Sun 19 Jun 05:58:59.67666 2022
నాన్నొక అబద్దాల పుట్ట
కడుపు ఖాళీగా ఉన్నా
చెంబెడు నీళ్ళతో నింపి
పొట్ట నిండిందంటడు
నాన్నొక నమ్మకద్రోహి
తినుబండారాలింటికి తెచ్చి
తినమని తనకిస్తే
బయటే తిన్నానంటాడు
నాన్నొక మోసకారి
మా కన్నీటిని తను తుడిచి
తనలోని దుఃఖ కాల్వలను
గుండె చెరువులో దాచేస్తడు!
నాన్నొక గర్విష్టి
పండక్కి అందరికీ
కొత్త బట్టలు కొని
తనకు నచ్చలేదంటడు
నాన్నొక అహంకారి
తన కష్టార్జితాన్ని
తనకు ఖర్చు పెట్టకుండా
నాకక్కర్లేదని అరుస్తడు
నాన్నొక మొండి మనిషి
తనకు జ్వరమొచ్చినా
నాది ఉక్కు శరీరమని
మందులు బందు చేస్తడు
నాన్నొక స్వార్థపరుడు
తనకన్నా ఎత్తుకెదగాల్నని
తన భుజాల మీదెక్కించుకొని
తను చూడని లోకం చూపిస్తడు!!
(జూన్‌ మూడవ ఆదివారం ఫాదర్స్‌ డే సందర్భంగా)
- గంగాపురం శ్రీనివాస్‌, 9676305949
మీ స్నేహితులకు రికమెండ్ చెయ్యండి
