హైదరాబాద్ : దేశ రాజధాని ఢిల్లీలో గురువారం ఉదయం కాల్పులు కలకలం సృష్టించాయి. ఖజురి ఖాస్‌ ప్రాంతంలో పోలీసులు, నేరస్థుల మధ్య కాల్పులు చోటు చేసుకున్నాయి. కాల్పుల్లో ఇద్దరు నేరగాళ్లు మృతి చెందగా.. మరో ఇద్దరు పోలీసులకు గాయాలయ్యాయి. ఈ సందర్భంగా వారి నుంచి ఆటోమేటిక్ పిస్టల్స్, నాలుగు మ్యాగజైన్‌లు, 15 లైవ్ కాట్రిడ్జ్‌లను స్వాధీనం చేసుకున్నట్లు పోలీసులు తెలిపారు. మృతులను అమీర్‌, రంజాన్‌గా గుర్తించారు. ఇవాళ ఉదయం ఇద్దరు నేరస్తులను వలవేసి పట్టుకునేందుకు పోలీసులు ప్రయత్నించారు. ఈ క్రమంలో తప్పించుకునేందుకు పోలీసులపైకి కాల్పులకు దిగారు. పోలీసులు సైతం ప్రతిగా కాల్పులు జరిపారు. బుల్లెట్‌ గాయాలకు గురైన వారిని ఆసుప్రతికి తరలించారు. అక్కడ వారు మృతి చెందినట్లుగా వైద్యులు ధ్రువీకరించారు.