నవతెలంగాణ - హైదరాబాద్
ఇంగ్లాండ్ ఆల్‌రౌండర్, ఆ జట్టు టెస్ట్ కెప్టెన్ బెన్ స్టోక్స్ ప్రపంచ రికార్డు నెలకొల్పాడు. బ్రెండన్ మెక్‌కల్లమ్‌ను అధిగమించి టెస్ట్ క్రికెట్ చరిత్రలో అత్యధిక సిక్సర్లు బాదిన ఆటగాడిగా నిలిచాడు. ఇంగ్లాండ్, న్యూజిలాండ్‌ మధ్య జరుగుతున్న తొలి టెస్టు రెండో ఇన్నింగ్స్‌లో అతడు రెండు సిక్సర్లు బాది మెక్‌కల్లమ్ (107) పేరిట ఉన్న రికార్డును బద్దలు కొట్టాడు. ప్రస్తుతం స్టోక్స్ (109) సిక్స్‌లతో అగ్రస్థానంలో ఉండగా.. మెక్‌కల్లమ్ (107), ఆడమ్‌ గిల్‌క్రిస్ట్ (100) వరుసగా తర్వాతి స్థానాల్లో ఉన్నారు. ఈ జాబితాలో టాప్‌-10లో భారత్‌ నుంచి వీరేంద్ర సెహ్వాగ్ (91) ఒక్కడే ఉన్నాడు.
ఇక, ఇంగ్లాండ్, కివీస్‌ మ్యాచ్‌ విషయానికొస్తే.. మూడో రోజు ఆట ముగిసే సమయానికి రెండో ఇన్నింగ్స్‌లో న్యూజిలాండ్‌ ఐదు వికెట్లు కోల్పోయి 63 పరుగులు చేసింది. మరో ఐదు వికెట్లను పడగొడితే ఇంగ్లాండ్‌దే గెలుపు. మరోవైపు కివీస్‌ విజయం సాధించాలంటే 331 పరుగులు చేయాల్సి ఉంది.. తొలి ఇన్నింగ్స్‌లో న్యూజిలాండ్‌ 306 పరుగులకు ఆలౌట్‌ కాగా.. ఇంగ్లాండ్ 325/9 వద్ద డిక్లేర్డ్ చేసింది. రెండో ఇన్నింగ్స్‌లో ఇంగ్లాండ్ 374 పరుగులకు ఆలౌటై.. న్యూజిలాండ్‌ ఎదుట 394 పరుగులను లక్ష్యంగా నిర్దేశించింది.
