తోడా తెగ ప్రజలు నీలగిరి పర్వతాల్లో నివసిస్తారు. దక్షిణ భారత దేశంలో తమిళనాడు కర్నాటక రాష్ట్రాల్లో నాలుగువందల డెబ్భరు ఎనిమిది చదరపు మైళ్ల విస్తీర్ణంలో వీరు నివసిస్తున్నారు. ఒకరికన్నా ఎక్కువ భర్తలను కలిగి ఉండే వివాహ వ్యవస్థ, పశు పోషక ఆర్థిక వ్యవస్థ వంటివి వీరి పట్ల ఆసక్తిని రేకెత్తించే అంశాలుగా మానవ శాస్త్రవేత్తలు అంటున్నారు. తోడాలు నివసించే ప్రాంతాల్లోనే మరో నాలుగు ఆదిమ జాతి ప్రజలు నివసిస్తున్నారు. వీరిని బడగ, కోట, కురుంబ, ఇరుల తెగలకు చెందిన ప్రజలుగా గుర్తించారు. తోడాలకు వారికంటూ ఓ భాష ఉంది. లిపి లేదు. తమిళ భాషకు దగ్గరగా వీరి భాష ఉన్నట్లు అనిపిస్తుంది. కానీ కొన్ని మూల పదాలను బట్టి బెలూచిస్తాన్లోని బ్రాహుహీలకు వీరికి సంబంధం ఉన్నట్లు కనిపిస్తుంది. తోడాలంటే చెట్టును పూజించేవారని వారి పొరుగున ఉండే బడగలవారు అంటారు.
గోధుమ రంగు కండ్లు, ఛామన ఛాయ, పెద్ద శరీరం, ఎత్తయిన సూదిలాంటి ముక్కు కలిగి ఉండే తోడాలు నల్లగా ఉండే ద్రవిడ జాతికి భిన్నంగా కనిపిస్తారు. పురుషులకు గడ్డం పెరిగి ఉంటుంది. మగవారు మంచి శరీర సౌష్టవం కలిగి ఉంటారు. మహిళలు అందంగాను, ఆరోగ్యంగాను కనిపిస్తారు. తోడాలు ఏ జాతివారనే విషయంలో శాస్త్రవేత్తల మధ్య భిన్నాభిప్రాయాలు ఉన్నాయి.
తోడా గ్రామాలు
తోడా గ్రామంలో ఆరుకు మించి ఇండ్లు ఉండటం అరుదుగా కనిపిస్తుంది. కొండవాగులు, అడవి అందుబాటులో ఉండి, కొద్దిగా ఎత్తుగా ఉండే ప్రదేశాలను వీరు గృహాలు నిర్మించుకోవడానికి ఎంచుకుంటారు. వీరి ఇండ్లు అర్ద గొట్టపు (అర్ద చంద్రాకారం) ఆకారంలో ఉంటాయి. గెడకర్రలు, తాటి ఆకులు, గడ్డితో గుడిసెలను నిర్మించుకుంటారు. గుడిసెల్లోకి వెళ్లే ప్రవేశద్వారం చాలా ఇరుకుగా ఉంటుంది. లోపలికి వెళ్లాలన్నా, బయటికి రావాలన్నా పాకవలసిందే. గుడిసెల్లో పాలు ఉంచడానికి, పాలపదార్థాలను తయారుచేయడానికి ప్రత్యేకమైన స్థలం కేటాయిస్తారు.
తోడాలు తార్తారులు, తెయివలీలు అనే రెండు భాగాలుగా చీలిపోయి జీవనం సాగిస్తున్నారు. వీరు తమ శాఖవారినే వివాహం చేసుకుంటారు. అయితే ఇతర వివాహాలను కూడా వీరు ఆమోదిస్తారు. పవిత్రమైన పశువుల మందలు, పశుశాలలు తార్తారుల ఆధీనంలోనే ఉంటాయి. తెయివలీలు కేవలం పశువుల కాపర్లుగానే ఉంటారు. అందువల్ల వీరి సమాజంలో తార్తారులకు ఉన్నత స్థానం ఉంది. ఈ రెండు శాఖలు మళ్లీ అనేక శాఖలుగా చీలిపోయాయి. ఈ తెగలు పక్కపక్కనే ఉన్న కొన్ని గ్రామాలకు పరిమితమై ఉంటాయి. ఈ గ్రామాల్లో ఉండే తెగల నాయకుని పేర ఆయా గోత్రాలను వ్యవహరిస్తారు. ఒక తెగకు చెందిన గ్రామాలన్నీ కొండల్లో సాధారణంగా ఒకే ప్రాంతంలో ఉంటాయి. ఒకే గోత్రానికి చెందినవారు తమ పశువుల పచ్చిక మేత కోసం ఒక గ్రామం నుంచి మరో గ్రామానికి తరలి వెళ్లవచ్చు. అంటే తోడాల గోత్రం సామాజికంగానే కాక, ఆర్థిక ప్రయోజనాలనూ నెరవేరుస్తుందన్నమాట!
కుటుంబం
ఒక్కో గోత్రం కుటుంబాలుగా విభజితమవుతుంది. కుటుంబాన్ని కుడుపెలి అంటారు. సోదరులు ఒకే మహిళను కాని, ఉమ్మడిగా కాని వివాహం చేసుకోవడం వల్ల సాధారణంగా తోడా కుటుంబంలో సోదరులు, వారి ఉమ్మడి భార్య లేక భార్యలు; వివాహం అయిన వారి కుమారులు, వివాహం కాని కుమారులు, అవివాహిత కుమార్తెలు ఉంటారు. కుటుంబ పెద్ద అయిన పురుషుని చేతిలో అధికారం ఉంటుంది. కుటుంబంలోని మగవారు పశుపోషణ, పాలు పితకడం, వెన్నతీయడం, కట్టెలు తేవడం, వంటచేయడం, వ్యాపారం చేయడం వంటి పనులు చేస్తారు. మహిళలు మాత్రం నీళ్లు తేవడం, బట్టలపై కుట్టుపనులు చేయడం, ధాన్యం దంచడం, చెరగడం, ఇల్లు ఊడ్వడం, గిన్నెలు కడగడం వంటి ఇంటి పనులు చేస్తారు. మతపరమైన, రాజకీయమైన వ్యవహారాలన్నీ మగవాళ్లే నిర్వహిస్తారు. ఆ విధంగా తెగ జీవితంలో మగవారు తమ ఆధిక్యతను పదిలపరచుకుంటారు. మొత్తం మీద పురుషుల స్థాయితో పోల్చినప్పుడు స్త్రీకి తక్కువ స్థానం ఉందని మాత్రం చెప్పక తప్పదు.
అయితే స్త్రీలను చులకన చేయడం కాని, క్రూరంగా చూడటం కాని, కనిపించదు. అయితే పూర్వం ఆడ శిశువులను చంపివేయడం ఉండేది. కానీ ఇప్పుడు అది కనుమరుగయింది. సమాజంలో స్త్రీల హౌదా క్రమంగా పెరుగుతూ వస్తున్నది. అయితే ఇప్పటికీ వారిని పాల ఉత్పత్తులు తయారుచేసే చోటుకు రానీయరు. ఇతర వంటకాలను మహిళలు తయారుచేయడం ఈ మధ్య పెరిగింది. ఉత్సవాలలో పాల్గొనకుండా మహిళలను దూరంగా, అంటరానివారిగా ఉంచే ఆచారం కూడా క్రమంగా సలలిపోతున్నది.
ఒకే స్త్రీని సోదరులు వివాహం చేసుకోవడం
తోడా ప్రజల్లో బహుభర్తృత్వం ఒక ఆచారంగా ఇంకా కొనసాగుతూనే ఉన్నది. సోదరులందరూ ఒకే స్త్రీని వివాహం చేసుకోవడం మామూలు విషయం. ఒక పురుషుడు ఒకే స్త్రీని వివాహం చేసుకోవడం, బహుభార్యత్వం కూడా అక్కడక్కడ కనిపిస్తుంది. బహుభర్తృత్వం వల్ల తమ ఉమ్మడి భార్యపె ౖసోదరుల మధ్య అసూయలు జనించకుండా వీరు కొన్ని పద్ధతులు ఏర్పాటుచేసుకున్నారు. సోదరుల్లో పెద్దవాడే స్త్రీని వివాహం చేసుకుంటాడు. మిగిలిన సోదరులు ఆచారాం ప్రకారం భర్తలైపోతారు. ఈ సోదరులు మరో స్త్రీని వివాహం చేసుకోవాలని భావించినా పెండ్లి చేసుకునే వరుడు మాత్రం పెద్దసోదరుడే అవుతాడు. అయితే ఒక స్త్రీని వివాహం చేసుకున్న వారందరూ సోదరులు కాకుండా, ఒకే గోత్రానికి చెందినవారైతే వరులందరిలో ఎవరు పెద్దవాడైతే వానితో ఆ స్త్రీకి వివాహం జరుగుతుంది. వారి ఉమ్మడి భార్య ప్రతి భర్త దగ్గరకు వస్తూ ఉంటుంది. అట్లా వచ్చినప్పుడు ఒక నెల రోజులు అతడితోనే ఉండి పోతుంది.
తోడా ప్రజల్లో బాల్యవివాహాల ఆచారం ఉంది. రెండు మూడు ఏండ్ల వయసు ఉన్న పిల్లల వివాహాలు తల్లిదండ్రులు ఖరారు చేసుకుంటారు. బాలిక రజస్వల అయ్యేవరకు తల్లిదండ్రుల ఇంటివద్దే ఉంటుంది. భార్యలను (స్త్రీకి ఇష్టం లేకపోయినా) మార్చుకోవడం కనిపిస్తుంది. దీన్ని బట్టి స్త్రీలను వస్తువులుగా పురుషులు పరిగణిస్తున్నట్లు అర్థమవుతుంది. సెక్స్ విషయాల్లో విశృంఖలత్వాన్ని అనుసరించడం వల్ల వివాహేతర లైంగిక సంబంధాలకు కూడా అనుమతి ఉంటుంది. అట్లాగే పవిత్రులుగా గుర్తింపు పొందిన పాలమనుషులు తాము కోరుకున్న స్త్రీతో లైంగిక సంబంధం పెట్టుకోవచ్చు. ఈ జీవన శైలిని గమనించిన కొందరు పండితులు తోడాలు విశృంఖల జీవనులని, వారికి పవిత్రత, శీలం అనేవాటిల్లో విశ్వాసం లేదని పేర్కొన్నారు.
విల్లంబుల ఉత్సవం
తోడా ప్రజలు తండ్రి ద్వారా వారసత్వాన్ని చెప్పుకుంటారు. అయితే నిజమైన తండ్రి ఎవరన్నది బహుభర్తృత్వం వల్ల తెలుసుకోవడం సాధ్యం కాదు. అందువల్ల విల్లంబుల ఉత్సవం అనే ఉత్సవాన్ని ఏర్పాటుచేస్తారు. ఏడో నెల గర్భంతో ఉన్న స్త్రీకిఉమ్మడి భర్తల్లో ఒకరు ఏకాభిప్రాయం ద్వారా విల్లంబులు బహూకరిస్తాడు. ఇందుకోసం పెద్దఎత్తున పండుగ నిర్వహిస్తాడు. అట్లా విల్లంబులు బహూకరించిన వ్యక్తి ఆమె గర్భంలో ఉన్న బిడ్డకే కాకుండా తర్వాత ఆమెకు పుట్టే పిల్లలకు కూడా తండ్రి అవుతాడు. మరో సోదరుడు అందరి అంగీకారం ద్వారా విల్లంబులు ఆ స్త్రీకి బహూకరించేవరకు పుట్టిన బిడ్డలకు మొదట విల్లంబులు బహూకరించిన సోదరుడు తండ్రిగా గుర్తింపు పొందుతాడు. అయితే తోడా పిల్లలు మొత్తం తెగకు చెందిన వారిగా భావిస్తారే కానీ ఆయా వ్యక్తుల సంతానంగా చెప్పుకోరు. ఒక స్త్రీ భర్తలందరూ సోదరులైనా, కాకున్నా పిల్లలను ప్రేమతో ఆదరించి ముద్దు చేస్తారు. ఈ విల్లంబుల ఉత్సవానికి ఇప్పటికీ ఎంతో ప్రాధాన్యత ఉంది. సామాజికంగా, కర్మకాండ పరంగా ఈ ఆచారాన్ని తప్పనిసరిగా ఆచరించవలసి వస్తున్నది. ఈ ఉత్సవం జరుపుకోకుండా ప్రసవించడం అవమానకర విషయంగా తోడాలు భావిస్తారు.
విడాకులు
విడాకులు ఇచ్చుకోవడం అతి సాధారణ విషయం. ఇతర భారతీయ తెగల్లో భార్య ఇతరులతో లైంగిక సంబంధం పెట్టుకున్నా, సంతానం కలుగకపోయినా విడాకులిస్తారు. తోడాల్లో ఇందుకు భిన్నంగా ఉంటుంది. భార్య బద్దకస్తురాలైనా, మూర్ఖురాలైనా కూడా విడాకులిస్తారు. భార్యకు విడాకులిచ్చిన వ్యక్తి అత్తమామలకు ఒక దున్నపోతును అపరాధంగా చెల్లించాల్సి ఉంటుంది.
ఈ విధంగా ఆదిమ సమాజంలో విలసిల్లిన అనేక ఆచార సంప్రదాయాలు ఇప్పటికీ తోడా సమాజంలో కొనసాగుతూనే ఉన్నాయి.
Authorization