Sat 28 May 23:14:31.088344 2022
నిన్నెందుకో అతడు రాలేదు
నల్లమబ్బు ఒంపే చీకటికి
రవికిరణపు మెరుపుకు
నడుమ జరిగే
సంభాషణల సందిగ్ధతల మధ్యన
నింగి నలుగుతోంది
ఎండిన దేహంతో అల్లాడుతున్న నేల
మేఘం ఒంపే క్షీరధారలకై
ఆవురావురంటోంది
పూలమొక్కలు తలలు వంచుకుని
మౌనంగా వాన కలను మోస్తున్నాయి
మొదలులోకి ఒలికిన నీటిని
ఎంత చప్పరించినా
చినుకుచేతుల కౌగిలింతంటే
వాటికెంత ఇష్టమో
నడివేసవి రోజున
ఎర్రని ముఖంతో
నవ్వుతూనే వేడెక్కించే సూర్యుడు రాలేదనుకున్నాను
బహుశా
క్రమం తప్పకుండా డ్యూటీ చేసి
అలసిన కార్మికుడిలా
విశ్రాంతికి తపిస్తున్నాడేమో అనుకున్నాను
బద్ధకపు చిరునామా ఎరుగని అతడు
ఈ రోజు ఉదయాన్నే
రెట్టింపు ఉత్సాహంతో
త్వరగా తయారై వచ్చాడు
భగభగలతో ముచ్చెమటలు పట్టిస్తూ
నిట్టూర్పు చితుకులు రాజేసి
నిలువెల్లా మంటలు రేపుతున్నాడు
-పద్మావతి రాంభక్త
9966307777
మీ స్నేహితులకు రికమెండ్ చెయ్యండి
