హైదరాబాద్ : తెలుగులో స్టార్ హీరోల సినిమాలు ఒక్కొక్కటిగా ఓటీటీలోకే వెళ్తున్నాయి. ఇటీవలే నాని నటించిన 'టక్ జగదీష్` ఓటీటీలో రిలీజ్ అవుతున్నట్టు మేకర్స్ ప్రకటించిన సంగతి తెలిసిందే. ఇప్పుడు మరో స్టార్ హీరో నితిన్ నటించిన చిత్రం కూడా ఓటీటీ బాట పట్టనుంది. 
        మేర్లపాక గాంధీ దర్శకత్వంలో నితిన్‌ నటించిన చిత్రం 'మాస్ట్రో`. ఈ సినిమా షూటింగ్ ఎప్పుడో పూర్తి కాగా కరోనా కారణంగా వాయిదా పడుతూ వస్తోంది. ఈ మూవీ ప్రముఖ ఓటీటీ సంస్థ డిస్నీ ప్లస్‌ హాట్‌స్టార్‌లో విడుదల చేస్తున్నట్టు మేకర్స్ అధికారికంగా ప్రకటించారు. దాంతో పాటు ఆగస్టు 23వ తేదీన సాయంత్రం 5 గంటలకు సినిమా ట్రైలర్‌ను విడుదల చేయనున్నట్టు కూడా తెలిపారు. ఈ మేరకు నితిన్ కూడా ఈ విషయాన్ని సోషల్ మీడియా ద్వారా వెల్లడించారు. ఈ చిత్రం హిందీలో బ్లాక్ బస్టర్ హిట్ అయిన 'అంధాదున్` చిత్రానికి తెలుగు రీమేక్‌గా వస్తోంది. మహతి స్వర సాగర్ ఈ చిత్రానికి సంగీతాన్ని అందించగా   నభా నటేష్ హీరోయిన్‌గా నటిస్తున్నది. తమన్నా  కీలక పాత్రలో కనిపించనుంది.