- నకిలీ భూ పట్టాలతో వచ్చే వారిని తరిమికొట్టాలి : సీపీఐ(ఎం) కేంద్ర కమిటీ సభ్యులు జి.నాగయ్య
నవతెలంగాణ-భూపాలపల్లి/గోవిందరావుపేట
కేంద్రంలో బీజేపీ, రాష్ట్రంలో బీఆర్‌ఎస్‌ ప్రభుత్వాలకు పేద ప్రజల పట్ల చిత్తశుద్ధి లేదని, సీపీఐ(ఎం) పోరాటాలకు నిలయమని, ఎన్ని కేసులైనా భయపడేది లేదని, జైలుకెళ్లడంతోపాటు ప్రాణాలైనా అర్పిస్తామని, పేదలకు పట్టాలు ఇచ్చి, ఇల్లు నిర్మాణానికి రూ.5లక్షలు కేటాయించాల్సిందేనని సీపీఐ(ఎం) కేంద్ర కమిటీ సభ్యులు జి. నాగయ్య స్పష్టంచేశారు. జయశంకర్‌-భూపాలపల్లి జిల్లా కేంద్రంలోని పాత ఎర్ర చెరువు శిఖం భూమిలో సర్వేనెంబర్‌-280, 283, 284, 285లోని సుమారు 24 ఎకరాల్లో సీపీఐ(ఎం) జిల్లా కమిటీ ఆధ్వర్యంలో పది రోజులుగా సుమారు 3500 గుడిసెలు వెలిశాయి. వీరికి మద్దతు తెలిపేందుకు ఆదివారం వచ్చిన నాగయ్యకు స్వాగతం పలికేందుకు గుడిసెవాసులు భారీ బైక్‌ ర్యాలీ నిర్వహించారు. సీఆర్‌ నగర్ నుంచి గుడిసెల ప్రాంతం వరకు కోలాటాలు డప్పు చప్పుళ్ళు, నృత్యాలు, డీజే పాటలతో భూపాలపల్లి ప్రాంతమంతా ఎర్రమయమయింది. ఈ సందర్భంగా జిల్లా కార్యదర్శి బందు సాయిలు అధ్యక్షతన నిర్వహించిన సమావేశంలో నాగయ్య పాల్గొని మాట్లాడారు. ప్రతి కుటుంబానికి భూమి ఇవ్వాలని రాజ్యాంగంలో ఉన్నప్పటికీ ప్రభుత్వాలు పేదల పట్ల కఠినంగా వ్యవహరిస్తున్నాయని ఆరోపించారు. ఎన్నికల ముందు అనేక వాగ్దానాలు చేసి నేడు విస్మరించాయన్నారు. నిరుపేదలకు సొంత ఇల్లు నిర్మిస్తామని హామీ ఇచ్చి తుంగలో తొక్కారని, కేంద్రంలోని బీజేపీ ప్రభుత్వం ఒక్క ఇల్లు కూడా కట్టిన పాపాన పోలేదని ఆరోపించారు. రాష్ట్ర ప్రభుత్వం అక్కడక్కడ డబుల్‌ బెడ్‌రూమ్‌ ఇండ్లు నిర్మించినా ప్రజలకు పంపిణీ చేయడంలో నిర్లక్ష్యంగా వ్యవహరిస్తుందన్నారు. ఈ క్రమంలో రాష్ట్రవ్యాప్తంగా సీపీఐ(ఎం) ఆధ్వర్యంలో భూ పోరాటాలు జరుగుతున్నాయని అన్నారు. భూపాలపల్లి పట్టణంలో గూడు కోసం గుడిసెలు వేసుకుంటే అధికారులు శిఖం భూమికి పట్టాలు రావని చెప్పడం దారుణమన్నారు. బడా భూస్వాములకు శిఖం భూములను ఎలా కట్టబెట్టారో చెప్పాలని డిమాండ్‌ చేశారు. ఇదే చెరువు శికం భూమిలో మార్కెట్‌ యార్డు, ఆటో నగర్ నిర్మాణం కోసం రూ.9లక్షలు కేటాయించి శంకుస్థాపన ఎలా చేశారని ప్రశ్నించారు. ఇక్కడ సుమారు 10,000 వేల మంది ప్రజలు ఇండ్లు లేని వారు ఉన్నారని, అందరికీ డబుల్‌ బెడ్‌రూమ్‌ ఇండ్లు ఇవ్వాలని డిమాండ్‌ చేశారు. లేదంటే సమరశీల పోరాటాలు నిర్వహిస్తామని హెచ్చరించారు. అనంతరం ములుగు జిల్లా గోవిందరావుపేట మండలం పస్రా గ్రామంలో నిర్వహించిన గుడిసెవాసుల సమావేశంలోనూ నాగయ్య పాల్గొని మాట్లాడారు. విలువైన భూముల కోసం నకిలీ పట్టాలు సృష్టించుకొని వచ్చేవారిని తరిమికొట్టాలని పిలుపునిచ్చారు. పస్రాలోని 109 సర్వే నెంబర్‌లో పేదలు వేసుకున్న గుడిసెలకు పట్టాలు ఇచ్చి పక్కా ఇల్లు నిర్మించాలని కోరారు. రాష్ట్రంలో ఇండ్ల స్థలాలు లేని నిరుపేదలు 40లక్షల మంది ఉన్నారని, ప్రభుత్వం ఇప్పటివరకు మూడు లక్షల మందికి మాత్రమే ఇండ్లు ఇచ్చిందని, ఇలా ఇస్తే మిగతా వారికి ఇవ్వడానికి ప్రభుత్వానికి ఎన్ని రోజులు పడుతుందని ప్రశ్నించారు. ప్రభుత్వాల మీద నమ్మకం లేకనే పేద ప్రజలు ప్రభుత్వ భూములు ఆక్రమించుకుని గుడిసెలు నిర్మించుకుంటున్నారని చెప్పారు. ఈనెల 9న హైదరాబాద్‌లోని ఇందిరా పార్క్‌ ఎదుట ధర్నాచౌక్‌లో జరిగే మహాధర్నాను జయప్రదం చేయాలని పిలుపునిచ్చారు. ఆయా కార్యక్రమాల్లో.. వ్యకాసా రాష్ట్ర నాయకులు బీరెడ్డి సాంబ శివ, జిల్లా కార్యదర్శి వర్గ సభ్యులు దమెర కిరణ్‌, జిల్లా కమిటీ సభ్యులు డబ్బా రాజన్న, వంగల రామస్వామి, గుర్రం దేవేందర్‌, అత్కురి శ్రీకాంత్‌, సంఘం నాయకులు ప్రీతి, గుడిసె వాసుల కమిటీ నాయకులు, ములుగు జిల్లా కార్యదర్శి తుమ్మల వెంకటరెడ్డి, తదితరులు పాల్గొన్నారు.
