గ్రామాల్లో పని దొరక్క చాలా మంది నగరాలకు వలస వస్తున్నారు. అన్నం పెట్టే రైతులు కూలీలుగా మారుతున్నారు. భవన నిర్మాణ కార్మికులుగా, పారి శుద్ధ్య కార్మికులుగా, హోటల్ కార్మికులుగా, మెకానిక్లుగా, షాపు కార్మికులుగా, తోపుడు బండ్లపై, ప్లాట్ఫార్మ్లపై చిరువ్యాపారస్తులు, హమాలీలుగా, రవాణా కార్మికులుగా, ఇండ్లలో పనిచేసేవారిగా, సెక్యూరిటీ గార్డులుగా, చెత్త ఏరుకుని అమ్మి కొత్త సరుకు ఉత్పత్తికి తోడ్పాటునిస్తూ దుర్గంధ కాలుష్య కోరల్లో చిక్కుకుని సామాన్య మానవుడి అవసరాలుతీర్చే వాళ్ళుగా మారారు. వీరిలో ఎంతో మంది కుటుంబం గడవడం కోసం తమ ఆరోగ్యాన్ని ఫణంగా పెడుతున్నారు. అలాంటి వలస కార్మికులు ఎదుర్కొంటున్న సమస్యల గురించి నేటి కొలువులో...
ఈ కార్మికులకు ఎలాంటి చట్టాలు వర్తించవు. అభివృద్ధికి నోచుకోని ఇలాంటి అసంఘటిత కార్మికులు వేలల్లో ఉన్నారు. కానీ ఈ కార్మికుల గురించి మన ప్రభుత్వాలు పట్టించుకోవడం లేదు. వీరిలో ఏ ఒక్కరికీ పనిగ్యారెంటీ కల్పించడం లేదు. వీరి సంక్షేమం కోసం వామపక్ష పార్టీలు పోరాడితే అసంఘటిత కార్మిక చట్టం 1996లో వచ్చింది. ఆయా రాష్ట్రాల పరిస్థితులకనుగుణంగా ఈ చట్టాన్ని అమలు చేయాలని కేంద్రం రాష్ట్రాలకు అప్పజెప్పింది.
పట్టించుకునే వారు లేరు
కార్మికులకు పనిగ్యారెంటీ. అసంఘటిత కార్మికులకు కనీసవేతనం ఇవ్వాలి. ఈ కార్మికులకు ప్రభుత్వమే ఇండ్లు నిర్మించాలి. కార్మిక గుర్తింపుకార్డులు ఇవ్వాలి. ఇ.ఎస్.ఐ., పి.ఎఫ్ సౌకర్యం కల్పించాలి. 60 సంవత్సరాలు దాటిన వారికి పెన్షన్ సౌకర్యం కల్పించాలి. 34 రకాల పనిచేసే అసంఘటిత రంగాలకు విడివిడిగా సంక్షేమబోర్డులు ఏర్పాటు చేయాలి. ఇలా చట్టంలో ఎన్నో విషయాలు పొందుపర్చారు. మన పక్కన ఉన్న తమిళనాడు, కర్నాటక, కేరళ రాష్ట్రాల్లో ఇందులోని కొన్ని అమలవుతున్నాయి. అలాగే కేరళ, త్రిపురలో 34 రంగాలకు విడి విడిగా బోర్డులను సైతం ఏర్పాటు చేశారు. 60 సంవత్సరాలు దాటిన వారికి వెయ్యి రూపాయలు పెన్షన్ కూడా ఇస్తున్నారు. అయితే మన రాష్ట్రంలో ఈ చట్టం గురించి పట్టించుకునే వారే లేరు.
ఉద్యమాలకు తట్టుకోలేక
సిఐటియు లాంటి కార్మిక సంఘం ఇతర కార్మిక సంఘాలతో కలిసి అసంఘటిత రంగ కార్మికులకు సంక్షేమ బోర్డు ఏర్పాటు చేయాలని ఉద్యమించారు. కార్మికుల ఉద్యమాలకు తట్టుకోలేని ప్రభుత్వం 34 రంగాలకు కలిపి ఒకటే బోర్డు ఏర్పాటు చేసింది. వాటిలో కేవలం భవననిర్మాణ కార్మికులకు ఉమ్మడి రాష్ట్రంలో వైఎస్ఆర్ ప్రభుత్వం స్కాలాబన్ పేరుతో కొన్ని సౌకర్యాలు కల్పించారు. అందులో కార్మికులకు గుర్తింపు కార్డులు ఇచ్చారు. ప్రమాదం జరిగి చనిపోతే 5 లక్షల 20 వేలు, కాలు, చేతులు విరిగితే లక్షా 50 వేలు నష్ట పరిహారం ఇవ్వాలని నిర్ణయించారు. కాని ఐదు వేల రూపాయాలు స్వాలంబన పథకం కింద డిపాజిట్ చేసి పేరు నమోదు చేసుకుంటే తప్ప వయసుపైబడ్డ వారికి పెన్షన్లు ఇవ్వలేమని చేతులు దులుపుకున్నారు.
బాల కార్మికులుగా మారుతున్నారు
అసంఘటిత కార్మికులు నగరాలపై ఆధారపడ్డ తరువాత భార్యా భర్తలిద్దరూ పని చేయాలి. చాలీ చాలని జీతంతో బతుకు గడపాలి. కానీ వారి పిల్లల భవిష్యత్ కోసం ఎన్నో అగచాట్లు పడాల్సి వస్తుంది. చాలామంది తమ పిల్లల్ని చదివించలేక మధ్యలోనే చదువు ఆపేసి పనుల్లో పెడుతున్నారు. దాంతో మంచి చదువులు చదువుకొని ఉద్యోగాలు చేయాల్సిన పిల్లలు బాలకార్మికులుగా మారుతున్నారు. ఫలితంగా యువత కార్మికులుగా మిగిలిపోయి కాయకష్టం చేసి బతుకుతున్నారు.
రోడ్డుపైనే గడపాలి
రవాణా కార్మికులు, ప్లాట్ ఫార్మ్ వ్యాపారం భవన నిర్మాణ కార్మికులు రోడ్డుపైనే గడపాలి. ఎక్కడ తినే అవకాశం ఉంటే అక్కడే తినాలి. చీకటి పడేవరకు శ్రమించాలి. దాంతో సంపాదన ఉన్నా, లేకున్నా కొంత పోలీసులకు ముట్ట జెప్పక తప్పదు. రోడ్డుపై ట్రాఫిక్ అవుతుందని పోలీసులతోపాటు పెద్ద వ్యాపారుల వేదింపులు తప్పవు. ఇలాంటి వేధింపుల నుండి తమకు రక్షణ కల్పించమని కార్మిక శాఖా అధికారుల ముందు ఎన్ని సార్లు మొరపెట్టుకున్న చెవిటోడి ముందు శంఖం ఊదినట్లు వ్యవహరిస్తున్నారు.
మహిళల సమస్యలు వర్ణనాతీతం
లేబర్ అడ్డాలపై మహిళలకు టాయిలెట్స్, వేచి ఉండటానికి షెడ్డులు, మంచినీరు వంటి కనీస సౌకర్యాలు కల్పించాలి. ప్రతి అడ్డా వద్ద ఐదురూపాయాల భోజన సౌకర్యం కల్పించాలి. 34 రకాల కార్మిక సంక్షేమ బోర్డులు ఏర్పాటు చేయాలి. బోర్డు కమిటీలలో ఐ.ఎ.ఎస్ అధికారి ఇద్దరు ప్రజా ప్రతినిధులు, వివిధ కార్మిక సంఘాలనుంచి ప్రతి నిధులు ఉండేటట్లు నిర్ణయించాలి. అసంఘటిత రంగ కార్మికుల సంక్షేమానికి సరిపోయే నిధులు కేటాయించి సక్రమంగా ఖర్చు పెట్టాలని డిమాండ్ చేస్తున్నారు.
కడుపు మాడ్చుకోవాల్సిందే
ఎన్నో గ్రామల నుండి కూలీ పనుల కోసం నగరానికి వలస వచ్చారు. తెల్లవారు జామున అడ్డాలపై నిలబడి పని కోసం వెదురు చూడాలి. రోజు రోజుకు అడ్డాలపై పని కోసం ఎదురు చూసే వారి సంఖ్య పెరిగిపోతుంది. దాంతో అందరికీ పని దొరకడం లేదు. పని దొరికిన రోజు కుటుంబం కడుపు నిండా తింటుంది. మిగిలిన రోజుల్లో కడుపు మాడ్చుకోవాల్సిందే. ఇలాంటి కార్మికుల గురించి ప్రభుత్వం పట్టించుకోవడం లేదు. ఈ కార్మికులకు చేతినిండా పని కల్పిస్తే హాయిగా బతకగలుగుతారు.
కాంట్రాక్టర్ ఇష్టప్రకారమే
తెల్లవారు జామున లేవాలి. అడ్డాపై వచ్చి నిలబడాలి. పని ఉన్న రోజు చేసుకోవాలి. లేకపోతే ఉసూరు పని వెనక్కుపోవాలి. చాలా కుటుంబాల్లో భార్యా, భర్తలు ఇదే పనిపై ఆధారపడి బతుకుతున్నారు. కాంట్రాక్టర్లు కూలీలకు వారికి ఇష్టమొచ్చినంత కూలి ఇస్తారు. గట్టిగా మట్లాడితే అసలు పనే లేదు పొమ్మంటారు. దాంతో కార్మికులు వారి సమస్యలపై నోరువిప్పలకపోతున్నారు. చాలామందికి గుర్తింపు కార్డులు లేవు. వేల సంఖ్యలో ఉన్న ఇలాంటి అసంఘటిత కార్మికుల సమస్యలు ప్రభుత్వానికి పట్టడం లేదు.
సౌకర్యాలు కరువు
పనిలోకి వెళ్ళినపుడు ఎంతో మంది ప్రమాదాల బారిన పడుతున్నారు. చాలామంది కాళ్ళూ చేతులు విరగొట్టుకుంటున్నారు. అయినా వీరి ఆరోగ్యం గురించి పట్టించుకునేవారు లేరు. నిత్యం సిమెంట్ పని చేసి చేసి చేతులు బొబ్బలు ఎక్కుతాయి. కాళ్ళు బండబారి పోతున్నాయి. అయినా వీరికి ఇఎస్ఐ లాంటి సౌకర్యమే లేదు.
బరువులు మోయక తప్పదు
హమాలీ కూలీలు లేనిదే ఏ మార్కెట్లో పని జరగదు. షాపుల్లో బస్తాలు మోయాలన్నా, కూరగాయల మార్కెట్లో కూరగాయాలు దింపాలన్నా హమాలీ కూలీలు కావల్సిందే. వీరు నిత్యం బరువులు మోసి నడుములు విరిగిపోతున్నాయి. ఆ బరువులు ఎత్తనిదే పూట గడవదు. దాంతో చేసేది లేక దొరికిన పని చేసుకుంటూ బతుకుతున్నారు. ఇలాంటి అసంఘటిత కార్మికుల కోసం ప్రభుత్వం చట్టం తెచ్చింది. కాని దాన్ని సరిగా అమలు చేసేవారు లేరు. వీరి సమస్యలు పట్టించుకునేవాళ్ళు లేరు.
ఎన్నో చేస్తామన్నారు
మున్సిపల్ కార్మికులు లేనిదే శుభ్రత ఉండదు. దేశంలో మోడి స్వచ్ఛ భారత్ అన్నాడు. రాష్ట్రంలో కేసీఆర్ స్వచ్ఛ హైదరాబాద్ అన్నాడు. శుభ్రతలో ప్రధాన పాత్ర పోషిస్తున్న వీరి సమస్యలను మాత్రం ప్రభుత్వాలు పట్టించుకోవడం లేదు. ఎన్నో ఏండ్ల నుండి మున్సిపల్ వర్కర్లను కాంట్రాక్ట్ పద్దతిలో తీసుకుంటున్నారు. కనీస వేతనాలు ఇవ్వరు. నిత్యం చెత్త, దుమ్ము, మురిలో పని చేసే మాకు ఎలాంటి సౌకర్యాలు లేవు. చేతులకు గ్లౌజులు, కాళ్ళకు చెప్పులు, తలకు నూనె లాంటివి ఎన్నో ఇస్తామన్నారు. కానీ ఇప్పటి వరకు అవేవి ఇవ్వలేదు. జిహెచ్ఎంసి డ్రెస్ మాత్రం ఇచ్చారు. అది కూడా ఎంత మందికి ఉపయోగపడుతుంది.
ఇదే అసలు సమయం
ఈ విధంగా అసంఘటిత కార్మికులు ఎన్నో సమస్యలతో సతమతమవుతున్నారు. తమని ఆదుకునే వారి కోసం ఎదురుచూస్తున్నారు. వీరు గుర్తు పెట్టుకోవాల్సింది ఒక్కటే. మనల్ని పాలించే పాలకుల విధానాలు మారనంత కాలం సమస్యల పరిష్కారం దొరకదు. ఇదే అసలు తరుణం. త్వరలో ఎన్నికలు జరగబోతున్నాయి. మన సమస్యలు పరిష్కరించే మంచి నాయకులకు ఓటు వేసి అసెంబ్లీకి పంపించాలి. ఓట్ల కోసం వచ్చే వారిని నిలదియ్యాలి. స్వలాభం కోసం పాకులాడుతున్న పాలకులను ఇంటికి పంపించాలి. అప్పుడే బతుకుల్లో మార్పు వస్తుంది.
Authorization