నవతెలంగాణ-హైదరాబాద్ : కాళేశ్వ‌రం ప్రాజెక్ట్‌కు జాతీయ హోదా కోసం తెలంగాణ ప్ర‌భుత్వం ఎలాంటి ప్ర‌తిపాద‌న‌లు పంప‌లేద‌ని కేంద్ర ప్ర‌భుత్వం చేస్తున్న ప్ర‌చారంపై రాష్ట్ర ఆర్థిక మంత్రి హ‌రీశ్‌రావు స్పందించారు. ఈ అంశంపై పార్ల‌మెంట్‌లో కేంద్రం చేసిన ప్ర‌క‌ట‌న‌పై మంత్రి తీవ్ర ఆగ్ర‌హం వ్య‌క్తం చేశారు. కేంద్రం చేస్తున్న ప్ర‌చారం అవాస్త‌వ‌మ‌ని మంత్రి స్ప‌ష్టం చేశారు. కాళేశ్వ‌రం ప్రాజెక్ట్‌కు జాతీయ హోదా ఇవ్వాల‌ని రాష్ట్ర ప్ర‌భుత్వం కేంద్రానికి ప‌లుమార్లు విజ్ఞ‌ప్తి చేసింద‌ని హ‌రీశ్‌రావు గుర్తు చేశారు. రాజ‌కీయ క‌క్ష‌తోనే తెలంగాణ ప్రాజెక్టుల‌కు కేంద్రం జాతీయ హోదా ఇవ్వలేద‌ని మండిప‌డ్డారు. బీజేపీ పాలిత రాష్ట్రాల్లోని రెండు ప్రాజెక్టుల‌కు మాత్రం జాతీయ హోదా ఇస్తార‌ని తెలిపారు. రాష్ట్ర ప్రాజెక్టుల‌కు జాతీయ హోదా విష‌యంలో కేంద్రం వివ‌క్ష‌ను ఎండ‌గ‌డుతూ హ‌రీశ్‌రావు వ‌రుస ట్వీట్లు చేశారు. ఈ ట్వీట్ల‌కు రాష్ట్ర ప్ర‌భుత్వం కేంద్రానికి చేసిన విజ్ఞ‌ప్తుల‌ను కూడా జ‌త‌ప‌రిచారు హ‌రీశ్‌రావు.