హాయ్ నేస్తాలూ..! తూర్పున సూర్యుడు ఉదయిస్తేనే మనకు రోజు మొదలవుతుంది. జీవరాశి మనుగడకు తోడ్పడుతున్న సూర్యుడే లేకపోతే ప్రపంచమేమైపోతుందో... అది ఊహకు అందని విషయం. అలాంటి సూర్యుని గురించి మనకు ఎన్నో విషయాలు తెలుసనుకుంటాం. కానీ ఇంకా తెలుసుకోవలసిన అంశాలు చాలా ఉన్నాయి. అందులో కొన్ని ...
మన విశ్వంలో లెక్కలేనన్ని నక్షత్రాలున్నాయి. వాటిలోని ఓ సాధారణ నక్షత్రమే సూర్యుడు. మన భూమికి చాలా దగ్గరగా ఉంటాడు. అందువల్లనే అంత పెద్దగా కనిపిస్తాడు. సూర్యుడిలాంటివి పసుపురంగు కుబ్జ (ఎల్లో డ్వార్ఫ్) నక్షత్రాల కోవలోకి వస్తాయి. వీటినే G2V నక్షత్రాలంటారు. పసుపు రంగు ఉండి, ఉపరితల ఉష్ణోగ్రతలు 5,200 నుంచి 6000 కెల్విన్లు ఉంటే ఆ రకం నక్షత్రాలను G2V నక్షత్రాలంటారు. జీ అనే పదం పసుపు రంగు నక్షత్రాన్ని సూచిస్తుంది.
నక్షత్రాలు స్వయం ప్రకాశకాలని తెలుసు కదా! అంటే వెలుతురును పుట్టించేవన్న మాట. అలానే సూర్యుడు కూడా! అలా ప్రకాశించడానికి సూర్యుడిలో కొన్ని రసాయనిక చర్యలు ఎప్పుడూ జరుగుతూనే ఉంటాయి. సూర్యుడి మీద ఉండే హైడ్రోజన్ అణువులు ఒకదానితో ఒకటి చర్య జరుపుతూ ఉంటాయి. దానివల్ల నిరంతరం హీలియం అణువులు ఏర్పడుతుంటాయి. దీన్నే కేంద్రక సంలీనం అంటారు. దీనివల్ల పెద్ద మొత్తంలో కాంతి వెలువడుతుంది. మనకు కనిపించేది ఆ వెలుగే.
మన సౌరకుటుంబానికి కేంద్రం సూర్యుడే. సూర్యుడి ఆకర్షణ శక్తి వల్లే సౌర కుటుంబంలోని గ్రహాలన్నీ కక్ష్యల్లో తిరుగుతుంటాయి. సూర్యుడి బరువు ఎంతో తెలుసా! సౌరకుటుంబంలోని గ్రహాల బరువులన్నీ కలిపితే వచ్చే మొత్తానికి 743 రెట్లు ఎక్కువ. భూమితో పోల్చితే ఇది 3,30,000 రెట్లు అధికం!
సూర్యుడి నిర్మాణం
నిజానికి సూర్యుడు భూమిలా ఘనపదార్థం కాదు. గాలిరూపంలో ఉన్న కొన్ని పదార్థాల సమూహం. అయితే ఇవన్నీ క్రమపద్ధతిలో అమరి ఉండటం వల్ల సూర్యుడు గుండ్రంగా కనిపిస్తాడు. సూర్యుడిలో హైడ్రోజన్, హీలియం, ఆక్సిజన్, కార్బన్, నైట్రోజన్, సిలికాన్, మెగ్నీషియం,నియాన్, ఐరన్, సల్ఫర్లాంటివి ఉంటాయి. అయితే అక్కడ చాలా వేడిగా ఉంటుంది కదా! అందువల్ల అవన్నీ వాయురూపంలో ఉంటాయి. వాటిలోనూ హైడ్రోజనే ఎక్కువ (దాదాపు 72 శాతం) సూర్యకేంద్రకం (కోర్) సూర్యుడి వ్యాసార్థంలో 25 శాతం ఉంటుంది. దీని సాంద్రత నీటి సాంద్రత కన్నా 150రెట్లు ఎక్కువ. భూకేంద్రక సాంద్రత కన్నా దాదాపు ఆరురెట్లు అధికం. ఇక్కడి ఉష్ణోగ్రత కోటీ యాభై లక్షల కెల్విన్లు ఉంటుంది. కాబట్టి అక్కడి పీడనం భూకేంద్రక పీడనం కన్నా పదివేల రెట్లు ఎక్కువట.
కేంద్రకం చుట్టూ ఉండే భాగం రేడియేటివ్ జోన్. సూర్యుడి వ్యాసార్థంలో దీనిది 45 శాతం. కేంద్రక సంలీన చర్య ద్వారా ఉత్పత్తి అయిన శక్తి, విద్యుదయస్కాంత వికిరణ రూపంలోకి మారి బయటివైపు ప్రసరించే చర్య ఇక్కడ జరుగుతుంది.
సూర్యుడి బాహ్య ఉపరితలం కనెక్టివ్ జోన్. ఉష్ణ సంవహనం ద్వారా సూర్యుడి కేంద్రక చర్యల వల్ల ఉత్పత్తి అయిన శక్తిని సూర్యుడి ఉపరితలంవైపు తీసుకువెళ్లేందుకు ఇది సహాయపడుతుది. ఇది సూర్యుడి వ్యాసార్థంలో 30 శాతం ఉంటుంది.
సూర్యుడి ఉపరితల వాతావరణంలోని మొదటి పొర ఫొటోస్ఫియర్. మనకు కనిపించే సూర్యుడి పైభాగం ఇదే. అంటే మొదట్లో ఇది పారదర్శక పొరగా ఉంటుంది. కేంద్రం వైపు వెళ్లే కొద్దీ అపారదర్శకంగా, మందంగా కనిపిస్తుంది. దాదాపు దీని వ్యాసార్థాన్నే సూర్యుడి వ్యాసార్థంగా చెబుతుంటారు. ఇది దాదాపు 400 కి.మీ. మందం ఉంటుంది.
కరోనాకు ఫొటోస్పియర్కు మధ్యభాగంలో ఉండేదే క్రోమోస్ఫియర్. 2,500 కిలోమీటర్ల మందంతో ఉంటుంది. ఫొటోస్ఫియర్ కన్నా ఇందులో వేడి ఎక్కువ. దీని ఉష్ణోగ్రత 4,500 నుంచి 10,000 కెల్విన్ల వరకూ ఉంటుంది.
ఫోటోస్పియర్ తరువాత ఉండే పొరనే క్రోమోస్పియర్. దీని నుంచి కొన్ని మిలియన్ మైళ్లదూరం వరకూ వ్యాపించి ఉండే బాహ్యపొర కరోనా. ఇది అత్యంత వేడిగా ఉంటుంది. ఇక్కడి నుంచే అతినీలలోహిత కిరణాలు, ఎక్స్్రే తరంగాలు వెలువడుతాయి.
Authorization