హైదరాబాద్: సినీ ఇండ‌స్ట్రీకి ఇంకా వ‌రుస విషాదాలు వెంటాడుతూనే ఉన్నాయి. ఒక విషాదం నుండి బ‌య‌ట‌ప‌డే లోపు మరో విషాద వార్త వినాల్సి వ‌స్తుంది. తాజాగా ప్రముఖ యాంకర్, నటుడు ఆనంద కణ్ణన్ అనారోగ్యంతో కన్నుమూయడంతో కోలీవుడ్‌ వర్గాల్లో విషాద ఛాయలు అలుముకున్నాయి. ప్రస్తుతం ఆయన వయసు 48 సంవత్సరాలు. కాన్సర్ కారణంగా ఆయన తుది శ్వాస విడిచారు. సింగపూర్‌లో వసంతం టీవీ ద్వారా వీజేగా కెరీర్‌ ప్రారంభించిన ఆనంద.. తర్వాత చెన్నైలో స్థిరపడ్డాడు. సన్‌ మ్యూజిక్ తో పాటు సన్‌ టీవీలో సీరియళ్ల ద్వారా ఆడియెన్స్‌ను అలరించాడు. ‘సరోజ, అదిసయ ఉల్గం’ చిత్రాల్లో ఆయన నటించగా.. మరో రెండు చిత్రాలు రిలీజ్‌కు నోచుకోలేదు. యూత్‌ ఐకాన్‌గా పేరున్న ఆనంద ఇలా అక‌స్మాత్తుగా క‌న్నుమూయ‌డం ప్ర‌తి ఒక్కరిని దిగ్భ్రాంతికి గురి చేస్తుంది.
ఆనంద్ కణ్ణన్ కొన్నాళ్లుగా క్యాన్స‌ర్‌తో పోరాడుతున్నాడు. వారం క్రితం హఠాత్తుగా ఆరోగ్యం తిరగబడడంతో చెన్నైలోని ఓ ఆస్పత్రిలో చేరారు. అక్కడ క్యాన్సర్ చికిత్స పొందుతూ ఆరోగ్యం విషమించడంతో నిన్న (ఆగస్టు 16) కన్నుమూశారు. దాదాపు 30 ఏళ్ల పాటు పాటు సినీ రంగానికి సేవలు అందించిన ఆనంద తిరిగి రాని లోకాల‌కు వెళ్ల‌డంతో ఆయన అభిమానులు శోక సంద్రంలో మునిగారు. ఆత్మ‌కు శాంతి చేకూరాల‌ని ప్రార్ధిస్తున్నారు.
