హైదరాబాద్ : ఇటీవలి కాలంలో పలువురి సోషల్ మీడియా ఖాతాలు హ్యాక్ కు గురవుతున్న సంగతి తెలిసిందే. ముఖ్యంగా సినీ, టీవీ సెలబ్రిటీలకు ఈ బెడద మరింత ఎక్కువగా ఉంది. తాజాగా బుల్లితెర యాంకర్, సినీ నటి గాయత్రి భార్గవి ఫేస్ బుక్ ఖాతాను దుండగులు హ్యాక్ చేశారు. దీంతో ఆమె హైదరాబాద్ పోలీసులను ఆశ్రయించి, ఫిర్యాదు చేశారు. ఈ అంశంపై ఏసీపీ కేవీఎం ప్రసాద్ స్పందిస్తూ... గాయత్రి భార్గవికి ఫేస్ బుక్ ఖాతాతో పాటు, ప్రత్యేకంగా పేజీ కూడా ఉందని చెప్పారు. గుర్తుతెలియని వ్యక్తులు ఆమె ఫేస్ బుక్, పేజ్ లను హ్యాక్ చేసి... వివిధ మతాలకు సంబంధించిన అభ్యంతరకరమైన మెసేజ్ లను పోస్ట్ చేస్తున్నారని తెలిపారు. ఆమె ఫిర్యాదు మేరకు కేసు నమోదు చేశామని, దర్యాప్తు కొనసాగుతోందని చెప్పారు.