హైదరాబాద్: జీవితంలో ఒక్కోసారి చేయని తప్పుకు అవమానం పడాల్సి వస్తుంది. శిక్ష కూడా అనుభవించాల్సి వస్తుంది. అయితే తాను నిరపరాధినని నిరూపించుకునేందుకు అన్ని దారులు మూసుకుపోయినప్పుడు మౌనంగా శిక్ష భరించడం తప్ప ఏమీ చేయలేం. చాలా సందర్భాల్లో పోలీసులు అమాయకులపై తప్పుడు కేసులు బనాయించి జైలుకు పంపిస్తున్నారంటూ ఆరోపణలు వినిపిస్తుంటాయి. అయితే పోలీసుల్లో అలాంటి వారే కాదు నిజాన్ని నిజాయితీగా వెలికితీసి బాధితులకు న్యాయం చేసేవారూ ఉంటారని నిరూపించారు హైదరాబాద్. ఇటీవల గాంధీ ఆస్పత్రిలో తమపై అత్యాచారం జరిగిందటూ అక్కాచెల్లెళ్లు ఆడిన నాటకం తెలంగాణ రాష్ట్రంలో ఎంత సంచలనం రేపిందో తెలిసిందే. వారు చేసిన ఫిర్యాదు మేరకు గాంధీ ఆసుపత్రి రేడియోగ్రాఫర్‌ ఉమామహేశ్వర్ సహా మరికొందరిని పోలీసులు అదుపులోకి తీసుకుని విచారించారు. చివరికి ఆ మహిళలు కట్టుకథలు చెప్పారని తేల్చి నిందితులను విడిచిపెట్టారు. అయితే అన్యాయంగా తనపై నేరం మోపడం, చేయని తప్పుకు పోలీసుల విచారణ ఎదుర్కోవడం వంటి సంఘటనలో ఉమామహేశ్వర్ ఎంత మానసిక క్షోభ అనుభవించారో మాటల్లో చెప్పలేం. తాజాగా మీడియాతో మాట్లాడిన ఆయన తన అనుభవాలను వ్యక్తపరిచారు.
‘ఆగస్టు 16 మధ్యాహ్నం భోజనం చేస్తుండగా చిలకలగూడ పోలీసులు ఫోన్‌ చేసి స్టేషన్‌కు పిలిచారు. ఆసుపత్రిలో ఏదైనా సమాచారం కోసం పిలిచారేమోనని భోజనం మధ్యలోనే వదిలేసి వెళ్లాను. స్టేషన్‌లో మీడియా ప్రతినిధులు హడావుడి ఉండటంతో వారి కంటపడకుండా నన్ను లోపలికి తీసుకెళ్లారు. అక్కడ మా దూరపు బంధువు ఉంది. నా ఎదురుగానే ఏం జరిగిందమ్మా అని పోలీసులు ఆమెను ప్రశ్నించగా.. నన్ను చూపిస్తూ ఇతడితో పాటు మరికొందరు తమపై అత్యాచారం చేశారంటూ చెప్పింది. ఆ క్షణంలో ఒక్కసారిగా షాక్‌కు గురైన నాకు జీవితంపై ఆశ పోయింది. పోలీసులు నన్ను రెండు గంటల పాటు తమదైన శైలిలో ఇంటరాగేట్ చేశారు.’
‘నేను ఏ నేరం చేయలేదని మొత్తుకున్నా అనుమానంతో రకరకాలుగా ప్రశ్నించారు. దీంతో నాకు ఇక జైలు జీవితం తప్పదని ఫిక్స్ అయిపోయా. కొద్ది గంటల తర్వాత ఓ పోలీసు అధికారి వచ్చి ‘నువ్వు తప్పు చేయకపోతే ధైర్యంగా ఉండు’ అని చెప్పడంతో కాస్త ఊపిరి పీల్చుకున్నా. నిర్దోషిగా తేలిన తరువాత బుధవారం అర్ధరాత్రి 2 గంటల ప్రాంతంలో హైదరాబాద్ పోలీసు కమిషనర్ కార్యాలయానికి తీసుకెళ్లి కమిషనర్ అంజనీకుమార్‌ గదిలోకి పంపారు.. నీకు.. గ్యాంగ్ రేప్‌కు సంబంధం లేదని నిర్ధారణ అయింది... సంతోషంగా ఇంటికి వెళ్లు అన్నారు. బయటకొచ్చి గట్టిగా ఊపిరి పీల్చుకున్నా. లాంఛనాలన్నీ పూర్తిచేశాక గురువారం రాత్రి నన్ను వదిలేశారు. ఇంటికి వెళ్లగానే బిడ్డలను గట్టిగా గుండెలకు హత్తుకుని అరగంట పాటు ఏడుస్తూనే ఉన్నా. అమ్మ, నా భార్య ఓదార్చడంతో ఈ లోకంలోకి వచ్చా. రేపిస్టు అన్న వార్తలు కలిచివేశాయి. ఆ మానసిక క్షోభ నుంచి ఇప్పుడిప్పుడే బయటపడుతున్నా’ అని ఉమామహేశ్వర్ కన్నీరుమున్నీరయ్యారు. దూరపు బంధువులు కదా అని వాళ్లకు సాయం చేసినందుకు తనపైనే తప్పుడు కేసు పెట్టారని, గ్యాంగ్ రేప్ కేసులో ఇరుక్కుంటే జీవితాంతం జైల్లోనే ఉండాలంటూ పోలీసులు అనడంతో ఆ సమయంలో తీవ్రంగా భయపడిపోయానని ఆయన చెప్పుకొచ్చారు.
‘నన్ను పోలీసులు అరెస్ట్‌ చేశారని తెలిసి అనారోగ్యంతో ఉన్న అమ్మ, 11 నెలల కుమార్తెతో నా భార్య చిలకలగూడ ఠాణాకు వచ్చారు. నా భర్త అలాంటి వాడు కాదు.. మీ కాళ్లు పట్టుకుంటా వదిలేయండంటూ పోలీసులను వేడుకున్నారు. అయితే పోలీసులు వారికి సర్దిజెప్పి పంపింజేసి నన్ను టాస్క్‌ఫోర్స్ కార్యాలయానికి తీసుకెళ్లి ఇంటరాగేట్ చేశారు. దీంతో మూడురోజులు నరకం అనుభవించాను. నీ భర్త రేప్ చేశాడంట కదా అంటూ ఇరుగుపొరుగు వారు నా భార్యను ప్రశ్నలడిగి వేధించారు. నా భర్త అమాయకుడు, నిజం నిలకడ మీద తెలుస్తుందని ఆమె అందరికీ ధైర్యంగా సమాధానం చెప్పింది. చివరికి నిజమే గెలిచి నేను బయటపడ్డాను. ఈ విషయాన్ని నా భార్య తన కుటుంబ సభ్యులకూ చెప్పలేదు. నేను ఏ తప్పూ చేయలేదని నమ్మిన కన్నతల్లి, భార్యకు లక్షల కృతజ్ఞతలు చెబుతున్నా’ అని ఉమామహేశ్వర్ తెలిపారు.
