హైదరాబాద్ : కుక్క పిల్లను కాపాడబోయిన ఓ 12 ఏండ్ల బాలిక 9వ అంతస్తు పైనుంచి పడి మృతి చెందింది. ఈ ఘటన ఢిల్లీకి సమీపంలోని ఉత్తరప్రదేశ్‌ ఘజియాబాద్‌లో చోటుచేసుకుంది. స్తానికులు తెలి పిన వివరాల ప్రకారం.. గౌర్ హోమ్స్ హౌసింగ్ సొసైటీ 9వ అంతస్తులోని అపార్ట్‌మెంట్‌లో ఉంటున్న జ్యోత్న ఏడవ తరగతి చదువుతున్నది. బుధవారం మధ్యాహ్నం ఇంట్లో కుక్క పిల్లతో ఆడుకుంటున్నది. అయితే బాల్కానీకి ఏర్పాటు చేసిన నెట్‌లో కుక్క పిల్ల చిక్కుకున్నది. దాంతో కుక్క పిల్లను నెట్‌ నుంచి తీసేందుకు ప్రయత్నించిన బాలిక అదుపు తప్పి దానితో సహా కిందపడింది. బాలిక అరుపులు విన్న తల్లి కిరణ్ వచ్చి చూడగా ఆమె కూతురు, కుక్క పిల్ల కిందపడి రక్తం మడుగుల్లో ఉన్నారు. బాలికను ఆస్పత్రికి తరలించగా అప్పటికే మరణించినట్టు వైద్యులు తెలిపారు. ఆ కుక్క పిల్ల కూడా చనిపోయింది. పోలీసులు ఘటనా స్థలానికి వెళ్లి పరిశీలించి కేసు నమోదు చేసుకుని దర్యాప్తు చేస్తున్నారు.
