ప్రశ్న :
1. ఈ విశ్వం వ్యాకోచిస్తుందంటున్నారు. ఇక ఆకాశం మొత్తం చీకటి అవుతుందా?
2. రాకెట్ల ప్రయోగం వల్ల ఓజోన్ పొర దెబ్బతినదా?
3. రాకెట్టు నుండి వెలువడే ఇంధన వాయువులు కాలుష్యాన్ని పెంచవా?
4. ప్రతి గెలాక్సీ మధ్య కష్ణబిలం (బ్లాకహేోల్) ఉంటే ఎపుడో ఒకసారి నక్షత్రాలన్నీ అందులోకి వెళ్లిపోతే విశ్వం మొత్తం శూన్యమైపోదా?
5. రాకెట్లు ప్రయోగించేందుకు వేలాది కోట్ల రూపాయలు ఖర్చవుతాయి. చాలా ప్రయోగాలు విఫలమవుతుంటాయి. ఇలా రాకెట్ల మీద పెట్టే నిధుల్ని నిరుపేదల అభ్యున్నతికి ఖర్చు చేయవచ్చు కదా!
- ఎం.చిన్నాజి చౌదరి, శ్రీవెంకటేశ్వర బాలకుటీర్, శ్యామలానగర్, గుంటూరు
- ఎల్.నవ్యశ్రీ, కాటూరి పబ్లిక్ స్కూల్, గుంటూరు
జవాబు :
1.ఈ విశ్వం వ్యాకోచించడం అంటే పదార్థాల మధ్య ఉన్న స్థలం పెరగడం. మీరు మతాబులు పేల్చినప్పుడు పైన చుక్కల్లాగా మెరిసే మెరుపుల మధ్య స్థలం పెరగడంలాగా అన్నమాట. విశ్వం ఎప్పుడూ ఉంటుంది. ఎప్పుడూ అంటే- కాలానికి సంబంధించిన అంశం. పదార్థంతో పాటే కాలం ఉంటుంది. పాదార్థిక గతికి ఆ గతుల పరంపరల తీవ్రతకు కొలమానమే కాలం. కాబట్టి మనం ఉన్న ప్రస్తుత తరహా విశ్వంలో ప్రస్తుత తరహా కాలం ఉంటుంది. ఆ దృక్కోణంలో సుమారు 1500 కోట్ల సంవత్సరాల క్రితం సంభవించిన మహా విస్పోటనం (Big Bang) ద్వారా శక్తి, పదార్థం వర్తమాన కాల, స్థల అవిచ్ఛిన్నతలోకి ఇమిడాయి. పదార్థాల మధ్య ఉన్న గురుత్వాకర్షక బలాన్ని అధిగమించేలా ఆ విస్పోటనం ఉండడం వల్ల విశ్వంలోని పాదార్థిక అంశాల మధ్య అంతరం పెరుగుతోంది. విద్యుదయస్కాంత శక్తి రూపం ((Electromagnetic Energy form) అయిన కాంతి పాదార్థిక వ్యయం (annihilation of matter) ద్వారానే లభ్యమౌతోంది. నక్షత్రాలలో కాంతికి ఇదే ఆధారం. కొన్ని లక్షల కోట్ల సంవత్సరాల తర్వాత విశ్వంలో కాంతి నశిస్తుంది. అప్పుడు గురుత్వాకర్షక బలాల ప్రభావం పెరిగి తిరిగి విశ్వం అసంకలించి మరో విస్పోటనానికి దారితీస్తుందని విశ్వాంతరాళి శాస్త్రవేత్తలు (Cosmologists) భావిస్తున్నారు.
2. ఓజోన్ పొర చాలా పలుచనిది. ఎపుడూ తయారవుతూ, తరగుతూ నియంత్రణా గతి (Steady State) లో ఉంటుంది. రాకెట్ ఓజోన్ పొర వైశాల్యంతో పోలిస్తే చాలా చిన్నది. పైగా అది అక్కడే స్థిరంగా ఉండదు. నీటిలోకి ఓ బఠాణీ గింజను వేస్తే తాత్కాలికంగా నీటి పైపొర తెరుచుకున్నా, బఠానీ గింజ మునిగాక నీటిలో ఆదంధ్వం అలాగే ఉండదు కదా! అలాగే ఓజోన్ పొర తిరిగి పునర్నిర్మించుకొంటుంది.
3. రాకెట్టు నుంచి వెలువడే ఇంధన వాయువుల లక్షణం వాడిన ఇంధనాన్ని బట్టి ఉంటుంది. శీతలీకరణ రాకెట్ యంత్రాల (Cryogenic Rocket Engine)తో ద్రవరూప హైడ్రోజన్కు ఇంధనం (fuel)గా, ద్రవరూప ఆక్సిజన్ను ఆక్సీకరణి (మండించి శక్తిని బయటికి లాగేది)గా వాడతారు. ఈ దహన ప్రక్రియ (Combustion)లో విడుదలయ్యేది కేవలం నీటి ఆవిరి మాత్రమే. కాబట్టి కాలుష్య ప్రమాదం లేదు. కానీ క్రయోజనిక్ ఇంజన్ అధిక వ్యయంతో కూడుకున్నది. దీని బదులు ఘన ఇంధనాల్ని (Solid fuels) వాడుతున్నారు. ఇందులోనే ఇంధన స్వభావం మండించే ఆక్సిజన్ స్వభావం ఉంటాయి. ఒక రకంగా చెప్పాలంటే ఇవి పేలుడు పదార్థాల్లాంటివి. ఇవి పేలి విడుదలయ్యే వాయువుల గతి శక్తితో రాకెట్టు కదులుతుంది. చాలా మటుకు ఇవి పేలినప్పుడు విడుదలయ్యే వాయువులు నైట్రోజన్, ఆక్సిజన్, నీటి ఆవిరి ఉంటాయి. ఇవి ప్రమాదకరం కాదు. కొన్ని లవణ మూలకాలు ఉన్నా అవి ఎంత మోతాదుల్లో ఉంటాయన్నది మెలిటరీ రహస్యం. అవి కొద్దో గొప్పో బూడిదగా మారతాయి. సముద్రంలో పడి కలిసిపోతాయి. ప్రమాదం పెద్దగా ఉండదు.
4. ఈ విశాల విశ్వంలో సుమారు రెండు లక్షల కోట్ల వరకు గెలాక్సీలు ఉన్నాయని భావిస్తున్నారు. ఒక్కో గెలాక్సీలో సుమారు కోటి కోట్ల నక్షత్రాల (వంద ట్రిలియన్లు) వరకు ఉంటాయని అంచనా. దీపావళి పండుగల్లో మీరు వెలిగించే భూచక్ర మతాబుల్లాగా ప్రతి గెలాక్సీ గమనంలో ఉంటుంది. ఈ అంచు నుంచి ఆ అంచు వరకు ఉన్న దూరాన్ని గెలాక్సీ వ్యాసంలో (diameter) అంటారు. దీని విలువ 3000 నుంచి 3 లక్షల కాంతి సంవత్సరాల వరకు ఉంటుంది. మనం ఉన్న పాలపుంత (Milky way) గెలాక్సీ వ్యాసం సుమారు లక్ష కాంతి సంవత్సరాలు. ఇక కాంతి సంవత్సరం అంటే కాంతి సంవత్సర కాలంలో ప్రయాణించే దూరమన్నమాట. దీని విలువ సుమారుగా లక్షకోట్ల కి.మీ. ఉంటుంది. ఇలాంటివి లక్షన్న మాట. నక్షత్రాల మధ్య సగటు దూరం చాలా ఉంటుంది కాబట్టి మధ్యలో ఉన్న కష్ణబిలాని (Black Hole) కి అందనంత దూరంలో ఉంటాయనుకోవాలి. ఉదాహరణకు మన సూర్యుడు ఒక నక్షత్రం. మనకు అతి సమీపంలో ఉన్న తదుపరి నక్షత్రం ప్రాక్సిమా సెంటారి (ProximaCentauri). ఇది మనకు సుమారు నాలుగు కాంతి సంవత్సరాల దూరంలో ఉంది. కాబట్టి గెలాక్సీ మధ్యలో ఉన్న బ్లాక్హోేల్లోకి నక్షత్రాలు వెళ్లే అవకాశం కన్నా కొన్ని నక్షత్రాలే బ్లాక్ హోల్స్గా మారే అవకాశం ఎక్కువ.
5. సామాజిక ప్రగతిలో ప్రజా సంక్షేమానికి నిధులు కేటాయింపుతో పాటు శాస్త్ర సాంకేతిక ప్రగతికి కూడా నిధులు అవసరం. రాకెట్ల ప్రయోగాలలో వైఫల్యం కన్నా విజయాలే ఎక్కువ. నేడు మనకున్న అంతర్జాల వ్యవస్థ (ఇంటర్నెట్), వాతావరణ సూచిక (Weather Forecasting), టెలిఫోన్ సమాచార వ్యవస్థ, కొత్త సర్వేయింగ్, అంతరిక్ష శోధన, టెలివిజన్ వంటి సదుపాయాల్ని కలిగించింది కత్రిమ ఉపగ్రహాలే. వాటిని కక్ష్య (Orbit) లో ఉంచేది రాకెట్లే. పేదల అభ్యున్నతికి ప్రత్యేక నిధులు ఇవ్వాలి. దానికి రాకెట్టు ప్రయోగాల నిధులకు సంబంధం లేదు. పాలకుల బడ్జెట్టు కేటాయింపుల్లో అంశాలివి.
Authorization