రోజురోజుకూ పెచ్చుమీరుతున్న లైంగిక దాడులు, హత్యల నుంచి మహిళలు ఎలా రక్షించుకోవాలోనని ఓ వైపు మదనపడుతుంటే మరోవైపు మృతదేహాలతో కూడా శృంగారం చేసే వికృతచేష్టలు రావడం దౌర్భగ్యకరం. నిర్భయ, దిశ లాంటి ఎన్ని చట్టాలు తీసుకొచ్చినా ఏదో ఒక సెక్షన్‌లో ఉన్న లొసుగుతో నిందితులు తప్పించుకోవడం ఆందోళన కలిగించే అంశం. 19 ఏండ్ల యువతిపై గ్యాంగ్‌రేప్‌ చేసిన వారిని నిర్దోషులుగా ప్రకటిస్తూ మధ్యప్రదేశ్‌ హైకోర్టు తీర్పునివ్వడం విచారకరం.
దారుణం.. కిరాతకం.. ఉన్మాదం.. ఇలాంటివి ఎన్ని పదాలు వాడినా ఈ భయంకరమైన ఘటనకు తక్కువే. నమ్మివచ్చిన ప్రియురాలు పెండ్లిచేసుకోమ్మని అడిగినందుకు హత్యచేశాడో నయవంచకుడు. అంతటితో ఆగకుండా మృతదేహాన్ని రంపంతో 35 ముక్కలుగా నరికాడు. దాన్ని భద్రపరిచేందుకు కొత్త ఫ్రిజ్‌ను కొన్నాడు. ఇంట్లో వాసన రాకుండా ఆగర్‌బత్తీలను అంటించాడు. ఆ తర్వాత అనుమానం రాకుండా రోజుకొక చోట ఆ ముక్కల్ని పారవేస్తూ వచ్చాడు. ఇంతకన్నా దారుణం ఇంకేమైనా ఉంటుందా? సరిగ్గా ఆరు నెలల తర్వాత ఈ నెల 15న దేశ రాజధాని ఢిల్లీలో వెలుగులోకి వచ్చిన ఈ హత్యోదంతంతో మహిళాలోకం ఒక్కసారిగా ఉలిక్కిపడింది. హత్యలు, రేప్‌లు చేసిన దుర్మార్గులు సమాజంలో స్వేచ్ఛగా తిరుగుతుంటే తప్పు చేయని వారు మాత్రం రహస్యంగా బతకాల్సిన దుస్థితి వచ్చింది. దీనికి ఎవరు సమాధానం చెప్పాలి? ఈ నేరాలు, ఘోరాలకు అడ్డుకట్ట వేసే బాధ్యత ఎవరిది?
మహారాష్ట్రలోని పాల్ఘర్‌కు చెందిన 28 ఏండ్ల యువతి శ్రద్ధ వాకర్‌. ముంబై ప్రాంతం మలాడ్‌లోని ఓ ప్రయివేటు కంపెనీ కాల్‌సెంటర్‌లో జాబ్‌చేసేది. అక్కడే అప్తాబ్‌ అమీన్‌ పూనావాలాతో పరిచయం ఏర్పడి అది కాస్తా ప్రేమకు దారితీసింది. ఇదే అదనుగా ఆమెను పెండ్లి చేసుకుంటానని నమ్మించి ఢిల్లీలోనే కొంతకాలం సహజీవనం చేశాడు. ఈ విషయం ఇంట్లో తెలిసి మతాలు వేరు కావడంతో పెండ్లికి అమ్మాయి తల్లిదండ్రులు ఒప్పుకోలేదు. దీంతో తాను నమ్ముకున్న అప్తాబ్‌తో ఢిల్లీకి వచ్చేసింది శ్రద్ధ. వచ్చినప్పటి నుంచి పెండ్లి గురించి ఇద్దరి మధ్య విబేధాలు. అప్తాబ్‌ ప్రతిసారీ దాటవేస్తూ రావడంతో గట్టిగా నిలదీసింది. దీంతో శ్రద్ధను గొంతు నులిమి చంపేశాడు. అంతటితో ఆగకుండా అమెరికన్‌ క్రైం షో 'డెక్స్‌టర్‌' ప్రేరణతో డెడ్‌బాడీని ముక్కలుగా నరికేసి అడవుల్లో అక్కడక్కడ విసిరేశాడు. ప్రేమించినందుకు ఇంత ఘాతుకానికి ఒడిగడతాడా? ఆ అమ్మాయి చేసిన తప్పేంటి? ప్రియుడిని నమ్మడమేనా? నమ్మితే అతను చేసిందేంటి నయవంచన. ప్రేమించి పెండ్లి చేసుకోవాలనుకున్న ఆమె ఆశ తీరలేదు. కూతుర్ని ప్రయోజకురాలిగా చూడాలను కున్న తల్లిదండ్రుల కోర్కె నెరవేరలేదు. తానే సర్వస్వమని నమ్మివచ్చినందుకు శారీరకంగా వాడుకుని ఆ తర్వాత కసాయిలా మారాడు ఆ క్రూరుడు. ఇది బయటకు వచ్చి నాలుగు రోజులవుతోంది అంతే. మథురైలో మరో ఘటన. యమునా ఎక్స్‌ప్రెస్‌వే పక్కన ప్లాస్టిక్‌ కవర్‌లో చుట్టిన యువతి మృతదేహం లభ్యమైంది. బాడీపై బుల్లెట్‌ గాయం, రక్తం, ఎవరో అగంతకులు ఆమెను కాల్చి ట్రాలీబ్యాగ్‌లో కుక్కి అక్కడ పడేశారు. ఇలాంటి విషాదాలు రోజూ ఏదో ఓ చోట నిత్యకృతమవుతుంటే మనసులో తెలియని ఆవేదన నిత్యం వెంటాడుతోంది.
రోజురోజుకూ పెచ్చుమీరుతున్న లైంగిక దాడులు, హత్యల నుంచి మహిళలు ఎలా రక్షించుకోవాలోనని ఓ వైపు మదనపడుతుంటే మరోవైపు మృతదేహాలతో కూడా శృంగారం చేసే వికృత చేష్టలు రావడం దౌర్భాగ్యకరం. నిర్భయ, దిశ లాంటి ఎన్ని చట్టాలు తీసుకొచ్చినా ఏదో ఒక సెక్షన్‌లో ఉన్న లొసుగుతో నిందితులు తప్పించుకోవడం ఆందోళన కలిగించే అంశం. 19 ఏండ్ల యువతిపై గ్యాంగ్‌రేప్‌ చేసిన వారిని నిర్దోషులుగా ప్రకటిస్తూ మధ్యప్రదేశ్‌ హైకోర్టు తీర్పునివ్వడం విచారకరం. 25 ఏండ్లుగా నడుస్తున్న బిల్కిస్‌బానో కేసులో నిందితులకు ఉరిశిక్ష వేయాలని దేశ వ్యాప్తంగా నిరసనలు వెల్లువెత్తుతుంటే ఈ విధంగా తీర్పురావడం బాధాకరం. ఇలాంటి తీర్పే న్యాయవ్యవస్థపై ప్రజలకున్న నమ్మకాన్ని కోల్పోయేలా చేస్తోంది.'దేశంలో న్యాయపరంగా ఇలాగే నిరాశ కొనసాగితే గనుక మహిళలకు ఆయుధాలు ఇవ్వాల్సిన సరైన సమయం ఇదే కావచ్చు' అని ఐఏఎస్‌ అధికారి స్మితా సబర్వాల్‌ వ్యాఖ్యానించారు. వాస్తవానికి ఇదే నిజం. పొరుగు దేశం నుంచి ప్రమాదముందని, మన దేశ రక్షణకు ప్రతి ఒక్కరూ పాటుపడాలని వల్లెవేస్తున్న నాయకులు స్వదేశంలోని మహిళలకు భద్రత కల్పించకుంటే వీరి పాలన ఎవరికోసం, ఎందుకోసం?.
ఉల్లాసం, ఉత్సాహాన్ని నింపే సినిమాలు హత్యలకు ప్రేరేపించడం, సరాదాలు, సంతోషాలతో సాగే స్నేహాలు ప్రేమవైపు దారి మళ్లడం జరుగుతున్న కొన్ని అనార్థాలకు సజీవ సాక్ష్యాలు. ప్రేమించేటప్పుడు వ్యక్తితో పాటు వారి మనస్తత్వాన్ని ఆలోచనలు పసిగట్టలేక పోవడం వల్ల జరిగే నష్టం భరించలేనది. దానికి ఉదాహరణ అర్థంతరంగా ముగిసిన శ్రద్ధ జీవితం. ఎవరినీ సహజంగా నమ్మొద్దని, ఆచితూచి అడుగేయాలని అమ్మాయిలను హెచ్చరించే ఘటనిది.
