నవతెలంగాణ-హైదరాబాద్ : చిరంజీవితో ఒక్క సినిమా అయినా చేయాలనే ఉద్దేశంతోనే ఇండస్ట్రీలో అడుగుపెట్టానని చెబుతూ వచ్చిన బాబీ, ఆయనతో 'వాల్తేరు వీరయ్య' సినిమా చేశాడు. సంక్రాంతి బరిలోకి దిగిన ఈ సినిమా, భారీ వసూళ్లను రాబడుతూ దూసుకువెళుతోంది. ఈ నేపథ్యంలో ఈ సినిమా సక్సెస్ సెలబ్రేషన్స్ ను 'హనుమకొండ'లో నిర్వహించారు. స్పెషల్ గెస్టుగా చరణ్ రాగా, చిరంజీవి చేతుల మీదుగా టీమ్ లోని వాళ్లంతా షీల్డ్స్ అందుకున్నారు. అక్కడి అభిమానులు ఆయనను 'గజమాల'తో సత్కరించారు.
ఈ స్టేజ్ పై బాబీ మాట్లాడుతూ .. 'చిరంజీవిగారికి మా ఫాదర్ వీరాభిమాని. మా నాన్న 4 నెలల్లో చనిపోతారని తెలిసి, ఆయనని చిరంజీవిగారు పిలిపించారు. అప్పటికి ఈ సినిమా 30 శాతం షూటింగు మాత్రమే పూర్తయింది. అయినా నేను బ్లాక్ బస్టర్ హిట్ కొడతానని మా నాన్నతో చిరంజీవిగారు చెప్పారు. ఆ సంతృప్తితోనే మా ఫాదర్ కాలం చేశారు. అందుకు మెగాస్టార్ కి కృతజ్ఞతలు చెబుతున్నాను' అన్నారు.
మెగాస్టార్ నిద్రలేస్తే సినిమాను గురించి .. అభిమానుల గురించి ఆలోచన చేస్తారు. అందువల్లనే ఆ కుటుంబం నుంచి పవర్ స్టార్ వచ్చారు .. రామ్ చరణ్ వచ్చారు. చిరంజీవిగారు నా చేతిపై ముద్దుపెట్టారు. నేను ఎక్కడికి వెళ్లినా అందరూ ఆ చేయిని తాకుతున్నారు. కొన్ని వందల మంది ఆ చేయిని ముద్దు పెట్టుకున్నారు' అని అనగానే చిరంజీవి నవ్వేశారు.
