు కులం
గౌరవాలకు తోకలు
రాజులు మహారాజులు
పదవులు పట్టాలు ఇంకేవేవో ఉంటాయిలే.
పేరుబెట్టి పిలిస్తే
మానాలకు మానభంగం జరిగిపోయినట్లే.
పేరు చివర కులం తోక లేకపోతే
వాడికి జీవితమే లేదు
వాడు సచ్చిన శవంకన్న హీనం.
ఇప్పుడు ఇక్కడ మనుష్యులు లేరు
డాక్టర్లు ఇంజనీర్లు కలెక్టర్లు కంట్రాక్టర్లు
ఎమ్మెల్యేలు ఎంపీలు ముఖ్యమంత్రులు..
కూలీలు పేదలు నిరుపేదలు అలగా జనాలు
ఇంకా మనుష్యులెక్కడున్నారు.
మనిషిలోని ఇరుకుతనమే
మనిషిని మనిషిగా పిలవనివ్వదు.
ఇప్పుడు
మనిషిని మనిషిగా చూసే కాలం కూడా కనుమరుగైంది.
ఇదే ఇప్పుడు
ఈ భూమిమీద అతిగొప్ప నాగరికత.
- అవనిశ్రీ, 9985419424
మీ స్నేహితులకు రికమెండ్ చెయ్యండి
